In mittui a tla a nih pawn min dem suh ang che u awwwww !!!!!!!!!!!! :D (written by Machhani Hmar Lungtau THE LOST DECEMBER Tun tum hi kan in hmuh leh hmasak ber na ani – kum 10 hnu ah. Field bul kotlang pang nuam zet mai, ram zau tak, tlang dung chi hrang hrang hring dup mai hmuh theihna, hmana kum 10 kal ta hmalam, naupang mai kan la nih laia kan thiante nena hlim taka kan inkhualtelem laih laih na thin ah chuan amah chauh in alo thu a. Min han hmu thut chu makti awm takin min en vang vang a, min hai deuh tawh nge ni a, a beiseiloh ang taka min hmu thut chuan a ti hrilhhai zawk, ka hre lo. Keipawhin a hmel chu dang deuh riau a ka hriat vang leh, chutia mahni chauhin ka awm dawn emaw ka tih laia ani lo awm ve ka han hmu thut chu ka hamhaih deuh avangin engmah sawi lem lovin rei vaklo chu ka han dinchilh ren rawn a. Chutah amah zawk chu tawngchhuak hmasa in, “E he! Nang i ni maw? I va dang tawh ve, ka hai dawn che alawm le. I lo zin chhoh ve ani maw?” ati bah deuh nak a. “ Aw ni e. Hun rei tak chhung helai hmun hi ka hmu tawh ngai lova, tum tum chu chawlh hman nan ka duh ani. Enge i an le?” ka lo ti thuai a. Ani chuan “Ka tha alawm. Helai hmun ah te i rawn lang ve teh mial a. Rawn thu ve ta che” ati a. Kei chuan a bula thuthmun rem pah chuan “Helai hmun hi ka ngaina hle thin asin. Hmanah khan ka lo kal fo tawh thin a, hmuh leh ka chak em a ni. Nang pawh hi helaia hmuh che hi ka inring miah hleinem” tiin ka chhang a. Min melh zauh pah chuan “Ka kal fo thin alawm. Khaw hawi vel a nuam em a.” ati a. A ngawi deuh vang vang a, chutah “Ka hmuh loh na che a rei tawh hle mai. I zirna lam te a kaltluang maw?” ati a. Kei chuan “Zin veivak vak mi ka ni lo tlat ani. Ka post graduate tawh asin…..tunah hian doctoral thesis ka buaipui mek a. Nang zawk….enge i tih tak le?” tiin ka zawt let a. “ Well….keichu medical science ah ka post grad a…. Pathian zarah.” “Oh… Ani maw? A va ropui em. I practice dawn em?” “Aih” “Mahse engati maw? Doctor nih hnu a practice lova chawlhsan mai chu i duhdan ani a maw?” tiin ka zawt ta ngawt a. Mak ka ti hle ani. Ani chu kum hnih zet kan inhriat chhung khan mipa naupang thluak tha tak, lehkhathiam thei em em mai kha ani thin a. A sikul kalpui te leh midangte pawh mi ropui taka a chhuah loh ring reng reng kan awm ngailo. Kan tleirawl laia vawikhat kan skul bang park a kan len ho tuma a pa anga Doctor thiam tak nih ngei a tum thu min hrilh kha ka hrechhuak zawk nghe nghe a. “Hman ami ang kha ka ni tawh hleinem.” zawite in ati sap a. A hmel ah chuan nguina riau a nei niin ka va hmu a. Chutah aw zangkhai takin, “ Anih leh, nang ve thung, eng thil nge i zir tak a?” ati a. “Psychology ah ka post grad a. Doctorate degree neih hi ka tum ber ani thin a…..University ah te ka la zirtir ve ang chu tiin ka suangtuah thin. Thil harsa tak chu ani ngei mai a, Pathian tanpuina azarah ka la beisei cheu anih hi.” Nui chunga ka han tih chuan dilchhut hmel takin min en vang vang a, thutak hmel zetin “Ka hriat thin Eva ngei kha i la ni. Tumruh, paukhauh, rilru tlang” ati sap a. “I tum chu i ti thei ngei ang tih ka ringhlel love” ati leh a. “Ka lawm e.” A hmel chu ka han en chiang a, a lo danglam tawh hle ani tih ka hmu a. Kum 10 hmalam, tun ang hun, December thla vela kan inhmuh hnuhnun ber tum kha ka ngaihtuah chhuak a. Khami tuma a landan leh tuna a hmelhmang te chu ka han khaikhin ru vela, hun in mihring te a tih danglam nasat theih zia te chu ka ngaihtuah ta rauh rauh a. Khatih lai kha chuan tleirawl kum 15 mi, harhvang leh rual el zet mai kha ani thin a. Tunah erawh chuan tlangval ruakhau tak, mahni inrintawkna ngah hmel tak alo ni tawh. Mahse a tleirawl chhuah lai hmel, hmai tung ret rawt, hnar bang sang vah mai, mitmeng fiah tak erawh kha chu ala pu tho. Ka pa khan zan khat chu kan chhungkaw inkhawmna ah a hnathawhna chungchang ah thil danglam tak mai a sawi chhuak a. Khawpui lamah thuneitu ten an sawn a ni. Khawpui lama kan inhmun ah kan insawn ang a, helai a kan in hi kan hralh mai a ngai dawn ani tih te a sawi a. Chumi zan atanga ni thum ni ah chuan kan chhungkaw motor lian tak chuan kan insuan chhuak ta nghal mai kha ani a. Kan insuanchhuah ni a kan in bula Jonah a rawn ding reng te, inbe ngam chiah si lova ralkhat atanga kan inthlirliam tak ni te kha ka la hrereng mai. Khami tum kha kan inhmuh tawp ber ni tur ani tih te kha lo chhut thleng phak ni ila tun ang hun hi kan thleng lo tur, tih te chu ka ngaihtuahna ah chuan a rawn lut nawn uai uai a. A hmai chu dang deuh bai in ka hre deuh tlat a, thil engemaw uai rit tu a nei ni in a lang tlat bawk. Chutih lai chuan ka ngaihtuahna chu min rawn tawmpui ve niawm tak in “Ka dang tawh tiraw?” a rawn ti chhuak hlawl a. Kei chuan “Kum 10 lai a liam tawh alawm.” ka lo ti var a. “Ni e, kum 10. Khami chhung zawng khan vawikhatmah kan inhmu ta miah lo.” Kan ngawi ta reng a. Kei ang thovin kum 10 hmalam a thil thleng kha a thlir kir ve ani tih ka hre mai a. A la theihnghilh bik lo ani mahna. Ni e, keipawn ka la theihnghilh lo ani; ka damchhung zawngin ka theihnghilh tawh kher lovang, he khawvela ka hmangaih hmasa ber nena kan inhmuh hnuhnun ber ni kha. Tleirawl chhuah hlimin ani nen hian he khua ah hian kan intawng a. A tan chuan a khawvel kha ka ni thin a, ka tan pawh ani aia thlan tur reng reng kha an awm ngai bik lo. Kum hnih lai mai kha inhriatchian tawn nan leh thilthar zir dun in hun kan hmang ani deuh ber mai. Skul khatah kan kal dun a, kei aiin a pawl sang hret na a, ban ah chuan min lo nghak ngei ngei thin ani. Naupang mai kan la nih avang khan hmangaihna hian enge a ken tel a, puitling te hmangaihna khawvelah chuan sum leh pai leh dinhmun inthlauhna ten thil an tih danglam theih zia te kha kan hrethiam phak ngai lova, chhut nachang kan hre ngai hek lo. Kan tan chuan khawvel kha a zim a, a chhunga cheng te pawh min kaihruaitu leh min enkawltu te hlir an nih avangin a thlamuanthlak hle thin. A hmelhmang te chu ka mitthla ah hian a cham reng thin in, a mitmeng nung sar te leh kan pahniha kan inkawm changa ka bula a awm avanga a zam ru deuh thin hmel te chu ka theihnghilh ngai lo. Mahse tunah kum heti zat a han liam hnu ah erawh chuan khang hriatrengna te kha an lo thamral then tawh in, diktak chuan aman min hmu a min hai lek lek ang chiah khan ka hmuh tirh khan ka hai tep ve tho ani. “Pasal i nei tawh em?” min ti a. Ka la neilo ani tih ka han sawi chuan a hmel chu a danglam deuh ani tih ka hmu a, a chhan erawh chu ka chhuidawn thiam mai lo. Ani nupui a neih tawh leh tawh loh ka han zawh chuan a lu a thing mai a. “Engatinge i la neih loh?” tiin min zawt let khauh a. “Thla thum hnu ah chuan inneih kan tum tawh a.” A tawng tak mai loh avang chuan ka han en a, min lo melh reng ani tih ka han hmuh chuan ka hamhaih lek lek a. Chu chu a hmu thiam ani chek ang chu, a nui ta hawk a. “April thla ah i tihna em ni?”ati a. “Aw ni e. Ka pasal neih tur chuan i nuih a ti za ang tih rin ngaihna pawh ka hre hleinem.” “Ni love. Chutiang ani lo. I hrilhhai hmel ka hmuh khan thil engemaw min hriatchhuah tir ani. Khatiang chiah khan min en tawh thin in ka hria…ka hriatsual loh chuan…” Ka sam chu a en leh vang vang a, chutah thli in ka sam a chhem len chu rawn huih kiang in, “I sam hi chu a sei reng thin, tunah pawh.” ati leh a. Kei chu ka lo thle sawn a. “Enge maw tih i tum le? Hmanlai thil te chu an ral tawh tih i hria alawm” ka ti a. “Ral thei lo tam tak a awm ve thin asin.” A han ngawi leh dat a. “I pasal hual chu mi tha tak anih ngei ka ring. Tin, a vannei hle bawk.” Ka lamah chuan a rawn thle phei deuh a. “A hming ka hre thei ang em?” Ka pasal hual chu ka ngaihtuah chhuak a, kan intawn tirh a kan in ngainat nghal mai theih zia te, ani chu ka nunhlui a meichher thi theilo tura ka ngaih, tuman an tih mit zawh loh ti mit tu anih zia te, ka tana a hmangaihna tehkhin tur awm hauh lo khawpa nasa te leh amah a ka innghah thuk zia te chu ka ngaihtuah a. A tel lo chuan he ka nun pawh hi a famkim thei tawh lo hial in ka hre thin. Nikum mai khan min neih a duh thu min hrilh a, keipawn amah neih ngei chu ka duhthlanna ani tih ka hria ani. Tichuan a chhungte leh ka chhungte remruatna in thla thum hnu ah chuan inneih kan tum tawh ani. “Ka hriat ve atana remchang lo ka zawt palh che anih chuan min hrethiam em ang chu maw?” Ka harh zawk a. Thupha chawi pahin ka pasal hual hming chu ka hrilh a. “Hming mawi tak anih chu le. Pasal duhawm tak a nih ngei ka beisei.” “Ka lawm e. Ani chu mi tha tak ani a, ka ring em em bawk.” A lu a bu nghat a. A kut pahnih chu suih belhbawmin a hmui a siktir a, hla taka tlangdung thui taka inkhawh zur mai kara ni tla tur lam chu a thlir ta veng veng a. Muk taka thil ngaihtuah ni a lan tak avang chuan tibuai tawh lova kalsan mai ka tum a. “Ka kal tawh mai ange” tiin ka tho a, kal mai tumin ka han inher a. Mahse ka kal thei lo. Ka chhungril ah chuan engemaw min tibuai vek tu a awm ni ber in ka hria. “Khawngaih in min hruai haw thei ang em?” ka ti ta ngawt a. Ka aw khur dawt dawt te chu hrelo hram se ka ti ngawih ngawih. A tho va, ka hma ah chuan a rawn ding a, a sang kher mai. Amah ngei kha ani tih chu hre mah ila, hmana rawlthar zakzum tak, ka rilru zawng zawng luah thin tu hma ah khan ni lovin, tlangval hmelhriat loh, mi hip thei tak hma ah ka ding ni hian ka inhre that thut a. Mahse hun kha leh chen ka thinlung in alo zawn thin, a tana ka hmangaihna nung reng thin ngei kha, ka hma a ding mek hi ani tih erawh chu chiang takin ka hre si. “Engatinge i tah tak mai?” tiin ka kut chu a rawn chelh a. “Eng thil in nge ti na che le?” tiin ka bianga mittui chu a kutin a hru a. “Englo….engmah ani love. Tunah hian haw ka duh ani….khawngaih in.” “Anih leh kal rawh le. Ka thlah haw ang che.” Kawng tluan chuan engmah kan sawi leh ta lo. Ka thlenna hotel gate bulah chuan a car chu a ti ding a, lawmthu ka hrilh hnu chuan ka chhuak a, kal nghal mai ka tum a. “Eva…….” Ka ding dawt a. A ngawih tak vang vang avang chuan ka leh hawi a. “Naktuk ah ka hmu leh thei che ang em?” ‘Hmu leh thei che ang em’ maw? Ka hmu leh duh che alawm Jonah…..ka damchhunga hmuh reng tawh che ka duh. Ka hnen ata hi i kalbo tawh lovang tiin min tiam la ka duh nghe nghe asin. I damchhung in…kan damchhung in…. Eva! Enge maw i ngaihtuah le? Zachary-a nupui tur i ni tawh tih hi theihnghilh suh! “Eva???” “Ka….ka hre lo. Ka sawi awmzia chu, ka thei lovang. Naktukah chuan veng danga ka thiante hnen lamah ka insawn phei dawn a.” Dawt ka sawi avang chuan ka inthiam chuang hauh lo. A bu nghat a. “Anih leh le…” tiin a car chu a ti nung a, a kal ta a. Zan alo nih chuan ka room atana min buatsaih sak ah chuan hma takin ka mu a. Mahse muthilh erawh chu rin ang ngei in a harsa hle mai. Tun chawlh ka hman dan tur chu ka ruahman lawk ang ani dawn lo tawp tih pawh ka hrethiam ta. Jonah hi he khua ah hian a awm ka ring pha lo reng reng. Kum 8 kal ta khan a pa hnathawh avangin state dangah an chhungkua chu an pem a. A u mipa nupui nei tawh te chhungkua chuan helai hmuna an chhungkaw ram chu rochung in enkawltu hran an ruai a, anmahni chhungkua chuan kum 2 dan ah an rawn tlawh zeuh zeuh thin alo ni a. Amah tak erawh hi chu rampawn ah lehkha a zir avangin a rawn chuangchhuak ve ngai lem lova, tun kum erawh chu a nu nen an inhmun rawn tlawh pah in chawlh an rawn hmang ani. Heng thil hi tlaikhaw hnu a ka hriat chauh ani. Keipawh state danga kan chhungte bulah lehkha ka zir ve bawk avangin ka chhungte bulah ka awm khat hle a, hemi khua ah ngat phei chuan kum 10 hnu a ka kal leh hmasak ber na ani hial a. Thil tam tak a lo danglam tawh in, hmana ka thian hlui thenkhat te phei chu an lo boral tawh hial nghe nghe ani. Kum 10 lai mai chu Jonah nen hian kan inhmu ngai ta lo na a, thil pakhat erawh chu, mihring mihrinna a puitlin lam ka pan zel na kawng ah leh, hun inher liam zel chuan ka thinlung ah a nemnghet ta telh telh thung. Chu chu Jonah ka la hmangaih reng fo na chu ani. Vawi tam tak Jonah chu hmuh leh ngei ka tum thin. He khua a an chhungkaw hmelhriat ni awm a ka hriat te ho lah kha kum 5 kal ta a ka han zawn tum khan ramdang ah te an lo pem bo tawh in, a then chu an lo boral tawh hlawm ani tih min lo hrilh kha ani a. Hmuh leh a, ka la hmangaih reng ani tih hrilh chu ka duhthusam lian ber ani fo thin. A chhan chu khawiah pawh kalin awm ila, amah kha ka kiangah hian a awm ve reng niin ka hre thin a. Ngaihzawng te chu han nei ve bawk thin mah ila Jonah bula ka famkim ang khan tuma bulah hian ka famkim thei ngai reng reng lo. Kan khawpuia ka haw chang te hian khawi hmunah nge a awm hrelo mah ila kalkawng ah emaw, khawilai park ah emaw te hian ka hmuh thut te hi ka beisei ta thin a. Amah bia in khawih theilo mah ila a hmelhmang tal ka mitthla a cham tir leh theih ka inbeisei cheu thin te kha mi tam tak ngaih ah chuan thil atthlak tak te pawh ani thei ta ve ang. Mahse khuanu hian kan intawn leh nan hian rem a ruat lo te pawh ani mahna, chung ka beiseina kawngbo te chuan min thamral san leh si thin. Zachary ka tawn atang erawh chuan thil a danglam ve tan ta ani. Master degree ka zir laia intawng kan ni a. Kan inhriat tirh atangin kan inngaina nghal em em a. Ama bula ka awm chang chuan Jonah avanga ka rilru vakvai leh na te pawh ka theihnghilh hial thin. Chhungkaw hung leh zahawm tak atanga seilian anih angin a nungchang a mawi in belhchian a dawl em em a. Ka tan lek phei chuan innghahna tlak ani takzet thin in, ka famkim tawk lohna te thleng in min phuhruk zo vek mai hi ani ngawt thin a. Tin, chubakah Jonah ka theihnghilh theih loh zia hi a hre bawk. Mahse chung ka harsatna te chu vuivai pui mai lova min hmangaih lehzual nan a hmang thin te kha ka tan chuan a hlu in, mi tha anih zia kha a tilang chiang thin ngawt zawk mai. Ani ka tawng hi vannei hle in ka inhre thin. Jonah pawh tunah chuan ka theihnghilh ta viau a. Thil awm reng reng lo beisei a indawm kun reng chu thil sawt lo ah ngai in, Zachary nena nun thar bul tan chu ka thlang zawk ta ani. Chubakah harsatna ka tawh apianga min phatsan ngailo Zachary ka neih tak avangin ka thla a muang em em a. Min siamtu Pathian leh Zachary tana nun chu ka damchhan niin ka hre ta bawk. Mahse beisei loh tak mai a Jonah ka tawng leh ta si hian min tibuai ta takzet ani tih chu phat rual ani lo. Zachary nena nun thar din tura duhthlanna ka lo siamfel tawh erawh chu engvang mahin ka ti danglam tur ani lo tih erawh chu ka hria. Jonah chu beiseina thamral tawh mai ani a, ka tan chuan ani chu duhthlanna thar ka siam fel rual khan phumin a awm tawh kha ani si a. Chubakah, kum 10 lai a liam tawh avangin ani chuan hmangaih dang pawh alo nei tawh in, tu emaw tan chuan then rual loh, damchhung kawppui tura thlan fel tawh te pawh alo ni tawh maithei si a. A tan chuan khang hriatrengna te pawh kha hun kal tawh a thil thleng tam tak zing ami, hun in a liampui daih tawh te pawh alo ni lek thei bawk. Chuvang chuan beiseina atthlak tak nei chunga intibuai mai ka ni ve thei bawk ani tiin ka ngaihtuah a. Kar hnih chhung zet chu Krismas hmanna tura Biak In cheimawi te, mirethei te puala thawhlawm khawnna ah te leh zaipawl hla rem na ah te Kohhran ho zingah ka tel ve zel a. Hunawl hnawhkhahna tehchawk anih bawk avangin ka tan chuan a hlimawm hle zel mai. Mahse chumi chhung zawng chuan Jonah chu ka hmu ta reng reng lo. Kawtthler a coffee dawr leh intihhlimna hmun chi hrang hrang ah te chuan thalai te leh naupangte, nu leh pa te chen in an bawr thei hle na a, ka han vah vel chiam pawn Jonah hmel reng reng ka hmu ngai hauh lo. He khua hi khaw lian tak ani a, rampawn lam atanga sumdawng te leh hmun hrang hrang atanga lokal khawm khualzin ten kumtluana an chiahpiah reng khua ani a. A khaw mi cheng nghet pangngai chu tlem te chauh an ni. Jonah te chhungkua pawh kha an cheng reilo hle a, an veng leh kan veng kha a inhlat em avangin an in awmna lai tak pawh ka hriat hman hma in kan chhungkua kha khawpui lamah kan pem ta si a. Tun thleng hian khawilai kawtthler ah nge an in hmun chu a awm tih ka hre ta miah lo ani. Krismas a ral a, Kumthar in a zui leh ta bawk. Ka thian hlui, hmundanga lehkha zir, hemi khua a chawlh rawn hmang ve te nen kan inhawrkhawm a, pawl a insiamin damdawi in leh mirethei veng te kan tlawh kual a. Thilpek te sem in Biak In kan tifai bawk a. Hun chu hriatloh karin a ral duak duak mai. Hun reilote nia ka hriat chhungin ka haw hun pawh alo thleng ta reng mai ani. Hotel khualchhawn in bus station thleng min va thlah a. Ka thian hlui te hnen atanga ka thilpek dawn zozai chuan min ti bungbawr hle nghe nghe a, ka dinna hmunah chuan an bawr luih mai a. Khualchhawn in min hawsan hnu chuan bus nghahna thutthleng ah chuan keimah in ka thu ran a. Vawikhatmah Jonah hmu tawh lo a ka haw tur chu ka ngaihtuah in ngaihthatlohna chuan min rawn luhchilh leh ta tlat mai. Ka han hawi kual a, khualzin leh thilzuar ho chu a lum thei ang bera inthuamin an zi nuai nuai a. Bus pahnih chu a rawn thleng tawh a. Mahse ka chuanna tur tak erawh chu min hrilh dan in minute 20 hnu velah chuan rawn thleng tawh tur ani. Chutih lai chuan nula pahnih, hmanhmawh em em a ka awmna lam pana rawn kal chu ka va hmu a. Damdawi ni awm tak keng in mipui zi nuai nuai karah chuan an rawn inzep phei tawlh tawlh a. Ka piah deuh an rawn thlen chuan an titi mawlh mawlh chu ka hre phak a. Anmahni pawh chu nurse inthuamin an inthuam ani tih ka va hmu ta a. “Kha damdawi kha chu kum khat chhung a ring tawh alawm. A taksa ah awmzia a nei tawh loh vangin hei hian an ti sang alawm.” “Doctor pawn hei bak hi chuan a tisang tawh in ka ring lo. Thla khat bak an beisei tawh si lova.“ “A pa Doctor ngei pawh hian beiseina sang tak nen ala thlah liam nge nge dawn anih hmel hi. A va han lainatawm tehlul em!” “Tlangval hmakhaw eng tak ani asin mawle….” Thawklehkhatah ka bing ta mup mup a. A pa doctor maw? Aw Lalpa! Jonah pa kha doctor lar tak ani thin. Ka tho thuta, chu nula pahnih min kalpel fe tawh te chu ka va um ta vak mai a. An hma ah chuan ding in “Khawngaihin……kha damdawi kha tu ta tur nge min hrilh thei ang em?”ka va ti ta ngawt a. Nula pakhat zawk chuan mak tih hmel fe hian, “Miss, hei hi chu mimal thil ani a, kan hrilh thei lovang che.” ati ta tlat a . “Nilo. Ka hriat ngei a tul ani! A chhan chu….a chhan chu….ka thian hlui pakhat in a hmang ngei niin ka hria a. Amah chu ka hmuh a tul ani.” ka ti ta ngawt a. An han in melh ren rawn a. Pakhat zawk chuan “Jonah Ardnelias” ati ta a. “A address min hrilh thei em?” ka tih pawh chu ka khek chiam hi ani ber tawh zawkin ka hria. Anni pawh chuan ka tana a pawimawh zia chu an hrethiam ta ani chek ang chu, hmanhmawh takin min hrilh ta zung zung a. Ka chuanna tur bus lo thleng chiah chu ka hma ah a rawn ding a. Mi te chu an thutna tifel in an in singsa huai huai tih chu ka va hmu a. Enge ka la tih reng le? Ka awmna leh a chhehvel chu vir muai muai hian ka hria a. Enge ka tih pawh ka hriat hma chuan ka thawmhnaw te chu kalpelin ka tlan ta vak mai ani. Jonah chu natna engemaw khirh tak vangin a boral mek! Chu thu ringawt chu ka lu ah chuan a thum nawn tluk tluk a. Ka tah loh nana ka insum nasat avang leh ka thinphu rang lutuk avang chuan ka thaw a chham lek lek hial a. Jonah, i la kal thei lovang! I hnenah hian sawi duh tam tak ka la nei asin. I kal dawn lo! An luhka ah chuan ka bawkvak thleng hi ani hrim mai. Ka thawm ah chuan tuemaw hi min dawngsawng turin hmanhmawh takin alo chhuak a. “Hlauthawng suh, bawihi. Hlauthawng suh.“ Ka han en chuan Jonah nu chuan duat takin min lo chul a. “Mrs. Ardnelias!” tiin ka tap ta chiam a. Jonah nu hian middle skul ka kal laiin tlai ban ah kan skul auditorium ah khan naupang dang te nen tution min pe thin a, naupang zakzum tak ka nih thin avangin min duat thin hle ani. A hmel chu ka han en a, alo upa ve ta in a fapa vanga a lungngaihna chuan a ti lang upa lehzual in a hriat a. “Ka fanu, i lungngaihna ka hria e. Hawh teh, i lut ang hmiang” tiin min kai a. “Mrs.Ardnelias, khawnge Jonah? Engtin nge a awm?” “Lokal la, nangmah ngei in i be dawn nia.” “Mrs.Ardnelias…..” A ding a. A mita mittui tling pam chung chuan min hrilh ta ani. Jonah chuan kum khat leh a chanve kal ta atang khan thisen cancer alo nei tawh a. Hmun hrang hrang ah treatment tha nia doctor in a sawi ang zawng zawng chu a la kim vek tawh a, a nunna pawh sei nana an tih theih zawng zawng chu an ti zo tawh. Kar hmasa lawk khan a tlu thut a, hmanhmawh baklengin hmunpui lamah an phur thla a. Alo haw leh chuan eng beiseina mah a rawn hawn tel ta lo ani. Ka chil ka lem khawlh a. Ka dang chu a ro hulh hulh bawk. “Engvanga helai hmuna rawn let leh nge a nih? In in leh lo ah a chawl hahdam thei zawk awm si a.” tiin ka zawt a. “Helai hmunah hian a beiseina zawng zawng kawltu a awm niin a sawi a. In lama enkawl kan tum pawn a duh tlat lo ani.” “Beiseina kawltu a?” “Miss , i chanchin hi ka ngaithla ngun khawp asin.” Ani chu ka melh reng ringawt a. “A nat tantirh atang khan i hming hi a lam ngun zual a. Mahse thawnthu ang maia a sawi thin avangin eng a tihna nge kan hre ngailo. A pa chuan rampawna a awm laia a nula tawn chanchin niin a ngai a. Kei erawh chuan i naupan laia ka hriat che avangin nangmah i nih rinna lian tak ka nei thin. Chu ka rinna chu kan in lam pana tap chunga i rawn tlan lai tukverh atanga ka lo hmuh che khan a dik ngei ani tih ka hre ta ani.” Ka thaw chu a chham mai ang tih ka hlauh avangin ka han thaw huai a. “Engtia rei nge a la daih ang, Mrs.Ardnelias?” A nu chuan tahchhuak insum ngawih ngawih chungin “A rei ber ah thla khat bak beiseina a awm tawh love” ati a. Room chhungah chuan Doctor chuan Jonah-a pa hnenah chuan lehkha eng eng emaw hi alo pe mek a. Nichina nurse pahnih ka hmuh te pawh kha room kilah chuan an lo ding ran a. Midang lo awm ve te chu kalpelin Jonah khum lam chu ka va pan nghal ruak a. “Jonah…..ka……” “Ka hria alawm, Eva.” A mitmeng fiah tak chuan min hmu tlang vek ni mai hian ka hria a. A hmel dawldang tak chu ka han en a, a nu thusawi kha a dik ngei ani tih ka pawm ta thlap ani. Rei tak daih thei hmel reng a pu tawh lo. Hmanni lawka tlang chhipa ka hmuh Jonah ngei kha ani ang tih rin harsa khawpin alo tlahniam tawh a. A mitmeng erawh chu mak tak mai in a nung sarh mai a, ka lak atangin a mit chu a la sawn reng reng lo bawk. Midang lo awm ve te chuan kan boruak tawn mek chu hrethiam in an inthiarfihlim ta sap sap hlawm a. Kan pahnih chauh chuan kan inmelh dun ta ran mai ani. “Jonah……ka……i damlo tih ka hre ve chiah a.” “I hriat veleh i rawn tlan vang vang ani tiraw?” “Aw.” “Engatinge?” “Ka……i….nangmah hmu leh miah lo che a haw kha ka ngaingam ngang lo atin ni.” Kan ngawi dun ta reng a. “Engatinge lehkha pawh min rawn thawn ngai miah loh?” kan ti rual ta thawt a. Makti deuh takin kan han in en he haw a. Kan han nui leh rih a. Chutah ka kut chu nghet takin a rawn vuan a. “Vawiin ni hi kum 10 kal ta chhung khan nitin alo thlen beiseiin ka nghak thin asin, Eva.” Ka mittui rawn hnam tiam tiam chu hmuin a kutin a hru fai a. “Hman ni a khatiang chiaha i tah khan maw Eva, ka thinlung chhungril chu lawmin a puakkeh asin.” “Jonah…..” “A chhan chu i mittui khan ka tana i hmangaihna la nung reng kha a puanchhuah sak che ani.” Ka la ngawih tak reng avang chuan a inbengkang a, ka kut chu a awm ah dah in “Eng chu nge min hrilh ve dawn, Eva?” ati a. “Misualpa!” “Ka sual maw? Eng………..” “Kum 10 chhung khan khawnge i awm daih a? Engatinge mi aa ang maia bo min zawntir char char? Vawikhat tal pawh lehkha min thawn thei miah lo maw? Guantanamo Bay ah em ni lehkha i zir a?” “Hei min hmu ta alawm, ni lawm ni?” “Ka haw tan dawn tlat che in ka hria.” A hmel ah chuan nui hmel a rawn lang a. “He khua hi vawi engzat nge i awmna chin zawta ka han phone i hria em? An real estate manager hian in chhungkaw ram hralh leh lei na hmun chungchang zawta ka phone ngun lutuk avangin vawikhat phei chu hming min phuahsak a, ‘Juliet Bo Zawngtu Romeo-a’ tiin. Chu pa chu nikum hmasa khan a boral tawh nghe nghe a. Mahse ani pawh khan in ram hralhna record alo neih miau loh avangin min pui thei ta chuanglo ani.” “Ka pa khan a ram hralhna kha ka patea kutah a dah alawm. Real Estate ho in an khawih lo hrim hrim a.” “Chung chu kha hmeichhe naupang kum 14 mi khan an pem dawn khan min hrilh nachang a hre biklo ani mahna.” Amah chu ka han melh vak ringawt a. “Kum 10 chhung khan eng thil zozai nge thleng i hria em?” ka han ti leh ngawt a. “Hria e, pasal i nei dawn.” “Chu chu engtin nge awlsam takin i sawi theih zawk?” “Hmangaih ber nei reng chunga midang tuemaw nena damchhung thutiam dun chu thil theih anilo tih i hriatchhuah tawh vangin mawle.” “Eng a? Chu chu engtin nge i sawi mai theih?” A nui ta hawk a. “Eva, i la danglam lo. I danglam thei miah lo. I duhawm lehzual tih mai chauh ani. Hmanni a kan inhmuh khan i mitmeng khan thil engkim min hrilh asin. Ka hria che alawm, ka hrechiang lutuk tlat che. I hmui in ‘aih’ ti mahse i mitmeng mawi ka tih tawp theih loh hian thudik min hrilh ziah thin. “ “Anih leh heti hian, ka hriat miah loha dam loh hi nuam i ti viau em ni a? He khua ah hian ka awm ve tih i hre reng a. Ka thlenna hotel lah i hria a……”ka tih lai tak chuan “I thiante in lamah chuan i insawn ta em?” alo ti khauh a. “Jonah….khami ni khan dawt ka hrilh che ani.” “Ka hria alawm. Khawiah mah i riak chhuak dawn lo tih leh min hnar nan i sawi mai ani tih pawh ka hria asin. Chuvang chuan ani nangmah ngeiin min rawn zawnchhuah hun ka lo nghah tawp ni.” Ka mit ah tak chuan rawn en in “Helai ah hian, ka khum bulah hian rawn kalin, ‘Jonah, ka kalsan tawh ngai lovang che’ ila rawn ti ngei dawn ani tih hi ka hria asin. Chumi hun lo thleng tur chu nitin ka lo thlir reng thin.” ati a. Ka nui hak a, a kut chu la in ka fawp a. Ani chuan a bulah chuan min muttir a, ka sam, ka tlan nasat avanga thur chhap mai chu a chul mam hliau a. Ka thinlung chu sawi hleihtheih loh in a hlim ani. “Nula tak tak ilo ni ve tawh. Tleirawl biangtai deuh, zahzum vanga biang sen tan tan thin kha nula nalh tak, hmeltha deuh alo ni ve ta a…….” Ka nui hak a, amah chu nghet taka pawmin “Mipa naupang Jonah bula ka kal thin lai khan tuna tlangval hmeltha leh lian deuh ka pawm mek ang tiat hi ani ang tih ka lo ring ngailo.” ka han ti ve ngat a. Ani chuan ka sam chu tham khawmin ka chal ah chuan a hmui a rawn nghat zauh a, a nui ta hawk hawk a. Jonah bulah chuan mi famkim ka lo ni leh ta. Amah in a che tha thei tawh lova, wheelchair a thu chungin khawvela a hun tlem te la neih chu a hmang tan a. Nitin a kiangah awmin ka enkawl a. A nuam tih ber chu lehkhabu chhiar ala ni reng a. A mit khaw hmuh a that tawh loh hnu ah phei chuan ka chhiar sak ta ziah ani. Kan inhmuhna tlang ah khan a wheelchair nen ka kalpui a. Ni tla tur apiang thlir liamin, kan fate hming tur kan phuah a. “Mipa kan nei hmasa ang a, a pa ang chiaha thluak tha, doctor ani ve ang.” ka ti a. Ani chuan “Hmeichhia zawk chu a nu ang maia hmeltha leh nungchang mawi…..Mipa hming chu Tristan ani ang a, i duhzawng ani em Eva?” “Mmmmm……hmeichhia chu….mmmm” “Adreanna.” “Phuah vek i tum bik a!” Kan inhmuh loh kara kan nuna thil thleng zawng zawng leh kan mi tawn te chanchin kan inhrilh fai leng a. A awmna ram chanchin a sawi apiangin min hmuhchhuah leh huna min pek atana a thilpek leikhawm zinga pakhat tal a phawrhchhuak ziah a, ka hma ah thingthi in mi pe thin. A nu leh pa te chuan ka lakah rinna an nghat thui em em a. Amah enkawl hna chu ka kutah an dah tawp a, an thla a muang em em ani. Kar khat hnu a rawn kir leh turin kan pahnih chauh chuan an cabin ah chuan hun thawl zawk kan neih dun theih beiseiin min kalsan ta nghe nghe a. Zan khat chu a khum bula pawhdawh te takte chu min hawn tir a. A chhunga bawm te reuhte, a hlui tawh avanga a thing pawh dum hliau tawh chu min lakchhuahtir a. “Eva, kha kha enge a nih i hria em?” “Tlereuh bawm a ang hle mai.” “Kum 6 chhung chu kha bawm kha ka kawl tawh asin. Zantin ka mut dawn apiangin a neitu diktak hnena thlentir turin Pathian hnenah ka dil thin a. “ “Tu ta nge ni a?” “Nangmah.” “Keimah maw? Hetiang bawm hi ka nei ngai reng reng lo.” A wheelchair ata chu harsa ti takin a thova, keichuan ka lo pui vat a. Bawm chu la in a han hawng a. A chhungah chuan rangkachak zungbun kual, ngunthluk taka hruk fai thin tih hriat taka tle mawi zet mai hi alo awm a. Ani chu ka hma ah chuan thingthi in, “Zanin ah hian ka tawngtaina chu Pathian chuan a chhang ta ani, Eva. A neitu diktak hnenah chuan ka pe kir leh dawn ta. Eva, min nei duh ang em?” ati ta a. Chumi zan atang chuan ka Jonah nupui hual ka lo ni ta. Ka kuta chu zungbun, kum tam tak rinawm taka min lo nghak fan fan tu ka han en chuan ka la suangtuah phak ngai loh hlimna chuan min tuam vel a. Chu hlimna chuan ka damchhung zawngin min kalsan tawh dawn lo ani tih pawh chiang takin ka hre bawk ani. Ka taksa chu chau in rimtawng hle thin mahse Jonah hmel ka en apiangin nitin chakna thar ka hmuhbelh zel thin. Ni 16 ka enkawl hnu chuan a natna chuan a sam dum hlap, nem tak mai chu a suat tan a. A taksa chu hmuh theih in a pan tial tial bawk. Mahse englai pawn hlim hmel pu takin amah lainata rawn kan tu te zawng zawng chu chibai alo buk ziah peih thung ani. Ni khat chu a lehkhabu ngainat ber ka chhiarsak lai chuan ka kut a rawn chelh a. “Eva, van ah kan inhmuh leh i ring em?” Mak ti in ka phu zawk a. A chhan chu thihna leh a natna chungchang hi vawikhatmah kan la sawi chhuak dun ngai miah lo ani. Bakah ka thinlung hian rei min dampui dawn lo tih chu chiang takin hre mahse ka pawm theih thlawt loh vang te pawh aniang, min kalsan tur hian ka dawn phal lo reng reng a. Ka lehkhabu ken lai chu khupin a bulah chuan ka mu ve a. “Pathian in inhmangaih te tan van ah in a buatsaih a. Kan pahnih tan pawh, Jonah.” “Pathian hnenah ka kiang ah van a i awm ve theih nan ka dil sak dawn che ani, Eva. Ani chuan kan inhmangaih hi A phal si a.” “Jonah, sawi tawh suh, khawngaih in.” “Ngaithla rawh, Eva. Kum 10 chhung khan nitin kan inhmuh leh nan ka tawngtai thin a. Ka natna ka hriatchhuah in van ah kan pahnih tan hmun ka dil bawk a. Ka tawngtaina hmasa zawk chu chhan in a awm tawh a. A hnuhnung zawk pawh chhan in a awm leh ngei ang.” Ka tap ta zawih zawih a. Ani erawh chuan nghet taka min pawmin van lam a en tlat thung. Hun te a ral zel a. Hunpui hmang khualzin veivak thawm pawh a reh tan ta a. Khawvel dan pangngai in mihring te pawh khawsak rel leh hmakhaw thlir in an buai leh tan ta. Kei leh Jonah te khawvel erawh a zim tial tial thung. Pathian in Jonah tana A hun ruat lo thlen ni chuan ka tan pawh hun inher chu a tawp ve ta. Thlamuang takin, nghet taka ka kut chelh chungin, thlasik zing ni chhuak hnuhnung ber rualin ka Jonah chuan min kalsan ta ani. A hmui dang lep ah chuan dimte in ka fawp a. “Ka hmangaih reng fo ang che, Jonah.” Damdawi in khum nuamlo zet ah ka harh chhuak a. Ka chauh rimtawng vang leh rilru chau vangin ni thum zet ka awm alo ni a. Ka chhungten a tukah chuan in lama enkawl zui turin min la chhuak nghal a. Vawiin hi Jonah thih cham vawi nga na ani. A thlanlung a thu inziak te chu a tawp nan ka chhiar nawn leh a. Ka rose par ken lai chu a chungah dah in, ka inher a. Chu hmun chu hawi let tawh lovin ka chhuahsan ta a. Tunah chuan khawvel hi keimah a hmachhawn turin ka inpeih ta. Kumkhua in Jonah hmangaihna chuan min chenchilh reng tawh ang; van ah a kianga ka awmna tur hmun ka thlen thleng in.
Posted on: Fri, 15 Nov 2013 15:02:41 +0000
Trending Topics
Recently Viewed Topics
© 2015