India Republic Day vawi 66-na pual : ‘INDIAN’ TIH HI ENG TIN NGE I NGAIH? Thuhmahruai : Kan hriat angin India ram hi August 15, 1947-ah British rorêlna hnuai ațanga indangin, Indian Independence Act 1947 hmangin ram zalên, indepenpence ram kan ni a. Kan ram dân Constitution of India pawh November 26, 1949 khan passed a ni a; Indian National Congress-in January 26, 1930-a Declaration of Indian Independence an puan nî pualin January 26, 1950 chu kan dân hman țan nî atâna hmangin, mahnia ro inrêl ram, Independent Republic kan lo ni ta a ni. India Republic Day lawmna pui ber chu New Delhi-ah neih a ni țhîn tih pawh kan hre țheuh bawk a, kum 1950-1954 chhûng kha chuan hmun lî (Irwin Stadium, Kingway, Red Fort leh Ramila Grounds)-ah hman a ni a; kum 1955 ațang khân Rajpath-ah hman a ni ta a, a lawmna hun hman hmasak ber kum 1950 ațang khân mikhual pawimawh atân khawvêl ram dang hruaitu lû ber sâwm an ni țhîn a ni. Ram hrang hrang 39 hruaitu lûten India Republic Day lawmna hi min rawn hmanpui tawh a; Indonesia President Sukarno chu kan mikhual hmasa ber a ni a, ram țhenkhat hruaitûte phei chu vawi hnih vawi thum sâwm nawn an ni nghe nghe bawk. Kum 2015-a 66th India Republic Day-ah hian Republic Day puala ram dang hruaitu lû kan mikhual 40-na atân, kan hriat țheuh angin USA President Barrack Obama chuan min rawn thlen chilh a, tûn țum hi Republic Day-a USA hruaitu kan mikhual vawi khatna a ni nghe nghe a; hetiang hun pawimawh hi Pu Obama hian ram dangah a la hmang ngai lo niin an sawi a, India ram tân pawh thil thleng lâwmawm tak a ni kan ti thei ang chu! Aw le, chanchin thar lam buaipuitûte hnên ațangin kum 2015 India Republic Day denchhena thil thleng pawimawh leh chanchin thar ngaihnawm tak tak kan hre tawhin kan la hriat belh zêl tûrah ngai ila; keini chuan “India Republic Day vawi 66-na pualin zawhna holam angreng tak leh pawimawh fû si, Mizo tam tak rilrua chiang lo ruai leh chiang lo lui țhîn nia hriat, ‘INDIAN’ TIH HI ENG TIN NGE I NGAIH? tih thu hi i han khel ho zui ve zuai teh ang. Mi țhenkhat chuan, “Vaiho,” an ti ang a, a țhen chuan India Constitution te sawi kaiin, a țhen chuan politics thil deuhin hnam bil la runin Mizo Nationalism/Mizo Culture leh Indian tih chu thil hrangah an ngai mai thei a; mahse, eng hnam leh tû culture hi nge Indian ni bîk chu le âw, tih erawh chu ngaihtuahna zau zâwka chhût a ngai ve khawp mai! Indian chungchâng hi politics thila ngaihtuaha mahni hnam leh culture bil thil châwi vâwng țhîn hi India ram hmun hrang hrangah an awm ve reng a; amaherawhchu, hei hi Pu Gandhi-a te, Pu Nehru-a te hlauh ber kha a ni thung a, chu chu India Republic Day a lo thlen hian i ngaihtuah thar teh ang u tih hi he huangah hian ka rawn châwi lût (share) a ni! A chhan chu, kan duh emaw, kan duh lo emaw pawh ni se, kan ni lo hialah pawh inngai mah ila, INDIAN chu kan ni tho tho mai si a! Kum 1989 vêl daih tawhah khân kan țhianpâte pahnih chu India leh Pakistan inkâr chungchângah an inhnial vak mai a; pakhatin Pakistan a țan rum rût a, pakhat leh chuan mei kawhin India a țan thung a, an inbakkaih lo chauh hial zuk nia! Politics thil taka mîte thlîr dân leh mi mal ngaih dân hi chu enga pawh ni se, uangpui chang lo ila, kei chu ka fahrin ngei India ram ropui tak aiawh meuha khawvêl ram danga vawi thum zet a feh chhuah ve tawh hnuah phei hi chuan, ka Mizo rum rût tluk dâwn thâwthângin ka Indian vet vet zual sauh nghe nghe mai asin! Mizo Nationalism leh Mizo Culture te hi kan phâk tâwk chuan kan chîk ve țhîn țheuhin ka ring a; tin, Mizo hnam leh Mizo culture pawh humhalhin kan humhim tûr a ni ngei mai. Mahse, hetiang a nih avânga ngaih dân zim tak nei a, ‘thliarkâr rilru’ an tih ang la put reng mai leh a eng amah hmâa kan Indian-puite huatna thinlung put ûl ringawt mai te hi, India rama lehkha thiam tamna State-a Mizo rilru put hmang ni turin kan Indian-puiho hian an beisei ka ring lo rilru ru țhîn a ni. Sakhaw chungchâng thu-ah pawh kan Indian-puiho chu ‘milem sakhaw bia’ tiin kan diriam ti tih deuh roh zâwk nghe nghe ni hian a hriat a; mahse, chutianga kan elsên țhin Hindu kulmûk pui pui rorêlna hnuaia an sum ûma intlânsiakin, kristian tiha mawi leh mawi lo pawh kan thlu hek lo lawi a. Indian thinlung kan pu thei lo a nih lek phei chuan, enga ti nge kan ram leilung hausaknaa innghat a, kan kut kawih ngeia din chhuah tuma taima taka hna kan thawh mai zâwk si loh le? India sum leh pai alo thlâwna hmuh theihna leh thawk loa ei hmuh dân dapin kan âtchilh a, vawi leh khata hausak thutna tûr thleng pawhin pawisak kan nei hek lo. Kan State țhenawm hnaiah mai pawh lei hnuai lam hausakna oil te an thâl hiau hiau tawh laiin, oil lipui chunga awm inti si leh inla chungnung deuh larha Lalpa zawn chhuah ram inti hial si hi, kan oil lipui chu eng vânga a laih pawh kan la laih pawh ve theih der loh mai le? “Tih nuam leh thuâwih taka in awm chuan in rama thil țhâte in ei ang.” INDIAN zinga Indian nâwi ber kan ni reng palh ang e! India Republic Day vawi 66-na a lo thlen hian, INDIAN tih hi eng tin nge i ngaih ve le? INDIA RAM PRESIDENT-TE LEH AN HUN CHHÛNG 1. Rajendra Prasad (1884–1963) = 26 January 1950 - 13 May 1962 2. Sarvepalli Radhakrishnan (1888–1975) = 13 May 1962 - 13 May 1967 3. Zakir Hussain (1897–1969) = 13 May 1967 - 3 May 1969 4. Varahagiri Venkata Giri (1894–1980) = 3 May 1969 - 20 July 1969 (Acting) 5. Justice Muhammad Hidayatullah (1905–1992) = 20 July 1969 - 24 August 1969 (Acting) 6. Varahagiri Venkata Giri (1894–1980) = 24 August 1969 - 24 August 1974 7. Fakhruddin Ali Ahmed (1905–1977) = 24 August 1974 - 11 February 1977 8. Basappa Danappa Jatti (1912–2002) = 11 February 1977 - 25 July 1977 (Acting) 9. Neelam Sanjiva Reddy (1913–1996) = 25 July 1977 - 25 July 1982 10. Giani Zail Singh (1916–1994) = 25 July 1982 - 25 July 1987 11. Ramaswamy Venkataraman (1910–2009) = 25 July 1987 - 25 July 1992 12. Shankar Dayal Sharma (1918–1999) = 25 July 1992 - 25 July 1997 13. Kocheril Raman Narayanan (1920–2005) = 25 July 1997 - 25 July 2002 14. A. P. J. Abdul Kalam (1931–Alive ) = 25 July 2002 - 25 July 2007 15. Pratibha Patil (1934– Alive ) = 25 July 2007 - 25 July 2012 16. Pranab Mukherjee (1935– Alive) = 25 July 2012 – till date India Republic Day lawmnaa ram dang hruaitu luin min rawn hmanpui tawhtu ram hming :- Indonesia, Bhutan, Pakistan, China, Soviet Union/Russia, United Kingdom, Cambodia, Yugoslavia, Bulgaria, Tanzania, Mauritius, Zaire, Sri Lanka, Zambia, France, Poland, Ireland, Australia, Mexico, Spain, Nigeria, Argentina, Greece, Peru, Vietnam, Maldives, Portugal, Singapore, South Africa, Brazil, Trinidad & Tobago, Nepal, Algeria, Iran, Saudi Arabia, Kazakhstan, South Korea, Thailand, Japan leh USA (2015). Pic : India Republic Day 1950 parade
Posted on: Mon, 26 Jan 2015 05:07:33 +0000
Trending Topics
Recently Viewed Topics
© 2015