Isolezwe (28 December 2013) @ page9 Isihloko: Omaskandi abaliboni elidlalayo Ngubani iGcokama elisha? >NguMthandeni Sbusiso Manqele ozalelwe esigodini saseMfanelukubukwa endaweni yaseMdletsheni eHluhluwe ngo April 24 1988. >Uyingane yesithupha ebantwaneni abayisikhombisa bakaMnuz Jahnson Manqele no Bekwaphi uMaShandu. >Ufunde eMfanela Primary wadlulela eNtaminemidwa High ngaphambi kukuphothula uGrade12 eMakhumbuza High eMlazi ngo 2005. > Usagobe amadlangala eVosloorus, ikhona intokazi ahlekisana nayo okunguMlondo Nxele. Umlando wakhe emculweni. >Liqale ngokwenza idemo eyayinengoma eyaduma kakhulu emafonini eyayithi Kancane Nkosazane abaningi babezitshela ukuthi iculwa nguMgqumeni. >Ukhiphe ialbum yokuqala enguMthandeni ethi Ukhalo Lakho ngo 2012. >Ulandelise ngeshisa izikhotha esezibiza ngeGcokama Elisha ethi Sibiza Abadlwane, okuyicwecwe eligabe ngenoni elithi Ukhandashisa, Ungisholo Kahle, Sibiza Abadlwane nelithi Ushuni Wenkani. >I Album kaMthandeni izophuma ngePhasika. UCharles Khuzwayo (C) uxoxe naye uMthandeni Igcokama Elisha Manqele (M) C : Yini uzibiza ngeGcokama Elisha? M : Leligama ngiliqanjwe ngabantu ngenxa yokuthi ngiyinsizwa ezithandayo. Okwamanje akakabi bikho umculi kamaskandi ozithanda njengami nogqoka izimpahla ezibizayo njengami. Ngiyazi abanye bazofuna ukungifaka embangweni kaMgqumeni kanti mina angihlangene nawo. Baningi abaculi akade bezibiza ngamagcokama okungoBhekumuzi Luthuli noMahawukela Mseleku obaziwa ngeleGcokama lakwaMseleku. Mina ngiyiGcokama lakwaManqele. C : Uqonde ukuthini ngalengoma yakho ethi Ushuni Wenkani? M : Ngiqonde ukuthi yimina kuphela odlala loshuni kaMgqumeni ngendlela hhayi bonke abantu laba asebezibiza ngongqongqoshe balo shuni. C : Yini sengathi kukhona abaculi abathile obagudlayo ngalengoma njengoba ubala amachalaha nemidlwane okuyiziteketiso zoMjikijelwa noDlubheke. M : Angiqondile bona kodwa ngisho nanoma ngubani nje osezitshela ukuthi uyena ungqo waloshuni. Abanye balabo baculi ngike ngahlangana nabo bavele bachobozele nje okwentombi ibona isoka. C : Yini eyake yakuphatha kabi selokhu wazalwa? M : Yingesikhathi ubaba omncane engishayela izimbuzi ezazidla umbila. Ngangisemncane kabi ukuthi ngangingaqonda ukuthi izimbuzi akumele zidle umbila. C : Yini ke eyake yakuhlambalaza emphakathini? M : Ayikho ngoba ngiyinsizwa ezithandayo igcokama elingahlalwa wuthuli. C : Iyiphi impahla yokugqoka oyikhonzile? M : Yizingubo ezibizayo ngoba yonke impahla ebizayo ibuzwa kimina njenge label ye Le Coq Sportif, DMD, Quick Silver, Aca Joe namanye. Engikuthanda kakhulu nge DMD ukuthi ingikhumbuza iqhawe lami iBhova LikaDikadika. Yingakho ngithi nanoma ngubani ofuna ukudlala loshuni wenkani kuzomele ahambe ezinyathelweni zeBhova ngangokugqoka kahle. Okwamanje kuseyimi kuphela osagqoka njengeDlamanzi uMgqumeni. C : Uma ungekho matasatasa nomsebenzi womculo usichitha ngani isizungu? M : Ngivamise ukuzikhiphela eCenturion Mall naseMaponya Mall ngenhloso yokushaywa umoya kanti kwesinye isikhathi ngike ngivakashele ehostela lapho kuhlala khona abantu bangakithi. C : Yikuphi ukudla okukhonzile? M : Ipapa nenyama kanye nanoma yikuphi ukudla kwesintu. C : Yiliphi iqembu lebhola olilandelayo? M : I Orlando Pirates selokhu ngazalwa ngiyiBhakabhaka nje elimnyama ngenkani. C : Yisiphi isiphuzo oqeda ngaso ukoma? M : Ngivamise ukuphuza amanzi athengwayo noma iCocaCola ngoba ingibhodlisa kahle uma ngidiniwe. Kulomsebenzi womculo ziningi izinto ezingicasulayo. C : Yiluphi uhlobo lomculo olukhonzile? M : Yi R&B ngoba ngiyawuthanda umculo engingawujwayele. C : Yibaphi abaculi obakhonzile? M : Yibhimbi u Ali Mgube ngenxa yokuthi uyazenzela kakwenzayo futhi uyinsizwa. Omunye uKhangelani Mhlongo noMzo Khanyeza boSaziwayo ngoba yibona kuphela abaculi ababesebenza neBhova abangincoma bathi angiyibambe nje kanje.
Posted on: Sun, 25 Jan 2015 05:42:39 +0000
Trending Topics
Recently Viewed Topics
© 2015