Kartel verdict - patois style Buck a gyal from UTech say she a study bizniz. It look like Kartel shudda go buck a girl weh a study law, maybe him wudda get free. Di whole a dung town full a bay synthetic hair people a bawl out Worl Boss name. Worl Boss, you nah come a road fi now but you ratings tall. Di juror dem did mean business, dem never a hitch. Gwaan hold the faith Addi, dem a go appeal fi yuh. Dem a talk bout Teacha sign me and mi gone now, everybody know bout Shawn now ... Shawn Storm mi a pray fi yuh. But you get you wish. Everybody hear bout you. You buss. You gone a lead. All farin media fly dung fi di trial. Right now you intanashinal. Nuff artiste caan gaa farin but your name pass out a airport. What a mix-up inna the courthouse. Dem arrest one a di juror dem fi a try bribe a next one fi free Worl Boss. It nuh look good. But if a true and you are such a big fan of Worl Boss you can go join him inna prison. Mi hear say courthouse ram like any country dance. Mi hear say every media house squeeze up dem body in deh fi hear wha dem a go say bout Worl Boss. Mi hear say when dem say Kartel guilty, the prosecution bawl out YES!! But di police dem bawl out SILENCE and shut up everybody in deh. Tavares-Finson and him hot body son did try dem best but dem did kinda look sad when dem hear say Worl Boss a go tun Jail Boss. Big up Shane Williams who get free. People a say it look like your obeah man tun up loud. Dem say yuh shudda give the rest a di man dem a link to the obeah man. Mi hope dem make yuh fly out and get likkle counseling and ting cuz a long time yuh deh prison. Mi sure you not even memba how road look. Nuh badda glad fi come a road because US dolla a nearly 10 million to one.
Posted on: Fri, 14 Mar 2014 20:10:36 +0000
Trending Topics
Recently Viewed Topics
© 2015