Leksyon alang sa Agosto 17, 2013 Ang ulohan sa atong leksyon, mao kini: Panaghiusa; Ang Bugkos sa Pagpabuhi Ang atong Bersekulong Sag-ulohon atong Makita sa Efeso 4:1-3 “Busa, ako nga binilanggo tungod sa Ginoo, mangamuyo kaninyo nga unta managgawi kamo sa kinabuhi nga takus gayud sa tawag nga alang niini gipanagtawag kamo, nga sa tanang pagpaubos ug kaaghop, dinuyogan sa pailub, kamo mag-inantusay ang usa sa usa diha sa gugma, nga masingkamuton sa pagpatunhay sa espirituhanong panaghiusa pinaagi sa bugkos sa panagdait.” Pasiuna: Ang panaghiusa importante kaayo, Gani si Ginoong Jesus naghimo sa us aka talgsa-on nga pag-ampo alang sa panaghiusa sa iyang mga Disipolo ug sa iyang mga sumosunod. Kita na sayod sa dako nga kahimoan sa panaghiusa, Adunay mga bulohaton nga daw malisod mahimo apan kon adunay panaghiusa sa mga piniyalan sa maong bulohaton ang daw impossible mahimong sayon. Tungod niini atong tun-an ang tumong sa pag-ampo ni Ginoong Jesus, ingon ang mga ehemplo sa panaghiusa. Ato sab tan-awon kon unsa ang mga sangkap sa panaghiusa ug unsaon pagkab-ot ang panaghiusa, diha sa iglesia nga mao ang lawas ni Cristo, ingon man ang panaghiusa sa misyon/katuyoan, mensahe ug organisayon. Atong sugdan ang atong pagtuki diha sa pag-ampo ni Ginoong Jesus. Ang pag –ampo ni Ginoong Jesus atong Makita diha sa Juan 17: 20-23, nga nagkanayon, “"Ug nangamuyo ako dili lamang alang kanila ra, kondili alang usab sa mga mosalig kanako pinaagi sa ilang pulong, aron silang tanan ma-usa; maingon nga ikaw, Amahan, ania kanako ug ako anaa kanimo, aron sila usab mahiusa dinhi Kanato, aron ang kalibutan motoo nga ikaw mao ang nagpadala kanako. Ug gihatagan ko sila sa kadungganan nga imong gihatag kanako aron sila ma-usa, maingon nga kita usa. ako anaa kanila ug ikaw ania kanako, aron sila mamahingpit nga usa, aron ang kalibutan moila nga ikaw mao ang nagpadala kanako ug nahigugma kanila maingon nga ikaw nahigugma kanako.” (Juan 17:20-23) Ngano nga hilabihan man ka mahinungdanon alang kang Jesus nga kita mamahimong usa, ingon nga ang mga kasingkasing usa? Mahimo mo ba ang pagdugtong niini sa pagpabuhi? Aron atong kahatagn sa pagpatin-aw kining maong mga pangutana atong tun-an ang MGA EHEMPLO SA PANAGHIUSA: ANG LAWAS Si apostol Pablo diha sa 1 Cor. 12:12-27 nagkanayon, “Kay maingon nga ang lawas usa ra ug nagabaton ug daghang mga bahin, ug nga kining tanang mga bahina sa lawas, bisan daghan sila, usa ra ka lawas, maingon man usab niana si Cristo.… Kamo mao ang lawas ni Cristo ug ang matag-usa kaninyo bahin niini” Si Sister White nagpayag agi ug pagpatin-aw sa kaimportante sa panaghiusa, matod niya gikan sa manuscript releases, “Ang mga bugkos sa panaghiusa nga nagahugpong sa iglesia sakop ngadto sa sakop mao nga mamahimong ingon ka lig-on ug maduyugon diha sa ilang operasyon ingon sa mga nagkadaiyang bahin sa natural nga lawas. Ang mga kamot, ulo, ug mga tiil sa nunot nahiusa, ug maagaron gayud sa matag usa, nga ang usa nga sakop dili mabuhi ug makalihok nga mag-inusara sa ubang mga sakop” (E.G.W. (Manuscript Releases, t. 19, MR No. 1414, p. 370) Lain nga ehemplo nga atong hatagn sa pagtagad mao ang ehmplo sa panaghiusa mao ang gambalay. Si apostol Pablo diha sa efeso 2:20-21 nag kanayon, “Kamo mga tinukod ibabaw sa patukoranan nga mao ang mga apostoles ug mga profeta, nga niini si Jesu-Cristo mao ang ulohang bato sa pamag-ang. Diha kaniya ang tibuok nga tinukod nausa ug nagatubo ngadto sa pagka-templo nga balaan diha sa Ginoo” Nan ang pangutana mao, Unsaon man nako nga mamahimong usa ka “buhi nga bato” nga nagatabang sa pagtubo sa akong iglesia diha sa panaghiusa? Kon ang panaghiusa importante unsa man ang mga sangkap niini? Una nga sangkap sa panaghiusa mao ang MISYON. Kon mao unsa ang atong misyon? Higala ang misyon sa Iglesia Adventista Del Septimo Dia mao ang pagmantala sa walay kataposang maayong balita ngadto sa tanang katawhan diha sa konteksto sa mga mensahe sa Tulo ka mga Manolunda sa Pinadayag 14:6-12, pagpangulo kanila sa pagdawat ni Jesus ingon nga ilang personal nga Manluluwas ug sa pagpakighiusa sa Iyang iglesia, ug pag-amuma kanila diha sa pagpangandam alang sa Iyang dili-na-dugay nga pagbalik. Kinutlo gikan sa (Opisyal nga deklarasyon sa Iglesia Adventista Del Septimo Dia) Nan unsaon man nato sa pag-ambit niini ingon nga sangkap sa panaghiusa? Ilabina kining usa ka misyon ug usa ka kalab-uton aron kini makatabang diha sa pagpanday sa atong panaghiusa? Igsoon, aron kini atong maambit atong himoon ang misyon nga mao ang pag mensahe. Ang pag mensahe usa sab kasangkap sa panaghiusa. Bisan pa ang misyon sa Iglesia susama ra sukad pa pagsugo ni Jesus niini, ang tino nga mensahe niini, nagausab-usab kini sulod sa kapanahonan, depende sa mga panghitabu. Si Pedro nagsulti mahitungod sa “kamatuoran karon” (2 Ped. 1:21). Alang sa mga taga Waldenses, kadtong “kamatuoran karon” mao ang pagtuon sa Biblia ug pag-ila sa Iglesia Catolica ingon nga Babilonia. Kay si Luther ug ang una nga mga Repormer, ang tinugbaw nga nga kamatuoran mao ang pagpabalaan pinaagi sa pagtoo. Hain ang “kamatuoran karon” alang sa Iglesia Adventista sa Kataposan sa Panahon? Unsaon nato sa maong menshae sa paggiya kanato ngadto sa internal nga panaghiusa? Ingon nga usa ka nahiusa nga Iglesia, angay kita magwali sa mensahe sa: langitnong sanctuary, unsa pa? ang hukom investigatiba, ingon man ang mensahe sa tulo ka mga manulonda. Ang ikatulong sangkap sa panaghiusa mao ang organisasyon. Ang titu 1:3 nag pahayag, “Gibilin ko ikaw sa Creta sa hinungdan nga mao kini, aron sa paghulip sa kakulangan, ug sa pagtudlog mga anciano sa matag-usa ka lungsod sumala sa akong gitugon kanimo” Ang panaghiusa sa Iglesia nagdepende sa organisasyon niini - gikan sa sinugdanan niini. Kon atong sabayon ang organisasyon sa iglesia nga ang mga sumosunod ni Cristo midawat sa nagkalain-laing awtoridad, sama sa: 1. Ang awtoridad sa mga apostoles gidawat (Buhat 1:12-26) 2. Ang awtoridad sa mga diakono gidawat. (Buhat 6:1-7) 3. Sa dihang si Jesus nakighimamat ni Saul, Siya naghatud kaniya ngadto sa organisasyon sa Iglesia (Buhat 9:1-19, 26-31) 4. Ang Iglesia mingdawat sa mga disisyon sa Konselyo sa Jerusalem (Buhat 15:1-31) 5. Ang mga pangulo gidawat nga mga pangulo diha sa lokal nga kaiglesiahan (Buhat 20: 27-32) Maabot ba nato ang panaghiusa kon ang matag magtotoo magabuhat nga dili mosalig sa tagsa-tagsa? Si sister White nag pahayag sa, (Testimonies to Ministers and Gospel Workers, cp. 1, pg. 26-27) Matod niya, “Sa pagsangkap alang sa pag-abiba sa ministeryo, alang sa pagpadayon sa buhat sa bag-ong kaumhan, alang sa pagpanalipod sa kaiglesiahan ug ang ministeryo gikan sa mga sakop, alang sa pagtipig sa mga properdad sa iglesia, alang sa pagpatik sa kamatuoran pinaagi sa pamantalaan, ug alang sa daghan pa nga laing butang, ang organisasyon dili ikabaliwala... Nangita kita sa Ginoo uban ang tim-os nga pangalyupo aron kita makasabot sa Iyang kabubot-on, ug ang kahayag gihatag pinaagi sa Iyang Espiritu aron adunay kahapsay ug ganid nga pagpanton diha sa iglesia—kana nga organisasyon gikinahanglan. Ang sistema ug kahapsay napadayag diha sa tanan nga mga buhat sa Dios sa tibuok uniberso. Ang kahapsay mao ang balaod sa langit, ug kinahanglan mao kini ang balaod sa katawhan sa Dios ibabaw sa yuta... Ayaw tugoti ang ni bisan kinsa sa pag-abi-abi sa hunahuna nga kita makadumala sa organisasyon. Katumbas niini alang kanato ang tumang pagtuon ug daghang mga pag-ampo alang sa kaalam, nga kita mahibalo nga gitubag sa Dios, sa pagpatindog niini nga gambalay. Gitukod na kini pinaagi sa Iyang pagdumala, pinaagi sa tumang sakripisyo ug panagbingkil. Ayaw tugoti ang atong kaigsuonan nga mahisalaag ingon sa pagsuway, sa paglangkat niini, kay ikaw magadala niini diha sa kahimtang sa mga butang nga wala nimo damgoha. Sa ngalan sa atong Ginoo akong giasoy kaninyo nga kini magatindog, pagalig-onon, pagabarogon, ug mapahimutang” Panapos: Kay ang panaghiusa kalab-uton man sa mga sumosunod ni Cristo unsaon man nato pagkab-ot ang panaghiusa? Ang misyon, ang mensahe ug organisasyon mga dili ikabaliwala alang sa panaghiusa sa Iglesia. Bisan pa, ang panaghiusa dili maabot kon wala ang tulo ka mga elemento nga ato nang natun-an: gani kini mao ang, 1. Pag-ampo 2. Pagtuon sa Biblia 2. Pagsaksi Kana mao ang mga gamhanang elemento nga nagalalang, nagaalima, ug nagasangkap sa panaghiusa sa iglesia. Panamilit: Busa, alang kanatong tanan nga mga tumotoo sa Dios atong paninguhaon nga sa atong matag Iglesia atong mabatnan ang talgsaon nga panaghiusa. Kini si pastor Roger T. Lopez manamilit ug moingon, adunay dalan nga daw matarung alang sa usa katawo apan ang utlanan mao ang kamatayon busa likaye ang pagsubay sa maong dalan.
Posted on: Fri, 16 Aug 2013 13:07:59 +0000
Trending Topics
Recently Viewed Topics
© 2015