MAXWELLA’N INDIA LEH CHINA INDO REPORT A TLANGZARH; INDIA-IN CHHIAR THEIH LOH TURIN A BLOCK! 1962 kuma India leh China an indo khan India a tlawm chiangin a mualpho hle a, Nehru-a zak lutuk kha a ţap hial a, a rilru na lutuk kha a hriselna chhiatphah-in 1964 kum khan lung lam ţhatlohna-in a boral phah ta hial a ni.Indonaa India tlawm chhan chhuitu,Lt.General T.B.Henderson Brooks leh Brigadier Premindra Singh Bhagat te ziak, The Henderson Brooks-Bhagat Report an tih mai chu Australia chanchinbu mi,Indo laia British chanchinbu correspondent Delhi- a awm, Neville Maxwell chuan kumin February thla khan a website-ah a tlangzarh a,he report-ah hian India ram venhimna lam atan thil pawimawh tam tak a chuan avangin India sawrkar chuan Maxwell-a website hi India ram atanga chhiar theih loh turin a block( mirrored) ta rih a, Kum 50 kal ta daiha thil thleng ni mah se India sorkar chuan thuruk vawrtawpah ngaiin a la thup(classified) ta zel a ni. AN INDO CHHAN;1950 kum khan China rama communist sorkar chuan Tibet ram a hnehchhuh a, 1959 kum khan an puithiam lal ber Dalai Lama hovin China sorkar lakah an hel a,buaina lian tak chuakin China sorkar chuan sipai chakna hmangin a hmetmit a, Dalai Lama leh a hote India ramah an rawn tlanchhia a, India chuan a lo humhim a ni.China sorkarin India ramri dep, Tibet ramah kawngpui lian tak tak a sial ta chiam a, India-in a sawisel a,India leh China ramri velah sipai inkahna a thleng zauh zauh.India leh China ramri km 3225 zeta thui-ah hian ramri sawi fel theih loh hmun engemawt zat a awm a, Nehru chuan Forward Policy a tih hmangin Aksai Chin rama India ram hauh chin bak China ram chhungah sipai outpost 43 siamin India ramri-a China sipaite supply danchahtir a tum a. Russia ram hruaitu Nikita Khrushchev chuan China ram hruaitu Mao Zedong/ Mao Tse-tung India nen an intihbuai chungchangah a lo kamkhat a, heta tang hian Mao Zedong thinrim chu ha chang thialin Russia-in mahni communist-pui aia Nehru thlavang a hauh chu a ngaihdan a ni ta lo hle a, India-in Portuguese kut atanga Goa 1961 kuma a hnehchhuh ang khan Tibet ram pawh lak mai a duh a ring ta a, indo turin thla 6 zet an inbuatsaih ta a ni. India intelligence chak loh avangin China hian ral pui phiara a phiar an ring lova, Nehru a inhrosa nasa hle,tawngkam feikibar hriam tak tak hmangin a invaupung a. India sipai hotuten indo turin an inralring lova, an inbuatsaih miah lo bawk. China chuan Indo tura a inpeihfel vek tawh hnu-ah Chinese Prime Minister Zhou Enlai Delhi-ah a rawn zin a,Indona a awm lo vang tih Nehru a hrilh. Burmese Premier U Ba Shwe chuan Zhou Enlai tawngkam-ah Nehru chu fimkhur hle turin a chah a,mahse Nehru hian a bengkhawn duh lo. Hei tak hi a ni, Burmese scholars ho zinga “Zhou Enlai-an Nehru-a a bum” tih tawngkam lo chhuahna chu ni! Indian scholar ho hian he indo chungchang hi an ziak tha duh vak lo va, India Today archive-a vai sipai China kuta in surrender lai thlalak pawh download an phal lo. Hindi Chini bhai bhai (India leh China chu u leh nau, chhul khat kual kan ni) tiin hla an phuah a, Lata Mangeshkar te zai hrulah vaiho lu bu nghawng nghawngin an lo zai ve vak vak ringawt a.Chutih mek laiin China chuan a sipai 80,000 zet ei leh in tur Calcutta kaltlangin Tibet ramah a lo chhek tlut tlut thung si a, Indo huna India rama China sipaite hman tur India pawisa Rupee pawh Hongkong Indian embassy atangin an lo thlengtir diam tawh a ni. AN INDO TA; 1962 kum October ni 20-ah China Peoples Liberation Army te chuan hmun 2-ah India an rawn bei ta thut a,khawtlang lam Aksai Chin-a Chip Chap phiaruamah leh khawchhak lam Arunachal Pradesh Namku Chu lui kamah te an rawn bei a, ni 4 an inkah chhung hian China chuan an tum ram leh hmun an la fai vek hman a ni. Arunachal-a india sipaite chuan China laipui mu sepui ruah tuar tlawk tlawk mai leh leh arte thiha thih ai chuan tiin Bhutan ramah an tlanlut a, China sipaite hian International border zahderin an umzui duh ta lo.Zhou Enlai chuan Nehru hnenah lehkha thawnin ramri chungchang inbiakthat, tuna sipaite awmna atanga km 20 ve ve mahni ram lama tawlhluh,Arunachal Pradesh atanga China sipaite inthiarchhuah,Aksai Chin hmuna sipai ram lak chin inpawmtawnsak tih te rawtna a thlen a.Ram hausa USA leh ram dangten China an demin mawhchhiat luai luai ţan. Zhou Enlai rawtna hi Nehru-an a pawm tak loh avangin Chawlhkar thum an chawlh hnu-ah Indo an chhunzawm leh ta a. India sipaite chuan Nehru piancham ni tak November ni 14-ah Walong hmuna China sipai an kap leh. Chawlhkar thum an chawlh chhung khan China chuan thapui thawhin ramri-ah a inchhek chiam a, India sipai te chuan chutianga China sipai inbuatsaih lai vel chu an uipui tui lian thlir vel mai mai a, an Takam chem. bo hawi vel mai mai a,India sipai te indona hmunah an inthawn hman lo! China chuan a siruk laiin thapui a rawn thawh leh ta ngei a, Arunachal-a India sipai 10,000 an dangchat ta reng mai! Assam rama Tezpur khua pawh an mangang phili nasa mai a,khawpui atangin mipui tlanchhuahtirin Bramaputra luikamah an insasengtir a, jial tangte an chhuah vek a, Treasury-a pawisa pawh an hal fai ta ringawt mai a ni. Khawthlang lam Aksai Chin lam indona mualah pawh Vai sipai an tlanchhe nasa hle a, vur ram tlang sang tak taka an ţhiante ruang pawh an hlawm ngam lova, China sipaiten zahder takin Vai sipai thi te an vuisakin an phumsak vel ta mai mai bawk. Zhou Enlai chuan November ni 21 zanlai a hman nghal turin inkahhai a puang a,inkahhai thu hi India-in darkar 24 hnu-ah chauh a hria a ni. A engti ziazangin nge kan Mizo pa chhuanawm,mahni inthunun thei, Brigadier T.Sailo kha kha Indona-ah khan a lo hmingţhat viau theih aw tih hi ka ngaihtuah chhuak fo! Indo lai hian Nehru a mangang hle mai a, US President John.F.Kennedy hnenah vawi 2 lehkha a thawn a,a rang thei ang bera 12 squadrons of fighter jets leh modern radar system thawn turin a ngen chiam (pathetic) a,a ţah-awh a ni ber e.A beisei anga a dilna a tihhlawhtlinsak nghal mai theih tak loh avangin India chuan Russia ralthuam hlirin tunthleng hian a inthuam ta a, an thlawhna MIG a tla reng a, an tuihnuailawng lah a changin a puaka, a changin a kang ta reng mai zawng anih hi! A hnu-a an hriat leh danin Communist ral lian laka India thlavang hauh tur leh humhim turin khawvel ram ropuite kha an lo inring hle a,1962 kuma TIME magazine editorial-ah chuan , “ USA chuan India tanpui turin Indo thlawhna 60 leh $ 5,000,000 man hu automatic silai,laipui leh rahpuah bomb te,bungraw phur thlawhna lian C-130 Hercules 12 leh pilot te leh thlawhna khawl lam enkawltu te nen India sipaite Indona hmuna phur turin India ram panin an chhuak hman a, Britain chuan Bren gun leh Sten gun bakah silai mu ton 150 zet Inida rama thawn a tum a, Canada pawhin bungraw phur thlawhna 6 thawn a tum a,Australia ram chuan India tan silai mu $ 1,800,000 man hu bat (credit) a phalsak diam tawh” tiin a ziak. CIA-in a hnua an chhut danin Nehru khan indo thlawhna lo hmang se chuan khatih hun lai khan China khan India thlawhna bei tur thlawhna ţha leh a tui(fuel) a lo nei lo reng reng a ni, an ti. India leh China indona kha ram 2 te hian indo an puang miah lova, thlawhna an hmang lo ve ve a, an ram palai te pawh an hawtir lo ve ve a ni. China chuan ral rel a thiam a, indo hun kha Cuba Missile Crisis avanga USA leh Russia an inngur lai tak kha a lo ni bawk a,Ram dangin China an sual rawn hma-in an thiltum rang takin an tihlawhtling a, inkahhai an puang ta hmiah a ni. Indo hnu hian Aksai Chin chu China ram a lo ni hlen ta a ni.James Calvin,US navy analyst, chhut dan chuan India hian kha Indona avang khan ramri inchuh atangin 32,000 square miles a neih hlen phah a,Arunachal Pradesh hi a ta neih ta a , sipai ralthuam tha tinrengin a thuam tak avangin 1971 kuma Pakistan nen an indo pawh khan India a chak chiang hle a ni, a ti ve thung. Kha Indo laia India ram hruaitute chu Sarvepali Radhakrishnan ( Vice President) Jawaharlal Nehru( Prime Minister), Brij Mohan Kaul(Army chief of General Staff), V.K.Krishna Menon(Defence Minister) te an ni a, China ram hruaitute chu Mao Zedong,Liu Bocheng,Lin Biao leh Zhou Enlai te an ni thung. India chuan Indona hmun tlang sang tak tak vur ram, feet 16000 zeta sangah sipai 10,000 atanga 14,000 vel chauh a thawn theih laiin China chuan sipai 80,000 zet a thawn thei thung a ni. India sipai thi 1, 383, hliam 1,047 leh bo 1696 zet an awm bakah China sipaiin a nung chunga an man 3,968 an awm laiin China sipai pakhat te mah India sipaiin an man ve lo! China sipai thi zat 722 leh hliam tuar zat 1697 chauh an ni thung a ni. NEHRU CHETSUALNA; Indopui II-na hnu lamah Cold war a rawn piangchhuak a, khawvel hmun tinah Russia sangawizawnpui communist leh USA sangawizawnpui democracy ram din duh pawl an indo reng a, chutiang boruak rit tak karah Nehru chuan Non-Alignment Movement chak tak a kal pui a, khawvel ram tam takin hruaitu tha leh tling ena an en a ni a. England parliament-a a thusawi pawh, Cambridge University chhuak tihtakah a sap tawng kha a han ţha mai mai khawp a, Sap pachal MP te pawh an chek tlawk tlawk kha a ni a. Chu a challanna, a hmingthatna hmachhuanin China ram a ngur a, China ramah kel a han tlattir a ni hrim a, China rawn er leh tur do ngam turin sipai lam a lo thuam tha miah lo kha a chetchhiat phah ta a ni. Defence Minister Krishna Menon kha a tir atang rengin Sipai ralthuam lei chungchhangah a bik takin Willy Jeep a chawkluh danah Jeep tuihang a lo hawp nasa a, India leh China Indo lai khan Delhi tlanga politician tam zawk chuan a indona lam lungkham ta lo chuan Menon bantir dan tur ngawt kha cho-ak rual hram vak vak angin an lo iak chiam chiam bawk a ni awm e. A bilh atanga tho lo an tih angin India ram sipai ralthuam lei chungchangah hian man ţang fanghma no nei tum pawl hi tun thleng hian an awm phah ta zel a ni. e.g; Bofors laipui lei chungchangah te,Kargil indona atana hman tur sipai uniform man to uchuak lei chungchangah te, Kargil indonaa thi te vuina tur mithhi kuang man to rura lei chungchang te, Kargil indonaa thi chhungte chenna tur Mumbaia Insak-ah politician tam tak leh sorkar hnathawk lian tam takin an lo inpe ve ngawt bawk. PA ROPUI NEHRU;Chutianga a chetchhiatna pakhat kan han sawi tak avang leh a mawng kan han hlim tak avang chuan Nehru hi pa tlaw-ra leh pa taihai a ni e kan tihna a ni hauh lo va, India hi ram ropui ni tura dinchhuaktu ( architect of modern day India) a nihna hi kan hriat reng a tha ang e. Padmaja Naidu leh Edwina Mountbatten te nen khan inhmangaihna ril tak platonic relationship an nei a.India ram kilkhawr ber thlenga universal primary education system a neihtir thei a. All India Institute of Medical Sciences te, Indian Institute of technology leh Indian Institute of Management din chungchangah world-class education a din thei bawk. India ram hnam chekhnawk tam tak awmkhawmna-ah Left Ideology hmangin ram hnuk a din a, India ram hi kum zabi 21-naa khawvel ram ropui ber te zinga super power ni thei tura kawng sialtu pawimawh tak a ni a, keini ang hnam mawl leh hnam tenau tan pawh khaw eng hmuh theihna tur hamthatna tam tak min siamsak a ni. Kan chhehvel ram tam takah democracy tungnung zo lovin sipai sorkar an din mek laiin India ramah chuan democracy hi a famkim tawk loh ang angin a la nung reng a,Hei pawh hi Nehru fin vang kan ti lo thei lo vang. Congress hruaituten an hak fo, kawr nghawng bul bannei lo pawh hi Nehru jacket style a ni a. Lehkha chhiar zau,thuziak thiam hmingthang a ni bawk a,A kutchhuak lar deuhte chu The Discovery of India, Glimpses of World History, Toward Freedom tih te leh a jail tan laia a fanu Indira Gandhi kum 10 mi ,Mussoorie khua-a hostela a awm laia a lehkhathawn 30,Letters From a Father to His Daughters te an ni a. Nehru hun atanga Indira , Rajiv,Sonia leh Rahula te Library hi a thlalak ka hmu tawh a, hetianga tam lehkhabu awmna-ah hi chuan seilian ve ila, pa dar ben hi chu ka ni bik hauh lovang ! Nehru hian Mizo ten thlen hlan kan nghahhleh em em,kan duhthusam zawng zawng awm tura kan ngaih ,Van ram awm hi a ring lem lo a, a dam chhunga a hnampuite tana thil tam tak a lo tihsak ve thei kha a lawmna a ni mai. 1955 khan Bharat Ratna chawimawina a dawng a. Indian declaration of independence kha Nehru ziak a ni a, a sap tawng la temchhin ngai lo tan in lo chhiar ve hrim hrimah; “We believe that it is the inalienable right of Indian people, as of any other people, to have freedom and to enjoy the fruits of their toil and have the necessities of life, so that they may have full opportunities of growth. We believe also that if any government deprives a people of these rights and oppress them, the people have a further right to alter it or abolish it. The British government in India has not only deprived the Indian people of their freedom but has based itself on the exploitation of the masses, and has ruined India economically, politically, culturally and spiritually. We believe therefore, that India must sever the British connection and attain Purna Swaraj or complete independence”
Posted on: Sun, 30 Mar 2014 08:47:28 +0000
Trending Topics
Recently Viewed Topics
© 2015