NANTA - episod 89 | Penatai Nanta Ari Kebun Pukul 4 dinihari Nanta sigi udah di tanah. Datai iya di kebun getah, engkining kin kitu ngiga senaya api ba tunggul. Bisi api kijap-jiap baka api signal kereta ba atas tunggul siti. Belanda iya kia. Nemu nya mina sempepat. Lalu belanda iya ke tinting, nyangka nyamai agi ninjau ari atas, tang nadai ga ia meda kulap api ba sebarang tunggul ke bisi di kebun getah iya dia. "Dini enda utai tu?" ko iya nanya diri dalam gayam malam. Chelap tubuh iya. Tak geremai asai. Bulu roma asai ke terangkat. Tang iya merani ka diri. "Mati idup, sigi diambi aku kelambi diberi antu nya," ko ati. "Kelambi songkit dilempai atas tunggul," ko antu madah ka iya dalam mimpi tadi. Nanta ingat kelambi nya baju tenun Lulong seduai Kumang, diungkupka iya, ko orang dalam mimpi tadi. "Ambi nya Nanta sebedau hari rerak tawas." Dipeda iya orang nya nyau jauh sejauh. Sempat iya ngangau engau penginggar nyawa iya "Ba tunggul ke ni nya?" Peradak iya. Tang orang ke madah ka iya nya udah nyau. Udah lesap. Nadai sempat madahk iya nunggul ke ni. Iya tedani ninga nyawa diri empu. Begaut iya nangkin dulu, lalu belanda ke kebun tu. Nyau abis munggu, abis tinting, ke atas, ke baruh, nunjah emperan, merangka paya, ngulu sungai, ngili lebak, nadai ga iya tepeda ka kelampi dilempai atas tunggul. Ukai nya mayuh tunggul di kebun nya. Semina batang gretah enggau babas idup ke bisi. " Oh nadai meh tu. Bula amat mimpi aku," mut-mutka diri empu. Angka igau aja. Angka antu bula. Nyau iya bejalai segau-segau baru. Merening kin kitu. Nadai ga tepeda ka utai. Api suluh atas pala iya pan enda tentu terang. Kurang bateri. Tambah lampu pichit iya enda ulih nenggau utai kelalu jauh. Dalam asa nyau setengah putus, niki iya ke atas tinting, ka mulai kediri ke langkau. Manah aja lalu nakal, ko ati iya; sepun dua pama meh. Buji udah kitu, ko iya bejaku. Malik iya ke kubur apai iya di atas tinting. Tepeda ka lampu kelip-kelip. Idup padam, idup padam. Kada enda orang ka engkubang kubur apai aku, ko ati iya. Subuk iya kin, begadai-gadai. Lebuh iya ngetu, ngetu ga api nya. Lebuh iya bejalai, bisi ga kelip-kelip baru. "Legi asai," ko Nanta. "Patap aku kita nya. Meranika diri ka nyengkubanga kubur apai aku." Mutus ati iya ka ngelaban orang nya. Sintak iya duku chandung. Nanta pan lalu engkechit. Dibiau iya kin kitu duku nya. Nadai ga tepantapka orang. Tak mina mantap puang dalam petang. Nadai siko orang dia. Api ke ngijap idup padam nya tadi pan nadai agi. Ujung-ujung duduk tudah bujang atas kubur apai iya. Beteritik ai mata iya nerutu dagu. Merap tiang regang apai iya. Udah tenang, baru iya nurun ke langkau. Ngambi pat. Jam maya nya udah pukul 6 pagi. Dua jam lalu iya semina begigaka kelambi songkit dilempai atas tunggul. Anang ka baju, selambar ubung pan nadai dipeda iya. Dalam linang ai mata, iya mupuk ngerejang getah tinting langkau aja, ngambi ngulihka dua tin ai getah, pama meh ko ati iya. Pia udah meh iya tepesuh jauh ke kebun kitu, ngelaban gayam malam dinihari. Kira nyau rerak tawas, batang getah di munggu langgau nya pan abis. Ngetu iya belelak ba atas munggu, merening sekali agi ngagai kubur apai iya. Enda nyamai asai ati iya. Iya ingat suara orang ke ngasuh iya ngambi kelambi dalam mimpi iya tadi munyi nyawa niang apai iya. Tang mua enda dipeda laban orang nya nunga ka belakang. Nyau iya ngabas kin baru. Tepeda ka batu ilau nyau perenching burak atas pala kubur apai iya. Dikayam-kayam iya batu nya. Asai ke ka empalungka iya ke lebak; enda ga nyadi. Simpan iya ke dalam kuchik tanchut ke dikena iya. Baju ke asuh orang giga, tang batu ke ditemu iya. Putus asa tudah bujang pintar, mulai diri ke langkau ngambi tin kena muat. Agi beteritik ai getah, buat aja ko ati iya. Enggaika orang di rumah ngiga penunga iya lesap enda madah. Abis muat, digaga iya enggau jampat ai getah nya. Tambah enggau ai. Dipanchak enggau ubah getah. Digirau iya sampai nyau pekat. Udah nya baru nuang ka ai getah nya ke dalam bakut tanah 10 iti. Ditudung iya. Iya pan lalu ngejangka diri. Mansa umai paya sida, iya ngetu ngabas bubu ke udah dua hari enda diangkat. Berat asai bubu iya lebuh iya ngangkatka nya ari tampun. Nasit bendar bulih, ko iya gaga kediri. Tang mayuh agi pama, ikan baung, tilan besai dua iko, enggau anak tengih. Tu meh ke ka sida Jedon, ko iya. Udah tembu ngetan bubu nya baru, iya pulai. Datai di rumah kira pukul 10 pagi. Nama agi deh. Gaga meh sida Alex, Jedon, Sawai enggau indai iya meda iya mai ulih bubu ngemayuh nya. "Ila lusa madahka diri kitai, enti bejalai. Orang ke irau ngapa ka nuan nya?" ko Sawai ngajar madi iya Nanta. "Sori ngal Alex, aku enda tepadahka nuan pagi tadi. Nyau begaut nurun, enda ingatka utai," ko Nanta nyalamka pejalai diri ke tanah tumu-tumu pagi. "Nadai ngawa nya Nanta," ko Jedon nampil. "Asal nuan selamat. Irau ati kami enda nemu penunga nuan." Indai iya merening Nanta. Dipeda iya mua anak bujang iya nya lain macam. Antara gaga enggau tusah. Puchat bisi. Nemaram bisi. Ketawa enda amat-amat. Tuchum baka ke enda. Bisi endar utai kelalai wat aku tu, ko ati Lamah. Nyima. Ati Lamah sigi udah enda nyamai ari tadi. Enda kala iya ka merening jauh ka gambar Ungkir ngelama nya. Enda kala iya labuh ai mata sampai lena dalam kenang peristiwa lama. Tang kati tau pagi tu, iya tiba-tiba tepaut ngagai wajah Sgt. Ungkir. Asai ke dikangaka iya. Asai ke ninga telai iya. Tang mina bejaku tanpa kata. Dalam linang ai mata, iya nemu laki iya Ungkir nya bisi utai ka dipadah. "Ila meh, nganti kami wat kediri," ko iya bejaku nengali; bejaku dalam ati ti balat sinu serta sunyi. Jedon nunyau ai ka ambai sulu ati. Sida pan sama duduk enggau Nanta ti setengah gaga tuchum ketawa; setengah pedih, setengah asa; bisi kurang ari selama. Nyangka udah ngelaban chelap dinihari, nya iya dipeda sekut di perut, ensiban di ati. Tentu bisi utai enda nyamai ti ngasuh untak enda pengerai. ~ >>> (besambung)
Posted on: Thu, 05 Sep 2013 03:12:20 +0000
Trending Topics
Recently Viewed Topics
© 2015