NOS PAIS ARUBA: Goberna bon y decentemente (parti 1) Un grupo di 30 cuidadano, especialmente preocupa over di e cultura di venganza y miedo cu ta reinando na Aruba, e privigeliameno di friends and family y e infiltracion den e media a cuminsa un ‘think tank’ den 2012 tocante e maneho preocupante di e gobierno. Jan de Ruijter, un habitante conoci na Aruba, tur diamars ta skirbi un columna den Solo di Pueblo den nomber di e movimiento di cuidadanonan Nos pais Aruba, tocante bon maneho. Pa comentario por hanje riba janderuijter@yahoo . Por wak e website y tambe e pagina riba Facebook di Nos Pais Aruba. Un grupo grandi ariba Aruba ta hopi preocupa over di kiko a pasa akinan e ultimo 4 anja. Especialmente esnan bou di nos cu a traha duro y contribui na e construccion di nos economia y nos turismo den e anjanan 60 y 70 di e siglo pasa. Nan a experiencia con uni y den harmonia e pueblo ariba Aruba tawata e tempo ey y con e cuidadanonan tawata lucha den union pa un bon futuro. Nos tawata haci esey den union, e cuidadanonan, e sindicatonan, e organizacionan di commercio, e Camera di Commercio, Atia, AHATA y e politiconan. E trabou duro no tawata molestia niun hende pasobra door cu tawatin asina hopi union semper e trabou tawata keda placentero y especialmente den bon animo. Tur hende tawatin placer den esaki, e hendenan semper tawata contento y semper tawatin un sonrisa, amabilidad y un poco alegria pa e otro hende. Cu e union ey y pensamentonan uni hopi a wordu logra pa Aruba. Entre otro e Status Aparte di Aruba. Y danki na e Status Aparte e isla a desaroya completamente. Pa e hendenan cu a experiencia e tempo ey y a contribui na e construccion e ta intensamente triste pa wak con tur cos cu nos a construi, awor aki ta wordu destrui completamente, especialmente den e ultimo 4 anja. E destruccion ta bai asina liher cu hasta e Status Aparte pa locual cu nos a lucha asina duro pe, ta den menaza pa bai perdi. E debe di Pais Aruba awor aki a yega na Afl. 60.000 pa persona, pa cada habitante, incluyendo tur mucha y baby chiquito. Esey ta e di tres debe mas halto na henter mundo. Solamente Merca y Italia tin un debe mas halto pa cada habitante. Aruba como e pais mas chiquito na mundo tin casi e debe mas halto na mundo henter. Increibel pero berdad! Esaki solamente hunto cu e hecho cu e gobierno aki desde 2009 ta crea escandalonan den e area di maneho (antes un biaha pa luna, despues un pa siman, y awor hasta un pa dia) ta haci cu cuidadanonan mas cu preocupa. Mas cu preocupa pasobra nos ta realiza cu 4 anja mas cu e maneho aki di 2013 te cu 2017, lo caba cu Aruba por completo. Nos sa simplemente cu no por sigui asina. Nos pais Aruba no kier limita su mes cu duna critica pero kier splica tambe kiko su ambicion y metananan ta y den e siguiente 8 siman Nos Pais lo aclarea esaki den e columna aki. E promer punto di e programma cu Nos Pais Aruba kier pasa pa e partidonan politico y kier mira realiza ta concerni “Good Governance”, cu otro palabra un maneho bon, transparente y den especial decente. Den lugar di un maneho den propio interes, nos kier un maneho den interes di tur hende, den interes general. Den lugar di un gobernacion den interes di solamente “friends and family” nos kier un gobierno cu ta traha na interes di cada cuidadano, sin importa color, origen, religion, edad, profesion, si ta hende homber of hende muher, si ta casa of soltero. Ningun exclusividad y limitacion pa friends and family pero inclusividad cu otro palabra tur hende ta pertenece na friends and family. Nos kier un gobierno cu ta caba cu e separacion di e pueblo den berde y geel, un gobierno cu ta restaura e union aruba Aruba. Un gobierno cu ta honesto cu tur e cuidadanonan y cu no ta haci su mes culpable na mentiranan y ilusionanan over di refineria, brandstofclausule, energia berde, Martin Luther King, Mandela y Ghandi. Un gobierno cu ta goberna drechi y decentemente sin mal uso di poder, corrupcion, fraude, escandalonan, mentiranan, trampanan, intimidacion, y conducta dictatorial y cu no ta causa un cultura di miedo. Un gobierno cu ta reconoce cu hendenan tin derechonan, cu cada habitante di Aruba tin derecho ariba un trabou y cu yuda hende cu un trabou no mag di ta basa riba ‘favornan’ di gobierno of un minister. Y mescos ta conta tambe pa otorgamento di un pida terreno pa un vivienda of dunamento di un studiebeurs. Tur cos lo depende di e decision ariba 27 september. Tin cuidadanonan decente na Aruba ainda cu ta desea un gobierno drechi y decente? Ami ta kere cu si. Mi tin confianza cu si. Mi ta sigur di dje. Por mira e website y e pagina ariba Facebook di Nos Pais Ariba. Ta wordu continua.
Posted on: Mon, 12 Aug 2013 12:38:16 +0000
Trending Topics
Recently Viewed Topics
© 2015