Pathian nena inbuan Gen 32:22-31 Thangmawia A u Esaua a hlauh avangin Jakob-a chu Paddan-aram rama a pu Labana hnenah a tlanchhia a. A pu ran rual vengin a inhlawh a. A pu fanu pahnih nupuiah a nei a; fa sawm chuang a nei. Pathianin a awmpui tlat avangin ran vulhah a hlawtling hle. A hlawhtlinna avangin a pu leh a pu faten an thik ta tlat a (Gen 31:1-3). Chubakah Pathianin “I thlahtute ramah leh i laichinte hnenah haw leh tawh rawh; i hnenah ka awm zel dawn nia” a tih avangin Kanan ram panin a haw leh ta a. Gen. 32:22-31-ah hian a hawn kawngah Jakoban engang harsatna nge a tawh a, chung harsatnate engtin a hmachhawm tih kan hmu thei. Jakoba chuan a chhung te, a ran te leh a chhiahhlawh te hruaiin Paddan-aram atanga Kanan ram panin an hawng a. Tuipui Thi atanga hmarlam mel 23-a hla, lui thuk em em lo leh thlanglama Jordan lui pawhtu Jabbok lui kam an thlen chuan harsatna an tawk ta a ni. 1. Tunge Jakoba chu? Jakoba chu mi chak tak a ni. Kanan ram atanga a tlanchhiata khawchhak ram a thlenin phulah beram rual leh beram vengtute a tawk a. Beram hovin tui an in theih nan tuichhunchhuah kawngkaa lung lian tak chu amahin a lum sawn thei mai a ni (Gen 29:3). Jakoba chu mi fing tak a ni bawk. Beram leh kel hrisel tak tak leh ze tan te, ze chik nuk te leh ze phoh phoh tam tak neih theih dan a hria a ni. A fin avang leh Pathianin mal a sawm avangin a hausa hle a. Ran tam tak leh chhiahhlawh tam tak a nei a. Kan sawi tawh angin nupui pahnih a nei a, fa sawm pakhat a nei bawk a; chhungkaw hung tak an ni a tih theih awm e. 2. Jakoba a mangang Mahni pian leh murna rama let leh Jakoba chu a hlim thei tlat lo. A u Esauan a that mai ang tih a hlau a ni. Paddan-aram atanga Kanan ram pana a haw thu hrilh turin a u hnenah mi a tir a. Mahse, a mitirhte hnen atangin a uin mi 400 hruaia amah [Jakoba] tawk tura an rawn kal tih a hriat chuan mi hausa tak leh mi chak tak Jakoba chu a lungngai a, a zam a ni. A u thinurna thawi dam tumin lawmman atan ran 560 (kel 220, beram 220, sanghawngsei 30, bawng 50) kenga a u tawk turin a chhiahhlawhte a tir leh a. A kal dan tur leh a u hnenah present pek ruala an sawi tur engkim a hrilhin chhiahhlawhte chu a tir a ni. Chumi zan chuan Jakoba chu a muhil thei tlat lo. A tho va, a chhungte hruaiin Jabbok lui chu an dai kai a. A neih zawng zawng pawh a kai tir bawk a. Tichuan, amah te chauhvin a ta a. A neih rosum leh a chhungte chuan a lungngaihna an hnem zo lo a ni. Mi tupawhin harsatna tak tak a hmachhawn emaw, chumi chu thih leh dam inkara ding a nih chuan fianriala mahni te chauhva awm an duh thin a ni. Jakoba chuan hunkhirh tak a hmachhawn tih a chiang hle. 3. Pathianin Jakoba a buan Jakoba amah chauhva a awm chu mi pakhat a buan ta a. Helaia thil thleng hi hrilhfiah dan chi hrang hrang a awm. Mi thenkhat chuan thil thleng tak tak ni lovin Jakoba mumang emaw inlarna (dream or vision)-ah an ngai. Mahse, Jakoba malpui ruhchuktuah a pelhsawlh tak avangin mumang emaw inlarna emaw lek chu a nih thei lo vang (Gen. 32:25). Jokoba buantu hi ‘mi pakhat’ tih a ni ringawt a, tunge a nih chiang taka sawi a awm lo. Thuthlung Hlui hun laia mite ngaihdan chuan lui kan turte chu lui huai (river demon or river spirit)-in a dang thin a. Lui kan tura leh lui huai chu an bei vak thin a; tichuan, lui huaite chu khaw var hmain an tlanbo leh thin a ni awm e. He ngaihdan avang hian mi thenkhat chuan Jakoba buantu chu lui huai a nih an ring. Mahse, Jakoban lui daikai chungchangah eng harsatna mah a tawk lo. A chhungte leh a neih zawng zawngin lui ral an kai tawh a. Buan a nih hmain amah pawhin lui ral chu a kai tawh hmel a ni (Gen. 32:22, 23). Thil chiang tak chu Jakoban amah buantu chu Pathian a ni a ti a (Gen. 32:30). Tih hlum a ni lo chu Pathian zahngaihna liau liau a nih thu a sawi bawk. Engvangin nge hunkhirh tak hmachhawn mek, mi mangang tak Jakoba chu Pathianin a buan le? Ngaihtuah tur a tam viau ang a; a chhanna dik tak pawh hriat a har hle ang. Jakoba ang deuh hian mi tinin harsatna kan tawk theuh va. A chang phei chuan harsatna chu pakhat mai ni lovin, pahnih pathum lai an ni thin. Kristiante tan chuan harsatna kan tawhte hi malsawmna min thlentu an ni duh chawk. Harsatna lo thlen dan chungchangah: (1) harsatnate chu keimah ni siam (tihchhuah liau liau) a ni thei a. Pathian hian amah ringtute tan hian tum a nei a; Pathian thil tum hriat tum hauh lova kan duhzawng leh kan beisei thil chauh tih hlawhtlin tuma kan nun kan hman hian harsatna kan hmachhawn thin. Entir nan, Pathianin ding lamah kal tura min duh laiin vei lamah pen talh kan tum thin a; chute ang hunah chuan Pathian nen kan inbuan ta thin a ni. (2) Mi puitling kan nih theih nan leh kan thlarau nun a puitlin theih nan Pathianin harsatna min thlen bawk thin a. Harsatna hmangin Pathianin chher hriam min tum a; harsatna hmangin min buan vak thin a ni. Inbuan nun chu a hahthlakin a thinrim thlak hle. Khawhar taka beih a ngai bawk thin a, tan khawh thiam pawh a har hle. Kan tan loh chuan bawh behin kan awm dawn a. Thapui tawha kan tan vak lahin Jakoba angin hliam pui tawrh a awl hle a; tan poh leh hliam a na ting mai thin. Pathianin Jakoba malpui ruh chuktuah a tihpelh ang maiin kan chhuan em em thin kan chakna, kan mawina, kan thluak, kan neihsum, kan vua leh vangte leh thil dang dang chu tihtlawm an ni a. Tichuan mihring hi innghahna tlak tak tak a nih lohzia a zir chhuak thin a ni. 4. Jakoba beiseina Beidawng tak leh lungngai taka a awm laia buan a nih pawh chuan Jakoba chu a tlawm duh mai lo. Theih tawp chhuahin a bei let a, malpui ruh chhuktuah pelh hial khawpin a tang a ni. Hliam a nih hnu pawh chuan a mi buana chu a thlah duh lo va; a duhna leh beiseina (malsawmna) pek a nih hma chuan tlah a tum lo a ni. A thil beisei chu a la bei sei tang tang a. Harsatna chu a sukiang thei ngei ang tih a ring tlat bawk. Tin, ami buan chu tunge a ni tih a hre chiang hle bawk. Jakoba chuan a thil dil chu a hre chiang hle a ni. Amah tawk turin a u a rawn kal tih a hriatin “Aw ka pu Abrahama Pathian, ... i chhiahhlawh chunga khawngaihna zawng zawng i lantir leh, thutak zawng zawng i lanzir zingahte hian, a tenau ber pawh hmu tlak ka ni lo ve; he Jordan lui hi ka tiang nen chauh ka kana; tunah zawng pawl hnih zet ka lo nih tak hi. Khawngaih takin ka u kut ata, Esauva kut ata ngei chu, mi chhanhim ang che; nunau chawpa mi rawn thah ka hlau si a. Nangin, ‘Ka ti tha ngei ngei ang chia, i thlahte chu tuifinriata tiau vaivut chhiar sen loh khawp hiala a tam angin ka siam ang e,’ i ti a,” tiin tih tak zetin Pathian a au va. A tawngtaina chu he thil thlengah hian fiah leh chhan a ni ta a ni. 5. Jakoba inngaihtlawmna Thuthlung Hlui mite hun lai chuan hming hi a pawimawh hle a; hming leh a putu chu thenhran theih a ni lo. An hming chu an nihna (identity) a ni nghal mai thin. Jakoban amah buantu hnena a hming a hrilh rual rualin a nihna a hai lang tihna a ni. ‘Jakoba’ tih chu hming chhuanawm lo tak a ni a, a awmzia pawh ‘bumtu’ (cheater) emaw ‘luahlantu’ (supplanter) tihna a ni. A hming a sawi avangin Jakoba chuan a chaklohna a pawm a, a inphah hniam hle bawk tihna a ni a; chu inngaihtlawmna nun chuan hming thar nei thei turin kawng a sial sak ta a ni. ‘Jakoba’ tia koh ni tawh lovin ‘Israela’ (‘bumtu’ emaw ‘luahlantu’ ni tawh lovin ‘Pathian awp-a’ emaw, ‘Pathian tihdam-a’ emaw, ‘Pathian rorelna hnuaia awma’) tia koh a ni tawh zawk dawn a ni. Hming thar a neih rualin nihna (identity) thar a nei ta a; kawng engkimah Pathian kaihhruaina hnuaia nun hmangtu a lo ni dawn ta a ni. Tin, a inngaihtlawmna mai bakah Pathian leh mihring a bei a, a hneh tak avangin ‘Isarela’ tih hming chu pu thei a ni. ‘Pathian leh mihring hnehtu’ tih hian engang hun khirh tak pawh hmachhawn mahse bei dawng lova Pathian a beiseitlatna nun kha a kawk a; chu chuan a hmachhawn mai tur a u Esauva pawh a hneh (hmin) thei dawn tih a hril lawk bawk a ni. Chubakah Jakoba chu a pu Labana hnehtu a ni ve reng reng bawk. 6. Pathian hmel Thuthlung Hlui hun laia mite chuan Pathian hmuh chu thil hlauhawm tak, thihna thlen thei hialah an ngai thin. Chuti ang ngaihdan an neih laiin Jakoba chuan a mitin Pathian a hmu mai ni lovin amah ngeiin Pathian a buan a; taksa, rilru leh thlarau zawng zawngin a buan a ni. Jakoba tan a thil tawn chu thil rapthlak tak leh tihbai awm tak a ni. Chuvangin, chutia a nunna zuah a ni ta mai chu mak a ti hle a, a inbuanna chu Peniel (Pathian hmel) tiin a vuah ta a ni. Thlarau nuna Pathian hmel hmutu leh theih tawp chhuaha Pathian buantute chuan tunge a nih tih a inhre chiang hle thin. Jakoba anga zan thim taka inbuan nun pal tlangtute chuan khawfing a chah a, nung dama zuah an ni tih an inhriat chuan Pathian khawngaihna liau liau a ni tih an hre chiang em em a. An tan Pathian fak bak tih tur a awm tawh thin lo. 7. Chhinchhiahna Zing khua a lo var a, a u Esauva hmu tura a han pen chhuah chuan Jakoba chu a ke a bai ta tlat mai. Mahse, ke bai nih chu Jakoba tan ‘tlawmna nun’ entirna a ni lo vin ‘hnehna nun’ entirna zawk a ni. Chu ke baina chu [Pathian hmel hmutu leh buantu ni mahse] Pathianin a chungah zah a ngai tih ‘chhinchhiahna’ a ni a, chu chuan Pathian chu tunge a nih a, Jakoba pawh chu tunge a nih tih chiang takin a sawi fiah bawk a ni. A taka Pathian hmel hmutu leh buantute chuan chhinchhiahna, mi ten awlsam taka tunge an nih tih an hriat thiam theih maina tur, an nei thin a lo ni.
Posted on: Thu, 25 Jul 2013 09:58:47 +0000
Trending Topics
Recently Viewed Topics
© 2015