“SP SA DIPOLOG GIBANHAW ANG ORDINANSA SA CCTV” Gibanhaw na usab sa mga miyembro sa Sangguniang Panlungsod ning dakbayan sa Dipolog ang usa ka gipadas-og nga ordinansa may kalabot na sa ““Ordinance requiring certain business establishments, educational institutions and residential subdivisions operating in Dipolog City to install Closed Circuit Television Cameras, providing for penalties for violation thereof, and for other purposes”, nga gipangamahanan ni Konsehal James Verduguez kaniadtong Hulyo 30, 2013 sulod sa SP Session Hall, ning siyudad. Nasayran sa buhatan sa Impormasyon nga gipadas-ug pagbalik ni Konsehal Verduguez ang nasangpit nga ordinansa nga wala hatagi ug aksiyon sa milabayng administrasyon sa probinsiya, tungod kay nasuta sa magbabalaod ang kamahinungdanon sa maong gadyet sa “Crime and Prevention” sa dakbayan. Matud pa ni Konsehal Verduguez nga ang pag-instalar sa mga CCTV Cameras sa mga strategic nga mga lugar sa dakbayan sama sa mga banking institutions, computer shops, department stores, gasoline stations, automated teller machines (ATM), hotels, housing subdivisions, internet cafes/shops, money changer shops, pawnshops, ug susamang mga establismento nga adunay “aggregate assets” nga mobalor ug five hundred thousand pesos (P500,000.00) ug pataas maoy usa ka maayong paagi aron makalikay sa mga pagpanulis, ransack ug uban pang kriminalidad nga sarang mahiaguman niining maong mga patigayon. Dugang pa ni Konsehal Verduguez nga gi-require usab ang City Government of Dipolog ug ang mga public buildings o mga lugar nga kasagarang pagadayuhan sa mabagang duot sa katawhan sama sa mga merkado publiko, terminal sa bus ug uban pang mga sakyanan, plazas ug parke, main thoroughfares, ug mga entrance ug exit points sa siyudad sa pagbutang ug mga CCTV Cameras aron mamonitor ang mga nawong sa tawo nga anaa sa maong lugar. Gawas pa niini, gitahasan usab ang Dipolog PNP nga mohatag sa listahan sa mga “strategic areas” ning siyudad nga gikinahanglan usab nga pagabutangan sa mga CCTV Cameras sanglit mao kini ang gitu-ohang rota sa mga kriminal. Kahinumduman nga nahimugso kining maong ordinansa tungod sa hangyo ni Dipolog PNP Chief P/Supt. Joven R. Parcon nga magbutang ug mga CCTV Cameras sa tanang strategic nga mga lugar ning siyudad aron mapadali ang pagsulbad sa kaso sa kriminalidad dinhi, nga mao usab ang pinakaunang tahas sa kapolisan. Gumikan niini, nasabutan sa mga magbabalaod nga “i-refer” kining maong gipadas-ug nga ordinansa sa hingtungdang komitiba aron sa pagtuki niini sa ipahigayong “Joint Committee Hearing” sunod semana. Kahibaloan nga sa pagpdas-og ning maong ordinansa, usa na kini sa mga pamaagi nga makab-ot ang panglantaw sa Dakbayan sa Dipolog nga mamahimong God-Centered, Peaceful, Self-Reliant Super City ang dakbayan sa umaabot tuig 2030. (CIO-ACA)
Posted on: Mon, 19 Aug 2013 05:36:34 +0000
Trending Topics
Recently Viewed Topics
© 2015