Samm Clemente ▶ Taga Carigara ka kon... 1 hour ago near Muntinlupa City, Rizal, Philippines · Edited Akon mga obserbasyon ha Carigara katima han Yolanda... Nakadto ako ha aton bungto hadton Lunes hin aga ( Nov 11 ) hasta hadton Biyernes hin maagahon ( Nov 15 ). An akon mga nakit-an: 1. Relief Management Operation - may-ada reception area didto ha second floor han LGU building. Nakit-an ko ini hadton Miyerkules. - Nakapaskel an mga statistics kada baranggay mahitungod han mga namatay, naapektuhan/naaksidente ngan han kantidad han danyos. - Didto han entrance ha Ground Floor, may-ada hira gin butang nga papel para magpalista an nangangaru hin ayuda. - Hasta hini nga adlaw, an inabot pa la nga ayuda 300 sakos nga bugas. Tikang daw ini ha NFA. Nasiring an usa nga in charge didto, an 50 sakos, ginpanhatag na han mga barangay nga ha ira panhuna-huna mas kinahanglan dayon hin ayuda. An 250 sakos nakadto ha ground floor, harani han opisina han Register of Deeds. 2. Feeding Centers - duduha an akon nakit-an. Didto ha LGU, may-ada hira improvised nga kusina/lutuan ha may hagdan tikadto ha third floor. May-ada luto na nga pancit bihon ngan may-ada hira ginluluto nga utan ngan kanon. May-ada liwat ako nakit-an nga nagpapakaon ha may purtahan han kumbento hadton Huwebes hin gab-i. May-ada didto ginpapakaon hin lugaw, mga napulo ka tawo. 3. Clean-up operations - Martes hin aga, nakit-an ko an LGU clean up crew nga naglilimpiyo ha boulevard. Gintatabas an mga dahon han mga lubi nga narabat han bagyo. Dida han kulop, may-ada pay-loader ngan hin dump truck ha mercado, harapit han mga karindereya, nga naglilimpiyo han mga basura. Kinabuwasan hin aga, nakit-an ko na liwat ini nga grupo nga naglilimpiyo liwat dida ha may Gawas an Harigi nga lugar. Ha iba nga lugar/barangay, an mga tawo an naglilimpiyo han ira libong. An mga basura gin titirok para han pag-agi han dump truck. Hasta hadton Huwebes, damo pa ini nga mga tambak kay baga na-concentrate an cleaning crew ha may Mercado/Baybay. Naka biyahe ako hasta ngadto ha Sogod. Naaagian an kalsada pero may-ada pa mga tumba nga mga kahoy ngan puno hin lubi. 4. Pagkaon: 4.1 Bakery - usa la an akon nakit-an ( Julies ? ) nga na-operate kay may-ada man hira generator. Maagahon pala, halaba na an pila. Derecho an ira pan hudno hin mga tinapay. 4.2 Grocery store - an Shoppers Budget nira Ben Lim na-abre kada adlaw nga nakadto ako. Ala 6:00 pasado pala, may-ada na pila. May ada liwat guwardiya nga Pulis para diri magsamok. 4.3 Isda - may-ada regular nga baligya kada adlaw pero diri damo kay waray man yelo. Hinmataas hin gutiay an presyo. 4.4 Karne - may-ada nag-iihaw kada adlaw. An presyo hasta hadton Miyerkules, P180/kilo an baboy/pork chops. 4.5 Utanon - may-ada pero diri damo. 4.6 Duma - kamote ngan balanghoy, may-ada kada adlaw. 4.7 Sardinas/corned beef/noodles/bunay - gutiay nala an supply 4.8 Bugas - hasta han Huwebes, may-ada pa napapalit, P40-P44/kilo depende ha klase. Damo an nakit-an ko nga nagbubulad hin humay 5. Medicines - abri pirmi an parmasya ha may merkado ngan an didto ha tugbang han Shoppers Budget. Usahay, may-ada pila. An Infant Formula an baga gin-aaragaw pagpalit. 6. Construction supplies - pirmi abri hira Boy Lim ngan an kanda Lloren pero ubos an plywood, sim, raysang nga 3 ngan 4 ngan Vulcaseal. Siring ni Boy, makuri makapalit hin damo ha Palompon ngan ha Ormoc. ( Kanina, may-ada kami ginpalit nga sim ngan raysang ha Ormoc kay makuri maghinulat nga mag-normalize an supply ha aton.) May-ada liwat nalaray hin pawod ha Baybay pero diri damo. 7. Atake han NPA/mga preso - Nakadto ako ha may kanto harani han singbahan ha Jugaban, mga 11:30 hin aga han Miyerkules. May-ada nandadlagan nga mga lalaki tikang ha Mumbon nasiring nga may-ada kuno tiarabut nga mga NPA/preso. Eksakto liwat nga may naagi nga tulo nga multi cab nga may-ada sakay nga mga tawo nga may ada dara nga mga gamit. Nagtikang baga karibuk, an mga tindahan nagsara ngan an mga tawo nga namamalit ha Bayabay nanguli, an iba nagdadalagan liwat. May-ada mga pulis nga naka motor, Armalite an mga dara tikadto ha may Barugo. Waray ako nabatian nga nagpabuto hin pusil ha aton. Waray ako nabatian/nakit-an hini nga ginsisiring nga mga lawless elements. Ha akon suma, waray kamatuuran. 8. Peace and Order - waray ako nakit-an nga may nagsamuk. Tama an desisyon nga mag-curfew tikang alas otso hin gab-i hasta alas kuwatro hin aga. Mamingaw an bungto pag-abot hin alas otso. Waray ako nakit-an nga nagin problema an curfew. 9. Gasolina - amo ini an nag-mahal hin duro. Inabot an presyo hasta P200 an litro. An iba nakadto pa ha Kanangga, P150/litro. Epekto, an mga van tikang ha Carigara, nasukot hin P300 kada pasahero para Ormoc. An akon bayad han biyahe hin habal-habal tiakng ha Ormoc hadton Lunes, P1,600.00 . 10. Tubig - waray ka-utod labut han naka plano nga pag shutdown han supply from Nov 14-16 para malimpiyuhan an reservoir/dam. Waray na-operate nga Purified Water Store kay waray kuryente. Diri damo an bottled water. Nagbaligya an Coop, pero limitado kada tawo. Amo gihapon an Shoppers Budget ngan iba pa nga tindahan ha Baybay. 11. Kuryente/cell signal - waray. Nakit-an ko ha Ormoc hadton Huwebes, natikang na hira pag repair han mga poste. ( Yana nga gab-i, naghatag hin patapud hi DOE Sec Petilla nga fully restored an power ha bug-os nga Leyte by December 24 ). November 18, 2013 This is a repost.....
Posted on: Mon, 18 Nov 2013 17:23:05 +0000
Trending Topics
Recently Viewed Topics
© 2015