Setanan hna a rawn thawh avanga lo bei let turin Pathian a lo che thin chauh emaw ka lo ti thin a, Pathian hian Counter-attack a lo khel hlei nem le. Israela thlahte Aigupta rama an lo pun deuh deuh lai khan buaina namen lo an tawk tlat mai a, chu chu Pharoa thupek anga Hebrai fa mipa tawh phawt chu tihhlum tur tih thupek kha a ni. Amaherawhchu Mosia thuhrukin a awm phah a, ropui taka kalhlen kut lo pianna bul leh tuipui sen kan meuhva tlanna ropui lo chhuah phahna tura nausen hmeltha tak Mosia lo lan phahna a ni daih mai a nih kha! Pathianin ropui taka tlanna a buatsaihsak avang leh Dan thianghlim leh Kanaan ram tiam a lo buatsaihsak vek avangin chumi dal buai tura Setana lo inrawlhna a lo ni lek fang a, mahse Setana hmanrua chu a ruahman tihhlawhtlinna kawng atan a chantir hlauh thung. Lalpan a mite tan thil tha ber a lo buatsaihsak reng a, Setana zawk chuan a lo attack mai mai a ni. Heroda thupekin nausen suat runpui a lo awm leh a, nimahsela Khawvel Chhandamna ropui, thing Kraws lera buatsaiha awm kha, chumi thlentirtuah a chang hlauh a ni. Pathianin thil tha ber a ruahman avangin hmelma pa chuan buaina a lo siam thin a lo ni a, chu buaina chu buaina niin lang mahse thil tha zawk a awm avanga hmelma chetlakna mai a ni a, tin, thil tha ber thlen tirtuah Lalpan a siam hlauh thin. Pathian fa Israel hote hmaah chuan mi lian pui pui Anaka thlah te, an buaina turin Kanaan ramah Setanan a lo chhawp vei a, nimahsela Pathian mite tana khawpui ropui tak tak te, tuichhunchhuah leh ei tur tha ber ber lo siamsaktuah Lalpan a hmang hlauh si a ni. Harsatna leh buaina kan tawh hian kan hmaah Pathian thatna ropui tak kan tana buatsaihsak thil te a lo awm reng vanga Setana min beihna a ni a, nimahsela Pathianin kan tan a ruahmansak kan hmuhna tur kawngah a chantir hlauh thin a lo ni. Pathian hmangaihtu amaha ruat anga a kohvate tan chuan an thatna turin engkimin a thawhsak hlawm thin tih kan hria. (Rom.8:28)
Posted on: Thu, 25 Sep 2014 17:48:48 +0000
Trending Topics
Recently Viewed Topics
© 2015