So yuh like tuh give yuh woman a lash nuh? Yuh duz like tuh kick she and pelt she down nuh bo? Well alright, Yuh masquerading as a community figure, a musician, a dj, a Rastaman, a church deacon or whatever else and tink yuh gine get way? Well good, alright. She tell you no and you decide yes? Well uh,uh, no. Cos no is no. Yuh tink yuh duz have more rights tuh she body den she? Wuh I cant get it unnerstan. So you really tink dat de bruises iz jus on she body and aint in she mind? Well you is a real idiot in troof. Yuh tink dat de heap o shouting and screaming and threatening in she ears is a ting a real man would do? Wuh where yuh get dat information from bo? And yuh get she frighten bo and she doing yuh bidding so you iz a real top dog bout here huh? Well I gine reveal you now... I bet you dont have yuh own self esteem so you will tek way hers. I bet yuh dont achieve anything worthwhile in yuh life so yuh gine mek sure dat she dont pass you. I am prepared tuh swear tuh de fac dat you profile in front of family and friends like you is de bees knees and a gentleman. But de troof is you are a bully, a coward and a liar. You is a rapist to aint it? Wuh yuh tink a coward like you woulda stop at a lash? Cos she aint good for nuttin but tuh lie down for you and den turn in tuh a mat fuh yuh to wipe yuh goat foot on aint it. And if she dare tuh cry yuh would give she a swift kick right in de place yuh just withdraw yuh nasty self from. Yuh have yuh eye on another woman but she aint like you, cos yuh aint shit and so yuh come home and blame yuh woman for dat too and plax, yuh lick she down again. You aint paying yuh way cos yuh cant mek it outside but inside yuh is king nuh. She seem tuh be footing all de bills and ask yuh bout you money and plax, she get a next lick. Why de arse she dont keep she children quiet? Coz even doe yuh gi dem tuh she, dem is she responsibility, Plax! But you aint do nothing wrong is it soul? She just have a way o getting you vex and really she should be lucky tuh have you cos you is king and iz just dat de rest o de worl aint see it yet. Oh law, yuh vex?, yuh vex nuh? come and give me, plax in my mout, come nuh, yuh heart would stop before yuh lift up yuh hand tuh give me de first blow, I tell yuh. Oh and a word tuh de ones dat come over from abroad and tink dat de women over here is a soft touch and dat yuh could carry on yuh foolishness bout here. Well I had de privalge o speaking tuh de ministers of every Caribbean country last week at de House o Commons, courtesy of de MP Diane Abbott and I put Domestic Violence in de diaspora on de map. So when yuh carry on yuh foolishness bout here, dey gine hear bout it out dere. You is a man or a mangoose? We coming tuh a place near you....soon.
Posted on: Fri, 27 Jun 2014 10:19:11 +0000
Trending Topics
Recently Viewed Topics
© 2015