South Cotabato, zero outbreak sa animal diseases KORONADAL CITY-NAGAPABILIN nga malimpyu ang record sang South Cotabato sa una nga anum ka bulan sang tuig sa outbreak sang anu man nga sahi sang balatian sa mga kasapatan. Ginpahayag ni Provincial Veterenarian Dra. Lorna Lamorena, nga wala sang napagkit nga animal disease outbreak humalin sang Enero tubtub Hunyo subong nga tuig sa probinsiya. Apang sa pihak sini, padayon ang pagtinguha sang mga opisyal sang probinsiya agud nga mapabilin ang nasambit nga record. Suno kay Lamorena, 18 ka bulan na nga wala sang napagkit nga animal disease outbreak sa probinsiya matapos nga nangin malimpyo man sang record sa bug-os nga tuig sa 2012. May namonitor suno pa nga balatian sang Surra apang wala ini naglab-ot sa outbreak level bangud gilayon man ini nga natapna. Nahibaluan nga isa ka parasitic disease ang Surra nga nakaapekto sa nagkalain-lain nga sahi sang farm animals nga nakumpirma sa lugar nga yara sa border sang South Cotabato kag Sultan Kudarat. Base sa assessment, gikan sa pila ka area sang Sultan Kudarat ang nasambit nga balatian nga mahimo makaapekto sa mga kabayo, ido, baka, karbaw kag baboy. Lakip sa sintomas sang surra infection amo ang pagniwang sang sapat kag indi normal nga pamatasan nga posible mangin tunaan sang kamatayon. Magluwas sa surra, kontrolado man sa probinsiya ang iban pa nga paglapta sang balatian sa mga kasapatan kasubong sang hemorrhagic septicemia kag hog cholera sa probinsiya bangud man sa mga interventions kag nagkalain-lain nga vaccination activities. (Girlie Narciso-Solis)
Posted on: Fri, 16 Aug 2013 02:07:39 +0000
Trending Topics
Recently Viewed Topics
© 2015