Thau Ruang Ih A Cang Thei Mi Thil (7) Pawl Americans mi ih zatek ih 36 hnakih tam hi mithau (obese) tiih ruah an si ih zatek ih 34 pawl hi an ritding zat hnak in an rit tin Centers for Disease Control and Prevention cun a ti. Thautuk nak ihsin thithlum le zunthlum, cun lungnat pawl neih theih tihi mi tampi ih theih cia a si ih mangbang thlak ah ruah a si nawn lo. Cu mi pawl tlun ih a cang thei mi thil (7) pawl cu; 1. Cancer National Cancer Institute in kum tin cancer nat a ngah thar mipa 34,000 le minu 50,000 a tuam hlawm ringring. Claveland Clinic ih an vice chairman cun taksa ah punghman ai ih thau a tam tik ah taksa in hormone pawl hna tamdeuh a tuan ter ih cu ti ihsin tumor timi taksa bol a suak ih cutin cancer ah a rung cang tiah a ti. 2. Naupai Har Minu thau pawl hi a ttawl pawl ai in nau an pai har. Zingzoi nak an tuah mi ah minu thau 300 sungah zatek ih 90 pawl cu polycystic disease timi naupai theilo nak nat an nei. Thau ruang ih nau pai thei lo nak (infertility) san bik cu theih fiang a si hrih lo nan Center for Weight Loss and Metabolic Surgery ih an director Dr. Marc Bessler cun thauluan ruang ih hormone thleng awk nak ruangah a si ding tiah a zum. 3. Thla Kimlo ih Nau Nei Body Mass Index 35 hnak ih tam minu naupai pawl thlakim lo ih nauneih ding hi zatek a tam sawn a si ti’n Journal of the American Medical Association pawl in an hmu suak. Thautuk tik ah nau inn pawl a cak lo ter ih thlakim lo ih nauneih nak a cang ter. 4. Tha te’n It That Theilo Americans mithau zatek 80 pawl in thaten kan itthat thei lo tiah an ti. Tha te ih an it that thei lo tikah nat dangdang, thithlum, zunthlum le lung nat ti vek pawl in a run tlun ih tlunah a thau aw sinsin. A ttih nung um bik cu Sleep Apnea timi it that lai thawthawt cawl mi khi a si. Zaan it tik ah hngawng ih thau pawl in kan hngwang ih thlihri a phit ih thawthawt a cawl ter. Cu tik ah taksa in oxygen duh vek in a ngah lo ih lung kha nasa zet in hna a tuan ter. 5. Nautat Hmuhsuam nak Tong Nauhak thau ih zatek 40 pawl cu an mai innsung sang mi lala ih ti hirm le hmuh suam an tuar. Himi hi number pakhat nak ih hmuhsuam awk nak (bully) a si ih mah le mah zum awk nak an neih nawn lo ih tlun ah mah le mah thah awk nak tiang thlen tu khal a si. 6. Siizung ah Harsat nak Zingzoi nak ah mithau zatek ih 67 pawl cu siizung ah an thau ruangah mualphoh an tuar. Mithau pawl cu mi zaran ai ih natnak nei tam sawn le hrisel lo sawn ih ruah a si tik ah nat an vun neih khal le a cang ding hrimhrim mi a si tiih siibawi le nurse pawl khal in ruah sak an si theu. Cui tlun ah mithau pawl lala khal in nat an neih tam tik ah an natnak dang a um bet khal le siibawi pawl sim ngam lo in an um theu. 7. Sum Lakluh nak George Washington University School of Public Health pawl ih zingzoi nak ah minu thau pawl ih thlahlawh hi minu zaran pawl ai in $8,666 in a mal ih, mipa thau pawl ih thlahlawh hi mipa zaran pawl ai in $4,772 in a mal ti a si. University of Florida ih an hliakhlai nak ah minu mi zaran ai ih pound 25 a zang mi pawl in mi zaran pawl ai in kumkhat ah $15,572 tluk an ngah tam ih minu mi zaran hnak ih pound 25 tlun a rit mi pawl in mi zaran pawl ai in kumkhat ah $13,847 tluk in sum an ngah mal. Source: abcnews
Posted on: Thu, 13 Jun 2013 05:42:06 +0000
Trending Topics
Recently Viewed Topics
© 2015