U monti Pellegrinu s’affaccia ‘nta lu mari. Stinnicchia li so vrazza e poi metti a cantari: “Bongiornu bedda Santa, oggi è festa pi tia. E’ u quinnici di Luglio, vidi quanta allegria!” U iornu du Fistinu è sacru pi Palermu. Ognunu è ‘nchiffaratu, nuddu tu vidi fermu. A genti si pripara pi venerari a Santa. Si ridi, mancia, balla, si scherza e poi si canta. Scinnennu o Foru Italico è quasi tuttu prontu, ogni angolo di strata s’aspetta u granni eventu. C’è chiddu c’arrimina ‘nto granni pignatuni i babbaluci cotti cu l’agghia, ogghiu e limiuni. Cchiù avanti c’è u carrettu cu zuccaru filatu, ricordu i picciriddu, quantu mi n’aiu manciatu! Ca calia e ca simenza cuminci a spizzuliari, e quannu veni a siti, a birra t’ai a calari. U bancu cu muluni, i briosci cu gelatu. Quannu finisci a festa, megghiu s’un t’ai pisatu. Chi granni confusioni, attentu o spingularu, ch’è prontu pi futtìriti tuttu lu to denaru. Quannu sta già scurannu, i genti comu armali cumincianu a muvirisi pi ghiri a Cattedrali. Cumincia a prucissioni, a genti prega e canta: “Io t’addumannu a grazia, mia duci e bedda Santa”. Quannu cu gran fatica s’arriva alla Marina, è quasi menzanotti, e a genti s’arrimina pi vidiri li fochi sparati ‘nta lu cielu: a notti pari iornu, chi granni arcobalenu! A festa ca facemu nuatri palermitani simili un’avi o munnu, e mancu i miricani ca sunnu chini i dollari, pi lu Ringraziamentu, rinescinu a copiari u nostru granni eventu. Pi Santa Rusalia, patruna i ‘sta città, facemu ‘sti gran cosi, chista è la verità. A grazia c’addumannu, pi nui palermitani, è di essiri cchiù buoni, oggi comu a dumani. U quinnici di Luglio è u iornu da so festa, però nuatri tutti mittemunnillu ‘ntesta ca a vera festa è quannu semu ‘nta paci, picchì lu cori ridi, e allura sì felici. Scurdàmunni lu mali, pinsamu e puvireddi, mittemu i latu a mmiria, ca mancia i ciriveddi. Chistu ti promittemu, da Alcamu a Bagheria, ma tu nun abbannunari, o Santa Rusalia!
Posted on: Sun, 14 Jul 2013 14:06:26 +0000