(Vawiin hi kan \hianpa kan u nibawk Chhakchhuakvunga’n min boral san champha a lo ni leh ta reng mai, kan hre reng a ni tih lantir nan post hlui hi ka rawn chhawp chhuak e, lo chhiar ve ngei teh a bîkin infiammi ten) Chhakchhuakvunga kan chân ta written by Tete-a 1987 a ni a, AR Lammual a ni. Mizoram football history-a tournament ropui ber pawl, Laldenga Gold Cup khelh a ni a, Châltlâng rawlthar kum 19 mi Chhakchhuakvunga an tih chuan goal ropui tak tak a thun ta fo mai a, CC-a tia an koh \hin Chhakchhuakvunga chu Mizoramin a hmelhriat \an ta. Mizo footballer awm tawh zinga thiam ber pawla sawi \hin CC-a (kum 40) chuan November 6, Thawhlehni khan chatuan ram min pansan ta a, Châltlâng thlanmualah vui liam a ni. Footballer ropui sulhnu : Football-a talent nei \ha em em CC-a hi a naupan lai a\angin a thiam em em tawh a, 1985-ah Chaltlang football team-ah a khel \an a, kum 17 mi lek a ni. Kum 19 mi a nihin PWD chuan football khel turin an la tawh a, hemi kum hian Laldenga Gold Gup-ah goal 15 thunin top scorer a ni a, Mizoramin a thiamzia a hre \an ta. He tournament-a a khelh \hat em avang hian SAI hnuaiah football zir turin thlan a ni a, a \hiante H. Ramthlengliana, Zohmingliana, Zonunthara(Châltlâng) leh Lalrinsanga-te nen New Delhi-ah an kal a; he hmuna an coach chuan India rama footballer talent nei \ha ber pawl a nih thu a sawi nghe nghe a ni. Tunlai anga India ram pum huapa footballer ropui nih tum phak ta chiah lo chu, Delhi-ah hian a awm tluan tling ta lo a, Mizoramah lo kir lehin a lâr chhunzawm zel. PWD, PHE, Mizoram Police leh AFC-ah te a khel vek a, CYMA-ah Châltlâng a champion-pui bawk a, Junior level a\anga Santosh Trophy thlengin Mizoram team-ah a khel vek a, a vanglaia Mizo footballer-in a thlen phak chin ang chu a thleng kim a tih theih ang. Footballer dik tak mai : 1980s leh 1990s-a Mizoram football fans zingah Chhakchhuakvunga hre lo an awm thiang lo a, an lo awm a nih chuan football fan dik takah chhiar chi a ni lo ang. He attacking midfielder fing lutuk mai hian AR Lammmuala mipui khat tlatte kut ben dur durna tur khawpin ball a khawih thiam a, a ball chawk vel hmuhnawmzia hre ve phak lo chuan a hmu phakte zawt mai rawh u! Ball thiam chungchuang a ni a, pa chak leh tlan chak ni lo mah se a fing em em a, footballer langsar a nih chhan ber pawh a fin vang niin an sawi \hin. Goal thuntu langsar a ni a, goal siamsaktu a ni bawk a, midfield leh forward-ah a khel kawp thei a, a vanglai na nâ na chuan Chhakchhuakvunga hi a ropui a ni. Mihring a ni a, chak lohna a nei a, zu avanga a buai ve \hin avangin a talent a tipung tawk lo a, football ngaina mi tan chuan mi uiawm tâwp a tling - a football nun kawng zawh ropui tak tawpna zuih ta hi \hangtharten inzir nan hmang hlauh se la, CC-a thihna hi footballer naupang zawk tan malsawmnaah a chang thei ang. Ziaktute thukhawchang : Mizorama sports journalist senior leh langsar hmasa Pu VL Sanga chuan, Chhakchhuakvunga kha chu a thiam thlâwt a ni... a skill a sang em em a, pa taima a ni lo a, game thatchhe tak ni chung si khan a thiam ber pawl kha a ni reng mai a, a hun hmaa thiam langsar Victor-a nen khan Lammuala inkhel tawhah chuan an thiam ber mai awm mang e, tiin kan sawi \hin, a ti. Sports journalist lâr Mamuana chuan, Ani tluka footballer talent nei \ha hi an awm ka hre lo... born footballer kan tih ang tak tak hi a ni a, football kha a pianpui a ni ber a, mi zirtir chawp pawh a ni lo. A lâr chhuah tak tak hmain junior level-a a khel ka hmu fuh a, a thiam ka ti em em a, Laldenga Gold Cup-a top scorer a rawn nih pawh khan mak ka ti lo a, mi danglam bik a ni... a thiamzia hre chiang duh chuan a hunlaia a opponent-te zawt mai rawh se, a ti. Mamuana chuan, Tun thleng hian CC-a aia skill nei tha hi ka la hmu lo, a ti hial a ni. Footballer-te fakna chu : CC-a boss leh a teammate, vawi tam tak Mizoram football team captain lo ni tawh F. Lal\anpuia (|PA) chuan, CC-a hian football khelmual pawnah chanchin sawi zui tlak vak a nei lo a, khelmual chhungah hi chuan chanchin a nei ropui khawp mai a, opponent tana player hlauhawm tak a ni ka tih hi sawi fiah thiam dan ber chu a ni mai.... naupang tê a nih lai a\angin ka hre tawh a, a pianpui thiamna hi a sang a, a khel fair em em bawk a, a awm ta lo hi ka ui hle a ni, a ti. PWD captain hlun |PA chuan, Tun hnua ka ngaihtuah hian CC-a movement vel kha a lo European ruih mai ni hian ka hre ber, a ti a, a sawi dik chiah. Mizoram defender langsar \hin Biakchungnunga chuan, CC-a hi chu mi piang vannei bik a ni a, a hunlai khan midangte aiin a thiam bik a ni ti ila kan sawi sual tam lo ang, talent kha a nei \ha em em mai a; amaherawhchu a talent a hmang \angkai tawk lo hi chu ka ui a, hetiang mi vang lutuk kan chân ta hi ka ui takzet a ni, a ti. Amah hre chiangtu thu : Mizoram State Sports Council-a Secretary-te pawh lo ni tawh, Delhi-a football a zirpui thin H. Ramthlengliana chuan, CC-a hi ka hre chiang a, kan khel dun tamin kan inkawp tam a, a thiam a ni. A ke a rang em em a, defence-a ka khelh chângin a ke ranzia hi ka hre chiang a, defender dangte pawh zawt ula a pianpui danglamna awm hi an sawi thei ang... a pa lian lo a; mahse a skillful em em a, a zaidam a, pa nunnem tak mai a ni a, \hiante tana ball siamsak thiam leh selfish lo a ni... ka sawi thiam dan chuan Michael Platini-te ang chi a ni, a ti. Mathlenga chuan, Footballer \hian dangte pawhin an haw lo ang a, CC-a hi chu football thiam lamah chuan kan tluk lo tlang a, tun thleng hian ani anga football thiam hi Mizo zingah ka la hmu leh lo... a hmun ruak hi hnawhkhah a harsa dawn a, kan ui tlang hlea ni, a ti. Coach fakna thu : Delhi-a SAI-a CC-a enkawltu football coach, Arsenal-ahte pawh coaching staff zing pakhat lo ni ve tawh Anjan Chowdhury chuan, India ramah Chhakchhuakvunga anga football talent nei tha hi an awm bik chuang lo ang, tiin a lo sawi hial a; tuna TFA chief coach Ranjan Chowdhury-a u Anjan-a chuan, A kal hrim hrimte pawh hi footballer dik tak a ni e, tiin a lo comment tawh bawk. 1987-a CC-a lo enkawl tawh \hintu football coach Vanlalthlanga chuan, CC-a hi chu rawlthar a nih lai a\anga mi danglam bik a ni a, a thiam dan kha zirtir chawp lam ni loin a pianpui a ni zawk a, Anjan Chowdhury-an Delhi-a a lak dawn pawh khan ka bulah thiama tihzia hi vawi tam tak min hrilh... born footballer kha a ni chiang a, a tum a sang lo lutuk leh a taima tawk lo kha pawi ka ti a, ka ui a ni... tun hnuah India pum huapa lang phak footballer-te kan enkawl ve nual a, CC-a anga talent nei \ha kha chu ka la hmu lo, a ti. (Mizo footballer ka hmuh phak china hmuhnawm ber hriatrengna a ni a, a sei deuh pawh kan inthlahrung duh bik lo e! - Tetea)
Posted on: Wed, 06 Nov 2013 04:27:39 +0000
Trending Topics
Recently Viewed Topics
© 2015