Vote 82.53% a tla tawh; 83% a kai beisei Duty vote thlak lo tan a thlak theih tawh loh Mizorama Election department hotute chuan, Mizoram Assembly inthlanpuia vote tla zat chu Tripura-a Bru vote-te nen 82.53% a nih thu leh, service voter la chhiar turte nen 83% a kai an beisei thu an sawi a; inthlana duty-ten vote an thlak thei lo chungchangah, Khawi lai level-ah emaw lapse a awm a ni mai, an ti. Chief electoral officer, Ashwani Kumar chuan November 30, Inrinni khan I&PR conference hall-ah press conference a nei a; Assembly inthlana vote tla zat chu Bru ho vote-te nen 82.53% a nih thu sawiin, Mamit district chu vote tlak ṭhatna ber niin, 85.59% a tlak thu a sawi a, pahnihna leh pathumna chu Lunglei district (85.45%) leh Serchhip district (84.77%) an nih thu a sawi. Service voter-te tan postal ballot 13,572 a ni a, mahse hetah hian Saiha district-a postal ballot zat hriat a nih loh avangin chhiar tel a ni lo. CEO chuan, vote a tlak ṭhat avangin voter zawng zawng hnenah lawmthu sawiin, inthlanna thianghlim, felfai leh zalen a awm theih nana ṭan latu MPF, kohhran leh pawl dangte chuang lawmthu a sawi a, Vote thlak tura vantlang aurinna hmanga an inaukhawmte kha state danga awm ngai lo a ni a, thil ṭha leh lawmawm tak a ni. Inthlan a rálmuang a, a ṭha tawk hle a ni, a ti. Ashwani Kumar chuan, inthlan leh a kaihhnawihah Model Code of Conduct bawhchhia complaint an dawngte sawiin, chungte chu Election Commission of India-ah an thlen zel thu a sawi. SSA-in National Education Day-a chanchinbua fakna an chhuah chu Chief minister leh Education minister thlalak a chuan avangin dan kalh a nih thu sawiin, ECI-in Mizoram SSA project director lakah warning pe turin min rawn hriattir a ni, a ti. Kohhran pakhatin Ṭawi biala INC candidate, R Lalzirliana tana testimonial a siam chungchanga complaint an dawn pawh ECI-ah an thlen a, ECI thu an nghah mek thu, CEO chuan a sawi a; Aizawl South-II biala MNF candidate, R Tlanghmingthangan nomination a file-na affidavit-ah case nei lo anga a insawi avangin complaint an dawn thu sawiin, chhui chian mek a nih thu a sawi a, Affidavit dik lo a awm chuan, action lak theih a ni, a ti. CEO chuan, inthlanna thianghlim, dik leh felfai a awm theih nan MPF leh YMA te hnathawh chu lawmawm a tih thu a sawi a, an hmalakna avangin inthlanna dik, fel leh muanawm a awm phah a ni. Republic Veng polling station-a vote thlak ṭhat pawh tluang takin a kal a, vote tla pawh a hma aiin a ṭha niin a sawi a, EVM leh VVPAT-a harsatna awm deuh erawh pawi a tih thu a sawi. Ashwani Kumar chuan, tun ṭum Mizoram inthlanpui atan hian cheng vbc. 24.3 ruahman a nih thu leh, sum awm zat hi an hman zawh loh thu a sawi bawk. CEO ṭawiawmtu, joint CEO, H Lalengmawia chuan, Republic Veng poling station I-a presiding officer leh poling officer-te thil tih dan chu ECI-ah an thlen tawh a, naktuk Thawhlehni-ah ECI thutlukna an hriat hman mai theih thu a sawi a; Sihphir leh East Lungdar-a EVM-a vote tla leh paper record inmil lote chu ECI thu angin an chinfel thu leh Mizoram pumah EVM thlak ngai pariat a awm thu a sawi bawk. H Lalengmawia chuan, inthlanah khan VVPAT chu Aizawl khawpui chhunga polling station 217-ah hman a nih thu sawiin, Thil kal tluang lo a awm zeuh avangin VVPAT siamtu company, ECIL chu ECI-in December 3-ah kan ko a ni, a ti. Assam-a awm mek, Mizo 3rd IR police-ten vote an thlak theihna tur dan an hmuh loh tu sawiin, H Lalengmawia chuan, Service voter turin an dil lo, a ti. Jt. CEO sawi danin, inthlan hma deuh tawhah Police headquarters aṭangin an hming list Election-ah an thawn a, list chu DEO tinah thawnin, instruction pek an ni a; Mamit leh Champhai DEO-te chuan postal ballot 110 an lo thawn hman a, mahse chungte chu tihsual palh a ni a, lak let leh tur a ni. Zawhna chhangin, CEO leh Jt. CEO chuan, inthlana duty ṭhenkhat, a bikin motor driver-te leh conductor eng emaw zatin vote an thlak thei lo chu pawi an tih thu sawiin, inthlan zawh tawh hnuah chuan vote thlaktir theih an nih tawh loh thu an sawi a, Inthlan duty-a an chhuah hmaa vote thlak vek tur a ni a, RO-ten an thlaktir vek tur a ni. Tunah chuan a zo tawh a, tih theih a ni tawh lo. Tih tur tih tawk loh vang a ni a... khawi level-ah emaw lapse a awm a ni, a ti. - See more at: vanglaini.org/tualchhung/12191#sthash.jWxDD9Lx.dpuf
Posted on: Mon, 02 Dec 2013 05:18:32 +0000
Trending Topics
Recently Viewed Topics
© 2015