Willemstad – Minister di Desaroyo Ekonómiko Sr. Stanley Palm lo enkabesá un delegashon di Kòrsou ku lo partisipá na e di 9 konferensha Ministerial di World Trade Organization (WTO) den e promé siman di Desèmber 2013. Segun Minister Palm : “Kòrsou su partisipashon na e konferensha aki ta importante pa motibu ku WTO ta e organisashon ku ta fasilitá komersio internashonal. Komersio internashonal ta importante pa Kòrsou pasombra esaki ta kontribuí na mas ekonomia, mas trabou i mas plaka den sirkulashon”. E konferensha aki, konosí komo MC9, ta tuma lugá kada 2 aña i e aña aki lo ta na Bali, Indonesia. Aki e delegashon di Kòrsou lo topa ku e delegashonnan di e sobra miembronan di Reino. Minister di Komersio Internashonal di Hulanda Sra. Ploumen lo lidera e delegashon di Reino ku lo konsistí banda di Minister Palm, tambe di Minister Richardson di Desaroyo Ekonómiko di St. Maarten. Banda di Minister Palm pa Kòrsou lo partisipá Direktor di Relashonnan Ekonómiko Internashonal di Ministerio di Desaroyo Ekonómiko (MEO), Representante di Duana i nan konseheronan. Den kuadro di desaroyá e ekonomia lokal di nos pais dor di mehorá e relashonnan internashonal, Gobièrnu di Kòrsou tin e vishon pa posishoná Kòrsou komo un punto di konekshon òf hub regional pa e tráfiko di komersio i servisio internashonal. Dor di kumpli ku e kondishonnan di WTO nos lo por stimulá hasimentu di negoshi internashonal riba un skala mas grandi. Dor di komprometé òf mara nos tarifanan di impuesto di importashon nos por sera akuerdonan ku paisnan o blokenan aduanal (p.e.Caricom) pa asina nos por stimulá komersio mutuo. Tin e vishon tambe pa bira un miembro independiente di WTO den futuro serkano ku ta duna nos akseso na programanan i apoyo tékniko. Na e momentonan aki 159 pais ta miembro di WTO. Pakiko e konferensha spesífiko aki ta importante? MC9 lo bai ta diferente for di otro konferenshanan. Den e kaso aki lo e ta mas fuerte riba tereno di Fasilitashon di Komersio Internashonal, Agrikultura i Desaroyo. Tambe lo trata na yega na un akuerdo riba tereno di Teknologia di Informashon. Durante di e konferensha aki por lobby i netwerk ku Ministernan di Ekonomia i Komersio di tur e paisnan partisipante. Banda di esei lo por tin kòmbersashonnan bilateral ku Merka i ku Sekretariado di WTO pa nos por yega na akuerdonan pa nos finalisá nos trayekto pa kumpli ku kondishonnan i mara nos tarifanan aduanal na WTO. Tambe ta e intenshon pa durante e dianan na Bali kuminsá notifiká vários di nos sosionan komersial ku nos ta bai kumpli ku WTO i ke yega na akuerdonan i relashonnan bilateral ku nan pa asina amplia e merkado pa kompanianan eksistente i otronan ku por bin establesé na Kòrsou tin un merkado grandi pa kua nan por eksportá produkto i servisio. Ta p’esei ta importante pa desaroyá ekspertisio i struktura pa asina nos por saka mihó benefisio for di e trayekto aki. Pa 2014 MEO ta bai establesé un unit ku lo spesialisá den e materia WTO. Ku un delegashon highprofile asina Kòrsou lo sòru pa profilá su mes i dal e stap pa finalisá e trayekto pa kumpli ku e kondishonnan di WTO.
Posted on: Fri, 22 Nov 2013 01:26:51 +0000
Trending Topics
Recently Viewed Topics
© 2015