ZAN THLAVAIUM Ramthienghlim Varte Ei Hmar hla kungpui Rev Thangngur-in Zan Thlavaium ti hla a phuok, Independent Kohran Hlabu No 39-na Pu H. Zaneisang, THURO Editorial Board a Editor -In-Chief-in chipchier deuva a suina THURO ( A quarterly Literary Journal of the Hmar Literature Society) Vol X. Issue No. 02 (April- June 2013) khan insuo’n a um a. A hla thua chang hnina a sui dan chuh hiengang hin : “A chang hnina ei hei tlunga, a hla thua ei hmu danin kha zan thlavaium a khan ei Lal Isu chuh a rawihai leh doral tuok dinga huon tieng panin, lungngai beidawng taka an inzui dal dal lai ei mitthla thei a. Kha zan thlavaiuma khan a rawihaiin anlo inlusuksan vawng lai, ei Lal Isu ruok chu a khat chauvin ‘Thlan thisen suok khawpin, zan khuo’n a tawngtai a’ ti thu ei hmu a…Pu Thangngur lawm lawm chun, kha zan thlavaium taka khan ei Lalpa Isu thlan chu ( kha) thisen lawm lawm chun a far nawh ti chu a hriet em naw di’m mani ? Annawleh, hi lai thu tak hi mithiemhaiin ‘Poetic License’ an ti group ah thlakin ei pawm zam el thei ding am ? Poetic License thangsana hi hla phuoktu’n Bible tawng indik hlel deuva a sam, hei nghainathiem el nek chun; tulai kohran thuoitu , Bible School-a Theological Degree lahai chenin ‘Isu thlan thisena an la’n fartir zing thu, mihai mi hril khawm ni lo, mani nakawr ngeia ka hriet chang lem hin chu, mani piengpui tawng ngei ngei khawm ei thiemnaw zie le ei chika ei fimkhur nawzie a min ngaituotir hlak. Hi hla phuoktu Rev Thangngur khawm hin Luka Bung 22:44 ‘Chun a lung an rim bek bek leiin thahnem ngai nawk zuolin a tawngtai a , a thlan chu thisen far lien tak angin hnuoiah a zuk far a’ ti lai thu hi a man suol ve deu amanih ding aw ? ti theiin a um. Hi lai Bible thu hi alo man thel ve met a ni khawma a mak lem naw ie, Ei hril tah angin, Gospel Centenary ei hmang hiel ta tahnung khawm a, thuhriltu thenkhat, Isu thlan thisena lan fartir….an la um zing si a “ tiin. Chubakah, A ziekhai la hei thurdawk sa pei ei tih “ A iengpo khawm chu lo nisien, ei thuring inziekna Bible chun kha zan thlavaiumum, Isu an man ding zan a lungngaina hril ruollo tuor a Getsemani-a ei Lalpa Isu a tawngtai tum khan; a thlan, thisen ema a far naw leiin, ei hla chai mek chang 2-na, tlar 3-na le tlar 4-na hi chu, a phuoktu Pu Thangngur lo um ta naw sien khawm : ‘Lal chu ama chauvin, thlan thisen ieng farin, zan khuo’n a tawngtai a ‘ ti’n zuk hem met ta ang inla, phuoktu thlarau khawmin ami pawmpui vieu tho naw di’m a ni aw…”tiin. Hi article ka tiemzova lungril a hung inlang chuh Prof. L. Infimate lekhabu siem “THINA RAPTHLAK” kum iemani zat liem tah a ka lo hmelhriet tah, an khattawka ka lekhabu hmang tangkai em em hlak hi a nih. Chu Lekhabu “THINA RAPTHLAK “ ti Dr Lallukhum Fimate M.D.-in a ziek, L&R Printing Press, Churachandpur, kum 1993-a sut a nih. Hi leklhabu Bung 7-na ‘Thlantui thisen anga far khah’ ti page 27-28 a chun thlantui thisen anga far tihi thil um thei ani zie a ziek a. Hiengang hin : “ Thlantui thisen anga far tihi thil um thei a ngai a ni ? Thil um thei a ngai chu a nih ti chuh a dawnna a nih. Chu chungchang thua chun Dawktawrhai lo sui dan chun hienganghin hang tarlang ei tih. Dawktawrhai chun HEMOHYDROSIS tiin an kova, chu chu thlana thisen suok amani thisen kai tina a nih….An lo suidan chun, thisen luong le fekuol dan (vascular dynamics) zuk danglam lei a thisen zungzam a luong tlang theina lei ni takin an hril. Kha hun Isu a lungngai em emna a khan a hrietna hrui (autonomic nervous system ) suklienin a thizam hmawrtehai (capillaries) sukmar a ta, chu chun a sunga thisenhai chuh banga inthawk a inrel dawkin vuna thlankuo (sweatpores)-a hai inrel lut a ta, chuonga inthawk chun thlan chu thisenin a pawl met hlak hrim a nih. Hienganga Dawktawrhai hrilfiena hih thil um thei awium takel a nih” tiin. Office a baibul ka tiemve hlak ‘The Family Devotional Bible Study’ a Luka Bung 22:44 chun “And his sweat was like drops of blood falling to the ground” (A thlantui chuh thisen anga farin) ti a nih. Buoipui bek bek dinga kalo ngailo Pu H.Zaneisangin a hei sui chet chet a, thlantui thisen ang a far chuh thil thei derlova a sie el bakah Baibul School-a Theological Degree lahai chenin ‘Isu thlan thisena an la’n fartir zing thu, mihai mi hril khawm ni lo, mani nakawr ngeia ka hriet chang lem hin chu, mani piengpui tawng ngei ngei khawm ei thiemnaw zie le ei chika ei fimkhur nawzie a min ngaituotir hlak’ ti khawpa a hung sawisel le Prof. Lallukhum Fimate’n thlantui thisen anga far chuh a thei zie medical tiengpang besan a a hungziek hih a ieng lem am andik ta ding chu maw. A chunga Pu H. Zaneisangin a hung zieklang ta angin ei Baibul Scholar hiengzat eium tahnung khawma hienganga layment haiin Hmar tawnga Baibul inlet min an tawng annawleh sawisel/lepsenna a um changin Beram nunnem anga an bau an huptlat hlak hi makve tak a nih. An kuong min an nawr pek khawma to tawk tawk ku chuh.
Posted on: Mon, 03 Feb 2014 11:58:16 +0000
Trending Topics
Recently Viewed Topics
© 2015