#ZF_Tualchhung MFA News : Match Commissioner Training khar a ni ta 1. Match Commissioner Training khar: Mizorama a vawi khatna atan MFA chuan Match Commissioner Training a buatsaih chu August 7 (Nilaini) khan Tourist Lodge, Chaltlangah khar a ni a, August 7 zanah Hotel Ritz-ah zanriah kilin certificate hlanna hun hman a ni. He hunah hian All India Football Federation Head of Referees Department, Col Gautam Kar chu resource person a ni a, ani hi MFA-in a chah chhuah a ni. August 5 atangin training hi a kalpui a, chawhma lamah theory class neiin chawhnu lamah Independence Day Football khelhna Mualpuiah practical class neih chhunzawm thin a ni. District hrang hrang leh MFA atangin match commissioner-a hman theih tur mi 11-in training hi an nei a ni. Col Gautam Kar chuan, "Mizoramin football-a hmasawn in tum dan hi AIFF duhzawng a ni a, AIFF-in Referee Development Course a kalpui piah lamah nangmahni thahnemngaihna leh in sensoa Match Commissioner tana training in buatsaih duh hi ka lawm takzet a ni. Hei hian hmasawn in tum tak tak tih a tichiang a, AIFF lam pawhin kan hre reng ang," a ti. Gautam Kar hi FIFA referee hlui a ni a, FIFA Match Commissioner a nih bakah amah chiah hi India rama Match Commissioner-te training pe thei awm chhun a ni. 2. MFA-in Mizo pasarih awm lawmawm a ti Indian National Under-19 Team, Shanghai-a zin chhuak zinga Mizo pasarih an tel chu Mizoram Football Association chuan lawmawm a ti a, player pasarihte a chhuang hle. He India junior team hi Goa-a AIFF Elite Academy-a awm mek an ni a, August 17 leh August 19-ah China nen an inkhel ang. October-a Under 19 AFC Qualifiers khel tura inbuatsaih mek an ni. Mizo awmte chu - Joseph Lalfakzuala, College Veng; Zodingliana, Armed Veng; Isaac Vanmalsawma, Hnahthial; Jacob Lalrawngbawa, Tlungvel; Daniel Lalhlimpuia, Serchhip; Lalramzauva Khiangte, Luangmual leh Lalrempuia, Lunglei-te an ni. 3. MFA-in Mama leh Didika duhsakna hlan India National team leh Tajikistan-in friendly match an khelh tura India rama player 20 thlan chhuan zinga Mizo player pahnih Lalrindika Ralte (Didika) leh S. Malsawmtluanga (Mama) te an tel chu MFA chuan lawmawm a ti a, an inkhelhna tura duhsakna a hlan. India hian August 14, 2013 hian Khujand,Tajikistan-ah Tajikistan nen friendly match an khel dawn a ni. zofooty/news/mfa-news-match-commissioner-training-khar-a-ni-ta.html
Posted on: Thu, 08 Aug 2013 05:02:46 +0000
Trending Topics
Recently Viewed Topics
© 2015