Zanin chu engnge maw ka hriat a, trul ûk lohah ngaihtuahna ka sen vak mai le. Mutchhuak hnawttriau vek khawpin ram kalsiam inher mek hian mi mawlh tlat mai. Kan hma lawkah inthlanpui kan hmachhawn dawn a, rorelna fawng vawn ngei tumin kei ka ni inti thriauten iptepui an ak tran mek ta chu a nia. Ngaihtuahna tithuia dawn tiseitu ni ta chu, heng ram rorelna dawhkan kil tura mi inpete dinhmun leh nihna an tarlante hi a ni. Candidate threnkhatte chanchin ka han chhiar a, naupangte annihlai atranga mihausa fa a seilian an awm ta nual mai. A thrente phei chuan retheihna chu sawi loh rethei tih thumal takngial pawh hi an hrilhfiah thiam dawn em maw ni le. Trulna avanga vawikhatmah ramchang hling la rap ngai lote hian mirethei inchhungah naia sen pawh a awm loh ni a awm thrin a ni tihte hi an awih thei ngai hian ka ring lo. Hetiang miten tun atranga ro an rel chhoh chuan kan ram hian retheihna zung a phawk ngai hian ka ring lo a ni. Sang takah hmasawnna hrui an zam ang a, nitina feh kawngtrum zawh thrinte tan chuan lawh phak ava ni dawn lo rua em. Aw...kan ram hian, retheihna hrualfip, tumruhna vanga thiamna dawhsan kai ve trawk trawk, intodelh tawk leka mahni thawhchhuah ring ngam, pa fing leh angaihna hria 30 rual tal a kawlru khiau lo emaw ni le? Tun dinhmunah rih hi chuan mi hausate rorelna hnuaia kun hi kan ram riang lutuk hian ala dawl mawlh lo asin. Engpawh ni se, Kan Pathian hian min ensan em lovang chu. Tui taka mut tum phawt ila.
Posted on: Thu, 07 Nov 2013 17:03:47 +0000
Trending Topics
Recently Viewed Topics
© 2015