أيام الجامعة كنت من الإخوان - مع الأسف يعني - المهم جينا ( طلبة الإخوان ) حطينا مكتب استعلامات لينا في مدخل مبنى من مباني الجامعة ، نزل وكيل الكلية : - شيل يا ابني انت وهوا المكتب ده من هنا ده مدخل مبنى بتدخل منه الناس وتخرج ما ينفعش كده !! .. مسئول الإخوان في الكلية "الأخ أحمد" زعق هوا كمان للدكتور : -لأ مش حنشيل المكتب .. الدكتور اتنرفز قام زق المكتب زقة خفيفة كده وقال : -بقولك شيل البتاع ده من هنا من هنا يلا .. الأخ أحمد اتشنج وقام مسك مصحف الجيب بتاع حد من زمايلنا كان سايبه ع المكتب وقام رفع المصحف وفضل يزعق في الكلية : - الدكتور بيرمي المصحف .. الدكتور بيزق المصحف ع الأرض !! .. كتاب ربنا !! ، الدكتور بيقول على كتاب ربنا البتاع ده !!! .. .. تعملوا كده في كتاب ربنا !! .. الناس أتلمت .. الدكتور أرتبك وانسحب وهوا وشه محمر ومخضوض !! .. وارتسمت ارتسامة رضا الإنتصار الخفيفة على وش الأخ احمد مسئول الكلية ... بفتكر الحوار ده كل ما اشوف الإخوان يضربوا المعارضين وبعدين لما الناس تتكاتر عليهم يجروا يستخبوا جوة جامع ويقولك حصار المساجد !! ، وهما بيقطعوا الطرق ويقولك صلاة التراويح علشان اللي يضربهم يبقى بيضربهم وهما بيصلوا !! .. الإخوان يجيدوا استخدام الرموز الدينية في مصلحتهم بوساخة ليس لها مثيل !.
Posted on: Mon, 15 Jul 2013 19:08:29 +0000