تونس انا و انت و هي ، تونس الحوم الشعبيّة و شقانس البرجوازية ، تونس تع الناس بالناس و الناس بالله ، تونس متع ريحة الياسمينة اللي تجيبها نسمة الليل ، تونس متع اللّمة في الحومة و الضحكة من القلب ، تونس تع سيغارو في زوز و امي اعملّي عجّة راني ما ناكلش الرّوز ، تونس متع الكسكسي بالعصبان و ليلة متعشّي و ليلة تبات جيعان اما ديما نضحكو و ما يبات حد غضبان ، تونس تع القهوة العربي و السروال العربي و الشاشية الحمرا دم ، تونس ضحكة الصغير و تبسيمة الكبير ، تونس الصناديد و ضربان الفوشيك في رمضان و العيد ، تونس اللي سرقنا فيها البوصاع من دار الجار و شبعنا فيها لزّ و دزّ في الميترو و الكار ، تونس الشمس اللي تحرق و الخدّام اللي يعرق و اللي يركب البحر و يحرق و يقمّر يوصل و الا يغرق ، تونس هي الفرحة اللي تلمّ و الكانون ببخورو بش يطيّر الهمّ و الغمّ ... تونس حكاية عشقة ، صحيح هي جنّة و العيشة فيها نار ، اما وكرك وكرك و هاكي البلاد اللي فيها تولدنا و فيها تربينا و فيها نحبو نموتو فيها
Posted on: Wed, 14 Aug 2013 15:57:50 +0000
Trending Topics
Recently Viewed Topics
© 2015