ငြိမ်းချမ်းရေး မရှိဘဲ ကျေးလက်ဒေသ ဖွံ့ဖြိုးရေး မလုပ်နိုင်သောကြောင့် ငြိမ်းချမ်းရေး မရရအောင် ဆောင်ရွက်နေဟု ၀န်ကြီးဦးအောင်မင်း ပြောကြား Created on Sunday, 18 August 2013 03:04 AddThis Social Bookmark Button သြဂုတ် ၁၇ ရက်က Myanmar Peace Center တွင် ကျင်းပပြုလုပ်သော နိုင်ငံတော်သမ္မတ၏ ကျေးလက်ဒေသ ဖွံ့ဖြိုးရေး စီမံကိန်းအတွက် ပြည်ထောင်စုဝန်ကြီးများနှင့် INGO များ၊ NGO များ၊ လုပ်ငန်းရှင်များ၊ ပညာရှင်များ တွေ့ဆုံပွဲတွင် ပြည်ထောင်စုဝန်ကြီး ဦးအောင်မင်းက ငြိမ်းချမ်းရေးမရှိဘဲ ကျေးလက်ဒေသ ဖွံ့ဖြိုးရေး မလုပ်နိုင်သောကြောင့် ငြိမ်းချမ်းရေး မရရအောင် ဆောင်ရွက်နေဟု ပြောကြားခဲ့သည်။ ပဋိပက္ခများ ဖြစ်ပွားရခြင်း၏ အဓိက အကြောင်းရင်းမှာလည်း ပညာမတတ်မှု၊ ဖွံ့ဖြိုးတိုးတက်မှု နောက်ကျခြင်းများကြောင့်ဖြစ်ပြီး ယင်းပြဿနာများ ဖြေရှင်းနိုင်မှသာ နိုင်ငံတော် ဖွံ့ဖြိုးတိုးတက်မည်ဟုလည်း ဦးအောင်မင်းက ပြောကြားသည်။ ပြည်ထောင်စုဝန်ကြီး ဦးအောင်မင်းက "ကျွန်တော့်အနေနဲ့ နိုင်ငံတော်မှာ ပဋိပက္ခ ဖြေရှင်းတဲ့ ကိစ္စတွေကို အဓိကထားပြီး ဆောင်ရွက်ရပါတယ်။ အဲဒီလို ဆောင်ရွက်တဲ့အခါမှာ အဓိက ဒီပြဿနာတွေ ဖြစ်ရတဲ့ အကြောင်းရင်းက ကျွန်တော်တို့နိုင်ငံကလူတွေ ပညာမတတ်လို့ ဖွံ့ဖြိုးတိုးတက်မှု နောက်ကျလို့ဆိုတဲ့ အချက်နှစ်ချက်ကို သွားတွေ့ရပါတယ်။ ဒီကိစ္စတွေကို ဖြေရှင်းပြီး လုပ်နိုင်မှ ကျွန်တော်တို့နိုင်ငံတော် ဖွံ့ဖြိုးတိုးတက်လာမှာ ဖြစ်ပါတယ်" ဟု ပြောကြားသည်။ "အခုအခါမှာ ခေတ်တွေစနစ်တွေလည်း ပြောင်းပါပြီ။ ပြည်သူတွေပါဝင်ပြီး လုပ်ဆောင်ရမည့်ခေတ်ကို ရောက်လာပါပြီ။ ပြည်သူတွေရဲ့ အခန်းကဏ္ဍက အရေးကြီးပါတယ်။ ကျေးလက်ဒေသ ဖွံ့ဖြိုးရေးဟာ ငြိမ်းချမ်းရေး မရှိဘဲနဲ့ လုပ်လို့မရပါဘူး။ အခုငြိမ်းချမ်းရေးကို မရရအောင် ဆောင်ရွက်နေပါတယ်။ ငြိမ်းချမ်းရေး ရရှိလာတာနဲ့အမျှ ကျေးလက်ဒေသ ဖွံ့ဖြိုးတိုးတက်ရေး ကိစ္စများကို တိုးချဲ့ပြီး ဆောင်ရွက်သွားမှာ ဖြစ်ပါတယ်" ဟု ပြည်ထောင်စုဝန်ကြီး ဦးအောင်မင်းက ဆက်လက်ပြောကြားသည်။ လက်ရှိအချိန်တွင် အစိုးရငြိမ်းချမ်းရေး ဖော်ဆောင်ရေးအဖွဲ့နှင့် တိုင်းရင်းသား လက်နက်ကိုင်အဖွဲ့ ၁၄ ဖွဲ့နှင့် ငြိမ်းချမ်းရေး ဆွေးနွေးပြီးဖြစ်ကြောင်းနှင့် သုံးလ၀န်းကျင်အတွင်း တစ်နိုင်ငံလုံး အတိုင်းအတာ အပစ်အခတ်ရပ်စဲရေး သဘောတူညီမှု လက်မှတ်ရေးထိုးနိုင်ရေး ဆောင်ရွက်နေသည်ဟု ပြည်ထောင်စုဝန်ကြီး ဦးအောင်မင်းက သြဂုတ် ၁၀ ရက်က ပြောကြားထားသည်။
Posted on: Sun, 18 Aug 2013 14:16:39 +0000
Trending Topics
Recently Viewed Topics
© 2015