NU LEH PA HLUTNA I pa, a hringtu che thu pawm la, I nu chu a lo tarin hmusit suh (Thuf. 23:22). Nu leh pate hlutna sawi chhuak tur hian mihring tawngin a daih lo a, a phawk chhuak zo bawk hek lo. Van tawng hawh a ngai a, mahse, van tawng hmang turin van nun kan la tem loh avang leh leiah kan la chen miau avangin lei tawng kan hmang mai a ni ang chu! He khawvela mihringte leh rannung/ransa te hian thlahtu nu leh pa kan nei theuh a. Chung min thlahtu kan nu leh pate chuan hlutna thuk leh ril an nei a. Midang tan hlu lo mah se, an fate tan chuan an aia hlu sawi leh chuan tur a awm lo. Chutiang khawpa hlu kan nu leh pate chu kan pi leh pute hun atanga tun hun thlenga an dinhmun leh hlutnate pho chhuah kan tum ang a. ‘A kim loin kan hril thina’ tih ang kha kan thunawn a nih hmel hle mai. Kristian nih hmaa nu leh pate dinhmun Zofate Kristian kan nih hma nun kha ‘ringlomi’ nun tiin kan sawi fova, ka lai a na deuh. Rin chu an nei ve ngei a, Kristiante rin dan nen a inpersan avanga ringlomi ti mai loin ‘rinna hrang vuantute’ ti mai ila, a fel mai awm e. A chhan chu, ringtu intite hian nu leh pa zah leh ngaih pawimawh kawngah ringlomi kan tih zinga kan pi leh pute kha kan pha tlat si lo niin a lang. Kan pi leh pute khawtlangah khan nu leh pate an hlu em em mai a. Chhungkua enkawltu leh khaidingtu ber chu ‘pa’ an ni. Pa chu chhungkaw khawsak inrelbawl kawng engkima thu pawtchattu leh thutawp siamtu a ni a. Chaw ei laiin pa berin chhungkaw khawsak dan tur a fate a hrilh a, nunphung a zirtir a, hringnun khawvela mihringte kan chenhonaa nun hman dan tur a kawhhmuh bawk. Kan pi leh pute hun atanga vawiin thlenga khawvel mihringtena kan ngaihsan em em ‘rinawmna’ vawng tlat turin thu a fah a, tlawmngaihna nen an hringnun zin kawng zawh turin a zirtir thin a ni. Tin, pa chuan a nupui fanaute chu sa leh ral lakah muang taka an awm theih nan a veng a, a humhim thin. Buh leh balah a chhungten tlai khawp an hmuh theih nan leh mi ak ruala an ak ve theihna atan kawla ni chhuak chhiarin a feh nitin a, thlantui luang zawih zawihin a nupui fanaute tan a inpumpek a ni. Pain a fate thua a tuh chu nuin a kui tiak a, hmangaihnain a chawm lian a. Duhsakna leh lainatnain a enkawl a, mut mu tuah loin a chawi tlei thin a ni. A pasal fanaute thawh hmain tui a chawi a, ei rawngbawl pahin buh a deng a, a thap nghal bawk thin. Hah hnepa hlo a thlawh nilen hnuin thing a phur haw a, nau riltam tapin a lo hmuak a, ar lawi pahin vawk chaw a pe a, ei rawng a bawl a. A tuk atan a inhmakhua leh a, chutiang reng reng chuan tul takin hun a hmang a, mawng vawmba ang sekin a buai nitin thin a ni. Chutiang chuan kan pi leh pute hunah khan nu leh pate hian fate tan an inhmang zo a, an pawimawh em avang khan chhungkua tizahawmtu anni kan tithei awm e. Pa awm lohna chhungkua chu mi tinin an ngamtlak a, nu leh pa uaplum loha khawsate ngat phei chu an Nuthuri zuam a. Kan pi leh pute khan, ‘fahrah an va hmusit ve’ kan ti mai thei e, mahse, fahrah an hmuhsit hrim hrim vang ni loin nu leh pate hian in chhungkhur an timawi a, an tizahawm a ni tih kha an hriatchian em vang zawk a ni. Kristian nih hnua nu leh pate dinhmun Kan la hmelhriat ngai hauh loh leh la chulnel ngai miah loh Krista Chanchin Tha chu kum 1894 khan Mizote khawtlangah a rawn tum vung mai a. Chu sakhua thar chuan hun reilote chhungin min lem zo duak a, a mak a makin min tihmasawn a. Kan nunphungte chu kan chhuahtlang hlui nen a inpersan ta hret hret niin a lang. Chutianga kan rilru leh khawsak dan lo danglam tak hnuah pawh chuan nu leh pate hlutna leh pawimawhna chu a la ngai reng a. Hun a lo inher zel a. Nupaa nitin feh chhuaka, hah taka thlantui far zawih zawiha tuthlawh huma hlo thlo thin khan, daihlim hnuaiah pen humin pa berin chhungkua a chawm a, nuin in chhungkhur a enkawl ve thung a. Pain a fate chu thu tha hla tha hmangin a zirtir a, nu berin lo thlawpin fate thatna tur kawng a lo dap ve bawk thin a ni. Pain a fate chu Chatuan nun nei turin kawng a kawhhmuh laiin nu berin tawngtaina nen hma a lo la ve bawk a, he lei ngeiah pawh vanram kan tem lawk theihna atan kan nu leh pate hian theihtawp an chhuah a. Kan pi leh pute huna an pawimawh leh hlut ang bawk khan an la hlu chhunzawm zel a ni. Engvanga hlu nge an nih? Kan nu leh pate hlutna kan varpawh theihna atan nu office leh pa chanvote I’n Chhura buh en thuak thuak teh ang. a) Nu Office Nu office hi office azawnga buai leh chinfel tur tam berna office a ni, kan tithei awm e. Office dangte angin lehkha lut leh chhuak file that tur awm lo mah se la, chung aia hautak zawk thawktu chu nute hi an ni. A chang chuan counselor hna a thawk a, Pastor hna vawn chang a nei a, roreltu nih fawmkem bawkin thu-buai hla-buai a rem a. Doctor hna a vuan tel a, nurse nih a kep bawk. Ei siamtu leh waiter nih a kawp a; manager hna emaw a thawh kan tih laiin chawkidar hna a thawk tel lawp lawp bawk si. Mawng pawh hung hman lo khawpin buai reng rengin fate tan a inpumpek a ni. A faten mi kan an loh hlauin thlantui bakah mittui leh hnaptui nen lam far khawpin an thawkrim thin. Fate hmangaihna avangin aw-rawl vin tak chhuah chang an nei a. D key atanga C key-a aw-ki thlak chan lah an ngah nangiang. Heng zawng zawng hi an sual leh thinchhiat vang ni loin fate min hmangaih leh min duhsakna avang liau liau a ni a. Nu leh pa avanga piang zawng zawng, anmahni avanga fa dinhmun roluahtute hian kan hriatthiama an hlutna hi kan man fuh a pawimawh hle. b) Pa chanvo Pa mawhphurhna leh chanvo hi nu office ang em em chuan buaichuar lo mah se, a hautak em em a ni. An faten pangti dam taka hun bi kan chhiar theih nan leh mi silh ang leh fen ang kan inthuam a, thiamna kan neih nan theihtawp min chhuahpui thin a ni. Nu office lama hna thenkhat chu buaipui hman lem lo mah se, a awpkhawm a, a uaplum a, a thlamuan thin. A nupui fanaute tui tak leh thlamuang taka kan mut der der laiin, khumlai zawlah kut pahnih khama, thosilen chunglam melh ran chungin a fate tan malsawmna a nih theih dan tur a ngaihtuah a. Kan pi leh pute hun ang khan sa leh ral awm tawh lo mah se, chung aia hlauhawm zaw-mah tunlai sualna chi hrang hrang laka a fate him theih dan tur kawng a dap a. Lalin a khua leh tuite thatna tur a ngaihtuah angin a fate thatna tur a ngaihtuah a. A nupui tan pasal tha (husband) a nih theih nan leh a fate tan pasaltha(knight) ni thei tura kawng zawngtu chu pa te hi an ni a. Nu office lam atanga tih harsa leh tih theih loh tam tak an rawn thlen bawhzuite phei chu a hna a ni a, a ritin a hautak hle a ni. Aw le, nu office buai theihzia leh pa chanvo rihzia kan sep rawtui nual tawh a. Khati zawngah pawh khan nu leh pa hlutna chu kan sawi tam ta malh malh hle. Tunah chuan kan tana an hlutna bik thenkhat thlir ho kan tum ang a, engvangin nge kan tan an hlut em em tih chuan:- 1). Mihring min nihtirtute an ni: Min hringtute chu nu leh pate hi an nih thu kan tarlang nual tawh a. Anmahni avangin he khawvel eng kan lo hmu a. He kan chenna leilung kan luah vang ngawt hian mihring kan ni mai lo. A nih leh mihring kan tihte chu tute nge ni ta ang? E le, Bible-in a sawi anga, mahni tana nung lo a, midangte tana nun hmangtute, rinawmna avanga tuar pawh huama diknaa huaisen taka ding thin te, he kan chen honaa midangte ngai chang thiam mi te, mite chhiatna ni loa thatna tura hun leh ngaihtuahna hmang thintu te leh miin a zar an zo theih ang chite hi mihring nuna lang chhuak thin a ni a. Chutiang nun letliam chiaha khawsa thintute nun chu ransa ang lek an nih avangin mihring an tling zo lo a ni ti ila kan thu a khauh lutuk em lo ang chu. Chu mihring nihna min petu leh nihtirtu chu kan nu leh pate hi an ni a. Mi mawlte mah ni se an thiam ang tawk leh phak ang tawkin min kaihhruai a. Nun tak, nun tlang leh nun mawite chu dawr atanga min leisak a ni lova, an mi zirtirna avang liau liaua nei thei chauh kan ni. Kan nu leh pate hi awm ta lo se la, chu nun chu kan nei/kawl kher awm lo e. Electric bulb siam chhuaktu Thomas Alva Edison te, America President hmasa ber George Washington te, Scientist ropui Sir Isaac Newton te leh Mizo pa ropui H.T.Sangliana te hi an nu leh paten mihring ni tura zirtirna an pek that avanga midangte tana malsawmna ni thei an lo ni a. Nu leh pate hi an va han hlu tak em… 2). Malsawmna hnar an ni Malsawmna tih hian sumpaia hausakna chauh hi kan kawhtir deuh vung thin a. Heng hriselna te, chhungkaw hlim tlanna te, fanau mirna te leh thiamna te pawh hi ‘malsawmna’ vek a ni. He malsawmna hi nu leh pa kaltlanga Pathian hnen atanga kan dawn a ni a. Thuthlung Hlui hun lai atang tawh khan pain a fa mal a sawm (e.g., Isaakan a fapa Jakoba mal a sawm) tih kan hmu a ni. Keini Mizo khawtlangah pawh nu leh paten an fate mal an sawm a, buh leh balah te, fanauah te leh ran vulh kawngahte an lo hmuingil thin. Nu leh pa thuawih lote erawh chu nu leh paten an tuithlar mai bakah anchhia hial an lawh a, chung mite chu an dam chhungin malsawmnain a kiansan thin a ni. Kan Lehkhabu Thianghlim chuan, “Tupawh a nu emaw, a pa emaw sawichhia apiang chu thi mawlh rawh se,” (Mt. 15:4b) a lo tihial a. He thu-ina sawi a tum tak chu nu leh pate hi malsawm dawnna hnar an ni a, an thu awih loh chu malsawm dawn lohna mai ni loin thihna a ni, a tihna a ni. Chuvangin, he khawvela kan chen chhunga malsawmnate kan dawnna hnar chu nu leh pate hi an ni a. He leia malsawmna dawng tlaka nun hmangtute chu he damchhung nunah chauh hamthatnain a vur lo ang a, thih hnu piah lamah pawh malsawmna an dawng chhunzawm ngei ang. 3). Hringnun lawng khalhtute an ni Titanic lawng ropui tak mai, ‘Pathian pawhin a tichhe thei lo ang,’ an tih hial chu kum 1912 khan vur tlang a sut avangin tuifinriat mawngah vuiliamin a awm a. Mi tam takin nunna an chan phah hial a nih kha. Kha lawng chetsualnaah khan mipuite chuan lawng leh a captain an mawhchhiat lova, lawng khalhtu a ni an dem chu. Chutiang bawkin he hringnun kan zin kawnga lawng khalhtute chu kan nu leh pate hi an ni a. Chetsualpui min tum lova, kawng ralti-ah lawng an kar lova, sual kawng lam zawhin lawng khalhna an kuai her hek lo. Rinawm taka hmangaihna nen lawng an khalh avangin vawiina mi tha tam tak hian mi tha leh fel nih an hlawh phah a lo ni. Chutiang bawkin vanram chahbi kawltu an nihzia inhriain vanram lam panin lawng an khalh a, chatuan nunna kan neih phah a ni. C.H.Thangkhuma chuan, “Naupang leh Pathian inkarah nu leh pa an awm a, inzawmtirtu an nih loh vek chuan daidangtu tal an ni thin” tiin a sawi a. He khawvela nu leh pa tlem azawng chauhin an fate nun an tihchhiatsak a. Nu leh pa tam zawkin an fate leh Pathian inkar an thlunzawm a ni. Titanic lawng khalhtu ang khan an inthlahdah ve lova, Eden huana Evi leh Adama te ang khan an pawlawh ve hek lo. Chuvang chuan kan zin kawng min khalh diksaktu chu nu leh pate hi an ni a, an lo hlu ngei chiang e. 4). Min tizahawmtute an ni Kan nu leh pate hian kan tan engmah min tihsak loin, rohlu leh tha min pek tur nei lo mah se, an awm mai mai chung pawh hian nu leh pate hi an hlu em em mai a ni. Pa ber ruiin thle buk buk mah se la, a fate tan chuan a hlu em em a, a ni lo chu khawvelah pa dang an nei lo a, engdang mahin a hlutna hi a hen pha lo a ni. Nu ber fello deuh mah se la, a faten “ka nu” tih tur kan nei hrim hrim hi a hluin min tizahawm a. Nu leh paten mual min liamsan meuh hi chuan malsawmnate pawh hi kiang deuh duak hian a hriat a. In chhung a ruak a, zahawmna ten min kiansan ta daih emaw tih mai tur a ni a. Engmah tithei tawh loa min la dampui ve tek tek hian a thlamuanthlak bakah min tizahawm a. He khawvela rualawh zawng zawnga rualawhna na ber chu nu leh pa nei loten nu leh pa neite an awhna hi a nih avangin, nu leh pa kara seiliante ngat hi chuan, kan thatna tura hnute tuia min chawmliantute hnute a lo vuai hnu pawhin tarchhia tiin hnawk I tiphal lo ang u. Zirtirna tinreng min pe a, kawng dik min kawhhmuhtu kan pate an lo upat hian phunchiar nih kan hlawhtir thinte hi bansan ila, kan nu leh pate an chak tawh loh avanga chhungkaw chawmtu kan lo nih pawhin, kan nu leh pate zirtirnate chu ‘tar thu’ tia hnawl mai lova kan tana an theihna tha leh zung an lo sen zawng zawngte hriain, an hlutna kan hriat thar deuh deuh hian Bible-in, “I nu leh pa chawimawi rawh” a tih kha a takin kan nunpui tihna a lo ni reng mai dawn a ni. Aw le, eng anga ropui leh hmingthang pawh ni ila, kan damchhung hian kan nute emaw kan pate emaw hi engtik khawtikah mah kan khum thei dawn lo. Kan invawrhsan poh leh kan nu leh pate hi an hlu zual ting mai dawn a. Nu leh pate hlutna hi engdang mahin a khing pha lo a, a ne pawh a ek pha hek lo. Chu an hlutna chu nu leh pa kara seiliante hian an hrechiang a. Nu emaw pa emaw tel loa nun hmangtuten nu leh pate uaplumna hnuaia khawsak nawmzia an hai lo a, nu leh pa telloa hringnun kawng zawhtute hlei hlei hian nu leh pa hlutna hi an hrechiang bik emaw tih mai tur a ni bawk a ni. An dam laiin an aia hlu engmah a awm lo a, an thih hnuah pawh engdang mahin an hlutna chu a tinep thei hek lo. Kan lei Pathian nih an va tling tak em! Tichuan, nu hmangaihna hian tawpni a nei lo ang a, pa hmangihnain kinni a nei hek lo ang. Chuvangin, nu leh pa hlutna hian tawpin tai a nei lo ang a, kumkhua tlaitluanin a zual zel zawk dawn niin a lang.
Posted on: Wed, 03 Jul 2013 14:35:52 +0000
Trending Topics
Recently Viewed Topics
© 2015