Nun khawhar Fapa mal ka ni. Ka nu leh pate paw’n an theih ang tâwk chuan min duat ve. Mahse, chhûngkaw harsa-ah chuan fapa mal nih chu hahthlâk mai a ni. Hmánah chuan ka nu leh pate nen kan khawsaho thîn. Ka pa’n min zilhhau a, min fuih a; ka nu’n min hnêm a, min thlamuan thîn. Mahse, tûnah chuan an awm tawh lo, an hun a liam tawh. Thian dang ka kâwm tam lo. Ka unaute nen kan inkâwm thîn. Kan kawtah kan inkhualtelem a, kan infiamho thîn. Unau kan tam tham a, tuvakmah kan ngai bîk lêm lo – hmánah chuan. Mahse, tûnah chuan ka unaute kha an bo vek tawh. Unau tam mah ila, thian chu ka nei ve tho. Ka kâwm tam lo tih mai a ni. Chu’ng ka thian kawmte nen chuan high school tlângah kan lêng thîn a, ramhnuaiah pipu suihin kan uai thîn. Tawlhpahrit-ah kan tawlh a, kekawr mawng pawp huauvin kan awm thîn. Pawi kan ti lêm lo; kan hlim tlat. A pawi ber zâwka chu kum tam liam tawh thil ka sawi tlat. Kha’ng ka thiante khân nupui pasal an nei tawh. Tu leh fa pawh. Chhûngkaw enkawlin an buai a, an chhûngkaw hma lam thilah chiah an rilru an sêng. A then erawh pialrâl ram nuamah an bei thlep tawh. Damlai thawnthu sawi tur an nei tawh lo. Ka tâna inpe hman tumah an awm lo; a awmte paw’n engmah mi rawn tihsak thei chuang lo – mahni hna hnaa buai kan nih tawh avângin. Eng emaw châng chuan hmánlai hun kha an ngaihtuah lêt ve thîn mai thei – keimah ang an nih chuan. Chhûngkhat lainâ an tih ang chî pawh ka nei ve thîn – hmánah chuan. Awmna hmun a dang a, ngaihtuah a dang zêl a. Khawvêl inher zêl hian hmasâwnna a hring a, chumi rualin mihring rilru pawh a inher zêl. Chumi vângte pawh a ni mahnâ, ka chhûngkhat lainâ anga ka lo ruat ho kha hmuh tur an awm tawh lo – tûnah chuan. Hmánah chuan khawvêl mite chêt leh khawsak ruala khawsain, tumah dang ngai bîk lovin ka awm thîn – chhûngkhat lainâ, nu leh pa, unau leh thiante avâng liau liauvin. Mahse, tûnah erawh chuan hmána tudangmah ngai lova ka chênna lei-ah tho hian khawvêl mi tam tak zîngah khawhar takin ka khawsa mêk zêl a ni.
Posted on: Wed, 24 Jul 2013 15:31:10 +0000
Trending Topics
Recently Viewed Topics
© 2015