Vawiin August 20, 2013 tana Pathian thu—Jeremia 1:4-9 4Tin, Lalpa thu chu ka hnênah a lo thleng a: 5“Pum chhûnga ka siam hma chein ka hria che a, Chhûl ata i chhuah hma pawhin ka serh hrang che a, hnamte hnêna zâwlneiah ka ruat tawh a che,” tiin. 6Tin, kei chuan, “E, Lalpa PATHIAN, ngai teh, thu ka sawi thiam lo, ka naupang si,” ka ti a. 7Lalpa erawh chuan ka hnênah heti hian a ti a: “ ‘Ka naupang,’ ti suh, Ka tirhna che apiang hnênah i kal ang a, Thu ka pêk che apiang i sawi tûr a ni. 8Anmahni avângin hlau suh la, Chhanchhuak tûr chein i hnênah ka awm e,” Tih hi Lalpa thuchhuak a ni. 9Tichuan, Lalpa chuan a han ban a, ka kâ a khawih a; tin, Lalpa chuan ka hnênah: “Ngai rawh, i kâah ka thute ka dah ta. Ngaihtuahzawm atan Jeremia Pathianin zawlnei ni tura a koh hian kum 13, 14 vel chauh nia hriat a ni a, naupang a la intiin tling lo pawh a inti hle a. Pathianin a aiawha thu sawi turin mi chi tin, upa leh naupang pawh sawi lovin a hmang duh a ni. He chang hian mi entir a tum ber chu thalaite hi kohhranah nakin (future) atan chauh ni lovin tunah (present) pawh Pathianin a hmang duh a ni tih hi a ni. Pathian kohna che ngaihtha turin i thinlung i hawng em? A koh che chuan a aiawha thu sawi tuirn i inpe thei em? Tawngtaina Eng kim hmu tlang vektu Pathian, kan hnena i thu sawite ngaithla turin kan thinlung hi hawng la, i mi kohna chhang turin min pui ang che. Puitling leh naupang thliar lovin i ko thin tih hi min hriat nawntir fo la, thlalaite thusawi pawh ngaithla turin min pui ang che. Amen.
Posted on: Tue, 20 Aug 2013 15:13:57 +0000
Trending Topics
Recently Viewed Topics
© 2015