يوم فى حياة طالب قرر الحمد لله إنه يذاكر فيه: صحيت النهاردة الساعة 1 الظهر - إن شاء الله النهاردة هخلص الشيتات اللى عليا و اقدمهم الاسبوع ده بدأت و ولعت نور الاباجورة، مش شغال.............. بعد نص ساعة من تسليك سلك الكهرباء من سلك التليفون و توصيله فى الكبس النور اشتغل، و كنت مستعد و جبت الكتاب و الورق و الاقلام و كله. - إيه ده؟ انا مفطرتش، اقوم افطر بس عشان اركز الحمد لله الفطار مخدش كتير، و فتحت الفيس و قعدت عليه ربع ساعة بس على غير العادة فاستبشرت خير............ بعد قفل الفيس لقيت الفيفا 14 فى وشى و انا لسه مجربتهاش و انا Gamer و ده إهانة ليا، صح؟................. بعد ست ماتشات فيفا و تلاتة ناروتو تلات ساعات راحوا بحمد الله - استغفر الله العظيم، الساعة 4 و انا لسه مبتديتش، لأ، انا هابتدى اهو يلا الحمد لله ربنا قدرنى على الصعب جدا و قدرت احصل سبعة مليون و نص Score على Subway............ مش عارف جتلى منين كمية التركيز دى فى حاجة، نية المذاكرة بتعمل كتير أوى يا أخى........ - و بعدين بقى انا معملتش حاجة و الساعة بقت 6 و الوقت سرقنى لأ انا هاركز و هاقدر اخلص برضه رحت اعمل حاجة اشربها عشان افوق، و انا راجع بالنسكافيه............. ساعة و نص الحمد لله تمشية فى البيت بحاول اقرر العيال هسميها إيه........... بس شربت النسكافيه الحمد الله :D - كده بقت الساعة تمانية و معملتش حاجة، يبقى اخلص اللى اقدر عليه و ابقى عملت حاجة خدت الكتاب ألف بيه فى الشقة و اتشقلبت فى الكتاب بقى لحد ما حد ربنا يخليه فتح التلفزيون بس على MBC 2................ و عينك ما تشوف إلا النور فيلم لنيكولاس جايج و واحد ليوناردو ديكابريو و واحد كاميرو دياز و تبقى مش عارف تختار تتفرج على إيه، مع انى فى الاجازة ببقى بهبهب على فيلم واحد بس عدل مش لااااااقى، ناس مبتتقيش ربنا فى شغلها........... - فاضل ساعة واحدة عبال ما انام يبقى منطق انقذ ما يمكن انقاذه بسم الله الرحمن الرحيم، تلاتة X على اربعة Y فى اتنين.............................. خخخخخخخخخخخخخخخخخخخخخخخ ملحوظة: هذا البوست لا يمت للواقع بصلة و اى علاقة بينه و بين الحقيقة فهى اغرب من الخيال........ ملحوظة تانية: أى Score يتشاف عندى فى Subway غير حقيقى بالمرة :D
Posted on: Tue, 05 Nov 2013 18:36:32 +0000