KHAWIAH NGE CHAWLHNA? Nu pum chhung ata zalenna hmuin, tahnain a khawvel chu a hawng a. Nausen duhawm leh ngainatawm tak; mite lawm leh duh em em; duhsakna leh lawmna tinreng dawngtu; ngaihtuahna leh rilru thianghlim tak pu mi nimahse, chu hmun chu a cham hlenna tur a ni lova, duhawm eltiang mahse chu aia ropui chu kan beisei pui tlat a, a len hun kan nghak hlel a, kan thlir reng a. Chu note chu a lo thanglian a, engkim tih ve chhin chaknain a khat a, mi thiltithei tak nih a duh a, mut hmunah duhthu sam ve in a nih chak ber ber te chu Superman te, Spiderman te, Batman etc te an ni a. Thiltih theihna leh ropuina thlahlelin nun a hahchawl meuh lova... A han tleirawl/rawlthar chhova, nulat tlangvalna lamah rawn thangharh dêt dêtin, engemaw chen chu a hre ve a. Duhzawng leh ngainat zawng te rawn nei ve mahse tilâng ngam chiah silo; duh ve ngawih ngawih bawk siin a awm a. Engkim hrethiam tawh siin engmah pawh tak tak ngam si lovin nun lâi leh chep takin a awm a, a hahthlakin chawlhna reng a awm lova, nula/tlangval tawh ila chuan.. tiin chu hun chu nghakhlel takin a thlir a. Nula/tlangval chu an ni ta a, ngaihzawng te neiin a hlim ve viau a. A hmangaih chuan a kalsan tih hlau rêng rêngin a hun a hmang a, makpa/mo nih tling turin a mizia lo ang puia a awm a ngaihchang ava tam em! Nupui fanau hrawk chawma, damchhung khawsak rel chungchang a ngaihtuah chang phei chuan khumlaizawlah a hei ha, hui ha pap pap a, nun a chawl chuang mawlh lo. Miten Tiangte chu ngaihtuah vak vak lovin tih rawih mai tur alawm.. an tih chang chawiin nupui/pasal nei ila a tha ang tiin duhthu leng dang a sam leh a. A nghahhlelh ang ngei chuan nupui/pasal chu an nei ta a, fa pakhat an han nei a, mipain tlangval a kham lova, hmeichhiain pasal alo nei kher kher hi a inchhir thung a! Fa 3-4 nei ila a reh mahna anti leh fan a. Mahse, fa 3-4 an han neih meuh chuan, khawsak rel a hautaka, fate rual awh hlau reng rengin damchhung ni an chhiar a, an fate chu chhawr tham ni tawhin an nulat tlangval hun an nghakhlel leh a. Hun aliam a, khawvel sual tuipui fawn karah an tlangval chu khuahkhirh a ngaia, an nula chu ven ngaiin a awm leh a. Fate ngaihtuahin mutmu pawh tuah thei lovin an awm leh a! Tar a han ni a, fate thawhchhuah sa ringin tu-te hahdam takin an awm dawn emaw an tih laiin, thangthar khawsa zia chuan an rilru a tihah a, an hunlai anga khawvel her rem talh tumin a buai leh tho a. A thu leh hla leh a ngaihdante chu thing tih a hlawh a, tu khâw-khâ an bengkhawn tawh loh avang chuan a rilru chhungril a na vawng vawng thina, a hringnun a chhui kira, a sen tet ata tun thlengin nun hahchawlhna reng reng a hmu lova, thih mai a thlang zawk fo asin! Hei hi a ni, hringnun chu, Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u. (Mat 11:28) Chawlhna tui kamahte ka hruai ang che (Sam 23:2). titu hnenah lo chuan Chawlhna reng reng a awm lo.!
Posted on: Tue, 20 Jan 2015 13:04:08 +0000
Trending Topics
Recently Viewed Topics
© 2015