Komunikado di Prensa di Ministerio di Finansa Ministerio di Finansa i sektor privá ta traha huntu riba reformanan fiskal WILLEMSTAD – Ministerio di Finansa i sektor privá di Kòrsou ta traha huntu riba reformanan fiskal pa solushoná e problemanan finansiero ekonómiko. Den gruponan di trabou gobièrnu di Kòrsou i sektor privá ta traha duru pa yega na reformanan fiskal integral ku mester wòrdu introdusí na añanan 2015 i 2016. E meta ta pa hasi e sistema mas fásil i transparente i lo benefisiá nos komersiante i komunidat en general pasombra e sistema ta mas fásil pa traha kuné. Tambe e lo ta mas fásil pa e aparato fiskal por kontrolá. Den aña 2015 pueblo di Kòrsou lo haña bèk e fruta pa tur e sakrifisionan ku komunidat mester a hasi. Minister di Finansa, dr. José Jardim ta hasi tur esfuerso pa baha impuesto na aña 2015 p’asina hinter komunidat por bai disfrutá di e reformanan fiskal. Minister Jardim a indiká for inisio ku mester solushoná e situashon ekonómiko, pero lo duna bèk tambe na pueblo di Kòrsou. Aña 2015 lo tin espasio pa un redukshon di impuesto na un balor di 50 mion florin. E bahada lo prosesá den impuesto direkto ku ta impuesto di salario, impuesto di entrada i impuesto di ganashi. Gobièrnu lo logra un bahada di impuesto direkto pa indirekto den un forma ku nunka a sosodé den pasado. Na 2015 lo baha impuesto direkto sin tin nodi di subi impuesto indirekto. E reformanan fiskal lo interesá e invershonista, pasombra lo hasi nos sistema di impuesto hopi mas fásil i muchu mas transparente. E redukshon di impuesto ta hasi Kòrsou hopi mas atraktivo pa invershonistanan ekstranhero. Invershonnan ekstranhero ta hopi importante pa Kòrsou pasombra e ta subi nos potensial ekonómiko pa nos por krese i solushoná otro problema ku ta balansa di pago. Invershonnan ku aktividat ekonómiko nobo ta atraé devisa I lo benefisiá nos pais. Minister Jardim ke buta Kòrsou bèk riba e mapa internashonal di servisio finansiero. Tin vários akuerdo ku ta wòrdu prepará pa atraé mas aktividat ekonómiko den turismo, e sektor di petroli, áreanan logístiko, agrikultura i piskamentu. Tur por atraé devisa dor di invershon òf eksportashon. Minister Jardim ta para pa un maneho finansiero sólido i responsabel ku ta krea kondishonnan pa un desaroyo sosio ekonómiko di nos pais. E maneho ta garantisá un fundeshi sano dor di tur e reformanan i medidanan ku a wòrdu introdusí. Esaki ta un kondishon pa nos por krese komo pais. Minister Jardim ta splika ku esaki ta importante pa finansiá entre otro e maneho di enseñansa, di salubridat i nos por garantisá un mihó bienestar di nos pais.
Posted on: Wed, 19 Jun 2013 02:24:12 +0000
Trending Topics
Recently Viewed Topics
© 2015