SAPELE/DELTA STATE MUST BETTER 26/10/2014 PEACE Just the beginning of this month, we all kneel down to tell God thank you for leading us this far. Despite all the problems wey we dey get, with the grace of God, we dey move on. Every now and then, we dey hear pipo dey mourn. We dey hear of accident. We dey hear of pipo wey dem play wayo. We dey hear of pipo wey loose election. Some, kidnappers visit their homestead. Some of us get betrayal from friends and well wishers. Some of us experience heart break, failed marriage and even unfulfilled dreams. My pipo, no matter wetin happen to us, remember say e get some pipo wey their situation worse pass our own. I know say, nor be becos say person dey stammer, we go cum dey play music wey dey skip for am. Urhobo man say, Orgwefia! Everybody deserves good life. But remember, life nor be bed of roses. No matter your situation, as long as you still dey breathe, hope dey. To the families of those wey dem kidnap their person, we join faith with you to pray make God allow His will to be done. There is purpose in all our mishaps. May God open our hearts to see this purpose. Amen. To those of our families wey lost one person or more to death this month, we pray for comfort to your hearts. May God find a way to replace the joy you lost. And may the souls of the dead find peace in Gods kingdom. Amen. To those of us wey dey battle with one sickness or the other. We pray for healing upon your lives. Dont go to babalawo for help, God dey close to you. Pray and wait. E go heal your disease. Amen. To those of our families wey dey find the blessing of pikin for their marriage. The way God take answer Hannah, E go answer unu. But make unu believe and dey faithful, cos Hannah believe and dey faithful. Continue to pray. We pray say the straffing wey go bring pikin, no juju go make am nor take place. Amen. How many forms of request we fit pray for? Some dey cry every night for their pillow. Some dey weep for money. For love in their marriage and relationship. For profit in their business. For contract. For jobs. For academic excellence. For appointment. For security. For wisdom. And for heart of God. No matter wetin you dey pray for, open your soul to God and talk God to help you in your situation. When somebody write exam finish, e dey submit e paper to the examiner to mark. Submit your questions and problems and even answers to God. E nor go mark dem, na answer e go give you. Nor reason your past. Just surrender to God. God dey help all kinds of pipo. Nobody be saint. Dont be deceived. Wetin you dey pass through get end. Just believe in God. Thats all. Let us pray. Papa in Heaven, you know our problems from our faces. Each hand that typed Amen to this prayers, each eyes wey see and read this update. And each heart wey meditate on this words, baba, let them get answers to any problems dem get for life. Amen. Na you create us, we nor know the art of living becos most times, we nor dey know how problems take dey come. Despite all our knowledge, and awareness, we nor go fit answer all our problems. So, we call on you baba God, to take your place for our lives. Nor let another deity cum give us wetin we want becos their gifts dey always get condition. Na you we need baba. Nor let anyone take your place in our lives. Baba, wipe our tears and give us joy and cheers. We say thank you for all the things you don do so far for our lives and we say as you continue to be our God, na so we go continue to be your children. We put every family under your protection and care. Help us to make our society better so that you go fit come dwell here with us permanently. Give hope to the hopeless. Give rest to the troubled. Give faith to the poor. And health to the sick. Give home to the lost. Deliverance to the oppressed. And give us the grace to always take you as our God now and ever. Amen. Happy last Sunday to us all. It is well with our soul. Peace. God Bless Sapele. I LOVE SAPELE. SAPELE/DELTA STATE MUST BETTER.
Posted on: Sun, 26 Oct 2014 14:17:21 +0000
Trending Topics
Recently Viewed Topics
© 2015