كلمتين عايز أقولهم بقالي شوية غالبا مش هايعجبوا حد و مش هايجيبوا لي غير الشتيمة أو الصدمة ، و لكن إليكم : 1- هل نزول الناس للشارع في 25 يناير إلى 11 فبراير هو اللي شال حسني مبارك ؟ رأيي المتواضع بعد الأوضاع الجديدة : لأ . الناس نزلت الشارع بالملايين ، و الإخوان لما لقوا الدنيا كترت في الشارع نزلوا مع الناس - و الجيش أخد الموضوع ذريعة علشان يقول لحسني طير أنت ، لأنه هو اللي معاه سلاح و يقدر يهدد بجد . (أنا باتكلم من الاخر خالص و من غير فذلكة و كلام عن الشرعية و السلطة للشعب و الكنافة دي ) . 2- هل نزول الناس الشارع في أحداث محمد محمود الأولى هو اللي خلى العسكر يقيلوا الحكومة و يعملوا انتخابات مجلس الشعب ؟ رأيي برده - لأ . الناس نزلت الشارع بالملايين و واجهت ضرب الشرطة ، و لكن في الأخر اللي كسبوا حدوث الانتخابات هم الإخوان ، و ده كان باتخاذهم نزول الناس زائد قاعدتهم و جماعتهم و تسليحهم المستتر في هذه اللحظات ذريعة للتفاوض - قدروا يوصلوا مع المجلس العسكري للانتخابات . و غير كدة ، الجيش له سقف في التلويش في الناس ، و سقفه التعدي على الأعراف الدولية اللي تهدد دعم الغرب له متمثل في أمريكا و خلافه . وهلم جرة كدة و فاست فورورد للنهاردة . 3- هل نزول الناس يوم 30-6 هو اللي شال مرسي ؟ أظنها واضحة - و الحقيقة إن الانقلاب الناعم المتكئ على الظاهرات الحاشدة الأكبر في تاريخ مصر هو اللي وضح كل ما سبق - الإجابة لأ طبعا . الجيش استغل نزول الناس علشان يشرعن الإطاحة بمرسي من وجهة نظر المعايير السياسية الدولية إذا جاز التعبير عن شيء من هذا القبيل ، و الدليل على كدة إنه علشان يعرف يعمل أي حاجة تانية فيها خطوات و مبادرات زي فض الاعتصام ، طلب التفويض اللي مالوش أي قيمة أساسا إلا إنه غطاء شعبي للإنقلاب بتاعه . خلينا نقف هنا ثانية قبل الدخول في الأسئلة الجاية . دلوقتي من الواضح إن اللي باحاول أقوله إن الصراع على السلطة في مصر (العملية السياسية في مصر ما هياش إلا طمع في السلطة بهدف السلطة مش بهدف بناء الدولةولا أي حاجة في الاتجاه ده) هو صراع بين الجيش واخد تحت باطه الفلول و أجهزة الدولة العميقة ، ضد الإخوان . الطرف الأول مسلح و نظامي و ممول من البلد و بالع البلد في كرشه ، و الطرف التاني منظم انتخابيا و مسلح برده بس مش زي الأولاني و عنده قاعدة شعبية بس في تآكل و ماهياش موضوعنا . الأول زي ما قلنا بالع البلد في كرشه ، و التاني عايز يبلعها حتة حتة علشان يقدر يحقق بيها أوهام يطلق عليها رؤية الدولة الإسلامية المتخطية للحدود . و كل واحد فيهم لما الناس بتنزل الشارع بيحاول يركب على الموضوع علشان ياخد بيه مصلحة في حق التاني . و اللي بيكسب المصلحة دي بيحاول يقنع الناس اللي نزلت إنها هي اللي جابت المصلحة دي للبلد . نرجع للتساؤلات بتاعتي . 4- هل إعتصام رابعة كان هايرجع مرسي ؟ طالما الصراع بين الإخوان و الجيش و الاتنين مش بيتفاوضوا مع الجيش من ساعتها - طيب ازاي أي مصلحة ممكن تتعمل و مرسي يرجع أو ياخدوا أي مكاسب . يبقى الإجابة لأ . 5- هل المظاهرات الإخوانية اللي منضم لها مناهضي العنف و رافضي القتل من الثوار و خلافه (يااااااااه الثوار ، و الله الكلمة واحشتني) ها ترجع مرسي؟ أظنها واضحة الإجابة أكيد لأ . 5-أ - هل ها تخلي الجيش يتراجع عن الانقلاب و تمكين الدولة العميقة و الفلول و الشرطة و أمن الدولة وخلافه ؟ بناء على المنطق اللي أنا باعرضه - لأ . ليه ؟ علشان هل الإخوان قادرين يركبوا على المظاهرات اللي حاصلة و يدخلوا في مفاوضات مع الجيش و ياخدوا بيها أي مصلحة ؟ قدرة الإخوان على التفاوض دلوقتي مش عالية بس موجودة بما إن الجيش نازل إعتقالات في قيادات التيار التنظيمي اللي كان مسيطر على الجماعة ، و اللي بيتفاوض دلوقتي التيار الإصلاحي اللي كان مهمش في الإخوان في العقد الأخير - اللي بيطلق عليهم الحمائم . و بالتالي المصلحة اللي ممكن يطلع بيها من كل الدم اللي سال على الأرض ده محدودة و ها تتطلب التضحية بالتيار التنظيمي قيادات و قواعد و خلافه . بعد كل الهري ده أنا باحاول أقول ايه ؟ من الأخر كدة نزولك الشارع بيحطك رقم في أجندة حد مهما كانت مطالبك و مهما كانت نواياك . مطالبك و نواياك دي لو ضمن أجندة حد من الفاعلين المتصارعين يبقى لها أمل تتنفذ . غير كدة فكك منها ، و 25 يناير مش استثناء إطلاقا . ما يمنعش إنك تنزل ، بس تبقى عارف الطرف اللي أنت نازل تنفعه ، و عارف بالشبه كدة أنت ممكن تبقى بتنفعه بإيه ، و عارف إنك بنصرتك ليه أنت ممكن تطلع بمصلحة عاملة إزاي منه فيما يتماشى مع مطالبك و أجندتك . وشكرا و فلتبدأ الشتيمة و التكفير و التضليل و التسفيه و التخوين و الاتهامات ، و سيري يا نورماندي :)
Posted on: Sat, 31 Aug 2013 22:30:17 +0000
Trending Topics
Recently Viewed Topics
© 2015