BONEIRU Na okashon di e kurso organisá pa Ama Consulting djasabra último na e edifisio di ABVO, e presidente di ABVO-Boneiru Chaly Anthony a ekstendé un palabra di bonbiní na e partisipantenan tantu di Boneiru komo di hermana isla Kòrsou. El a bisa ku na nòmber di ABVO-Boneiru e kier a yama na tur un bonbiní na e kurso di kombertí nan deseonan den realidat. Tambe el a ekspresá un palabra di saludo spesial na dr. Sherwin Espoza, sikólogo i su ekipo Edmond Francisca fasilitadonan di e anochi en kuestion. ”Formashon i desaroyo di nos miembronan ta para haltu den bandera di ABVO. Nos ta konvensí ku formashon ta un instrumento pa desaroyo di organisashon i un siguransa di sobrebibensia di ABVO. (garantia pa kontinuidat) “Hasiendo soñonan un realidat huntu den solidaridat.” Hende komun ta konta historia, hende desaroyá ta papia di idea. Soña ta bon pero e mester hasié bira un realidat ta resultado di trabounan hasi huntu. Rumannan si nos no a soña den pasado e lugá aki nunka a bira un realidat. Si bo no soña otro lo hasié pa bo, nos semper ta keda siguidó di otro. Nos mester bira kreador di posibilidatnan. Huntu den solidaridat nos ta enkaminá pa ta eksitoso. Boneiru ta pasado dentro di hopi desafio, ta hopi kambio a bini den e struktura nobo di pais. Ku ta pone ku awe nos mester ta solidario ku otro. Algun ehemplo di esaki ta ku nos moneda mester a bira dòler ku tur su konsekuenshanan ku kosto di biba na Boneiru a subi. Esaki ta un faktor ku ta afektando nos bienestar ku ta parse di ta inkontrolabel i inmanehabel pa falta di un bon mekanismo di kontròl. Nos a haña nos ku un kambio di lei di edat di penshun ku a hasi ku awe e obrero boneriano mester a konformá ku ta 65 nos ta baha ku penshun. Nos sa ku na Kòrsou tambe ya kaba penshun di AOV a bira 65 aña. Nos ta kere ku paisnan mester interkambiá ku otro i ta solidario ku otro pa kontrolá òf kontra arestá e desaroyonan aki. Nos di ABVO-Boneiru ta kere den promé ku yega sinku aña di kambio di struktura estatal, nos komo pueblonan di e islanan aki mester bini huntu pa evaluá kon i kiko nos mester hasi huntu ku otro.”
Posted on: Mon, 02 Dec 2013 00:50:28 +0000
Trending Topics
Recently Viewed Topics
© 2015