INDIAN NATIONAL POLITICS LAM THLIR THUAK ANG By Lalrozara Nakum, 2014 May/June thla vel hi India rampum Lok Sabha General Election a ni leh tawh dawn a, National Party leh State Regional Party te pawh Election hmachhawn turin an inbuatsaih tan tawh a, Congress leh BJP chuan State thenkhata an Party hotute pawh Player thara thlakin an insiam tha nual bawk. Tutenge Sorkarna siam dawn tih ngaihtuah peih te tan tunlai India ram Politics leh Party lian te dinhmun in thlir thuak teh ang. UPA leh NDA a tel sa la nghet tura lang deuh te chu kan dahtha rih ang India rama Party lian ber, Indian National Congress (INC) hian MP 209 neiin, a kaihhruai UPA sorkar hian MP 300 chuang vel la nei phak anga ngaih a ni, Congress dawta Party lian ber BJP hian MP 114 an nei mek bawk a, BJP kaihhruai NDA hian MP 170 vel la nei anga ngaih a ni. UPA leh NDA a tel lo State Regional Party (@Third Front) + Left Front + Independents MPs belhkhawm hi MPs 70 bawr vel nia ngaih an ni bawk. Tun term chhunga Party sukthlek leh thlawpna a danglam fo avangin heng MP neih zat dinhmun hi hriat chian fak theih a ni lo. Amaherawhchu, hmanni lawka Mamata Banerji kaihhruai Trinamool Congress ten No-Confidence a put luh dawn khan MPs 50 tal thlawpna a ngai a, MPs 20 awrh thlawptu an hmu ta chauh a, No-Confidence pawh an Move phak zawh lohna hian UPA Sorkar hian Majority a nei chiang tih a lang mai awm e. India rampum huapa Party mala inkhing leh inbei ber pawh Congress Party leh BJP hi an ni leh dawn a, an kaihhruai ve ve UPA leh NDA huang chhungah hian Regional Party (Third Front tum ho) leh Left Front lam pawh tanrualpui atana vehin an inchuh mek bawk a ni. Nikum leh kumin chhung hian State sawm dawn lai Assembly Election neih result-ah Congress Party hian hmasawn hretin, State lian BJP sorkarna Himachal Pradesh a chhuhsak a, State tetak te Goa ah erawh BJP in Congress sorkar a paihthla ve thung bawk , a bak Congress sorkarna chelh mek State te chu a humhim thung a ni. Tunhnaia, N.E State pathum Tripura, Nagaland leh Meghalaya Assembly inthlanah Maghalaya-ah Congress in hmasawnin a sorkar zui a, Tripura leh Nagaland-ah erawh State Congress Party chhung buaina avangin Sorkar lai a khing tla phak lo hle thung, BJP phei chuan Nagaland-ah MLA pakhat an nei ve phak tawk a. Amaherawhchu, N.E States te hi kan te lulai em mai a, heng MLA Election result hian Lok Sabha General Election a nghawng phak a rinawm lem loh. Lok Sabha Election hma hian Karnataka, Jharkhand, Mizoram, Delhi, Andra Pradesh ah te State Assembly inthlanna a awm hmasa dawn a. A bik takin thla leh April/May a Karnataka Assembly Election tur hian State dang inthlang chho ve tur leh nakum kum tira Lok Sabha General Election awmtur thlengin nghawng a nei thui viau thung ang. Chuvang chuan sorkar lai BJP leh Congress Party inbeihna hi a namailo viau tawh bawk. BJP sorkarna tun term chhung hian Karnataka ah hian CM pathum an inthlak hman a, tunhnai thla hmasa mai khan BJP Minister 2 chu bangin, Party hotu lawk thenkhat nen Congress an zawm nghal a, BJP ML A 13 ten banna Speaker hnenah an thehlut bawk a, chubak pawh BJP & JD (S) MLA 20 ten banna thehluh an la tum mek bawk a. Hengte avang hian CM Shettar kaihhruai sorkar Cabinet Meeting ah pawh Minister ten sorkar thiah (dissolves) mai an rawt tawh hial a ni. Hetihlai hian March ni 5 khan Urban Local Body (ULB) inthlanna neih a ni a, Sorkar lai BJP an chaklo-in an tla chiangkuang hle a, Congress Party chak dan erawh a filawr hle thung- Congress Party in wards 1,906, BJP- wards 907, JD(U) wards - 907, KJP wards – 274 an la hlawm a, he result hian State MLA General Election nasa takin a nghawngin, a hlimthla tur tih a ni nghal a ni. Karnataka BJP sorkarna hi a tlak leh vaih chuan BJP National Politics dinhmun tur hmalam chu a khirh ngawt ang. Party chhunga BJP vanduai lehna chu tunhnaia BJP ten Prime Ministerial Candidate atana Gujarat CM Narendra Modi vawrh chhuah tuma an thiltih dan, L.K Advani hian pawmpui ve thei tlat lo hi a ni. Advani hian News ho hnenah BJP kalphung a sawisel hmiah hmiah mai a, “ Hetiang mai mai hi chuan Congress kaihhruai UPA sorkar hi kan hneh mai lovang, Karnataka sorkar leh State BJP pawh hi Central BJP hruaitute’n kan tih buai chhiat a ni, Central BJP hian mawh kan phur ” tihte a sawichhuak a, ULB Election-ah BJP a tla chiang hle lehnghal a, BJP chhungkaw buaina hi a ril hle, a la buai nasa dawn chauh niin a lang. Bihar Chief Minister Nitish Kumar kaihhruai JD (U) pawh hian India President thlanah NDA thawhpuite phatsanin, UPA Candidate Pranab Mukherji vote an pek san daih tawh a, tunhnai hian Congress Party leh JD(U) chhunga hnam hnufual te dawnkan tumna kawngah ngaihdan lungrualna nghet tak awmin, PM Manmohan Singh pawh hian CM Nitish Kumar hi Chief Minister hnathawk thaah a puang a, Nitish Kumar pawh hian UPA sorkar chu hnamhnufual leh miretheite ngaihsak a, Bihar State duhsaktu, tiin a fak a, “ MP General Election-ah Bihar State hnam hnufualte dawmkan pui theih tur kan thawhpui ang “ tih a sawi lang tawh bawk. Gujarat CM Modi chungchangah erawh “ Gujarat State thanna 7% GDP a nihlaiin Bihar chu 10% GDP in kan thanga, Modi ai chuan India rampumah CM Model ka ni zawk” tiin a comment hlak thung. NDA chhunga tel bawk Saromani Akali Dal (SAD) ho pawh hian Punjab State-ah BJP nen Congress Party khin rawnin sorkarna an kaihruai mek a. Sorkarna chhungah Minister zat leh portfolio insemna kawngah te, Sorkara hamthatna inchuh kawngah te, BJP lam hian khua an hmu lovin, an huamhauh nasat lutuk avangin natakin an inep mek a, Punjab State Assembly inthlan lehah chuan BJP nen kan thawk dun tawh lovang tih hi SAD lam ngaihdan a ni. Chubakah, Gujarat CM Modi hian “ Central a BJP kan sorkar hunah Constitution in Minority, Schedule Tribe te hamthatna a dah hnem lutuk hi thil tul lo a ni , kan ennawn tur a ni ” tia a lo sawi tawh thin hian Punjab State leh hnam rilru a khawih tel tlat mai a, SAD te hian PM Candidate atan Modi hi an pawm thei ang em, NDA atang hian an tal chhuak ve lovang tih sawi a har khawp. State chhunga Party lian tak tak, UP State sorkarna chelh mektu Mulyam Singh Yadav kaihhruai Samajwadi Party (SP), Maywati kaihhruai Bahujan Samajwadi Party (BSP) Jayalalitha kaihhruai AIDMK, Chandra Babu Naidu kaihhruai Telegu Desam Party (TDP) te hian hman deuh khan Congress leh BJP nilo sorkar din turin Third Front siam an tum a, an phe ve sek kha a ni a. Tunah erawh chuan khalam kha chu sawirik a awm ta meuh lo. Hetih karah hian Mulyam Singh leh Jayalalitha hian Congress President Pi Sonia Gandhi hi an hlat vak lo bawk. Tin, Congress Party hian Andra Pradesh lamah pawh tuipui kam Telangana hnam tamna leh Rayalasema Region lama chetfuh tumin Congress Party chhuahsan tawh Jaganmohan Reddy pawh an dawr mek bawk a ni. W.Bengal CM Mamata Banerji kaihhruai Trinamool Congress hi chuan an chhuahsan tak Congress (UPA) lamah hian hawikir an tum dawnlo niin a lang, chuti nimahsela, NDA lam hian Mamata (Didi) hi thawhpui atan an duh ang em le? A ni Mamata lah chuan “ MP inthlan hunah Trinamool Congress hian Union Railway Minister nihna hi kan chang leh dawn “ tiin a puang nghal veleh ngawt a!! Bengal Congress ho lah chuan “ Kan Chief Minister chu Zawlnei lamah a kal ta “ tiin nuihza siam nan an hmang ve nasa mai. Pre-Poll Election ah tumah tanrualpui neilo hian Post-Poll Election ah hian Sorkara luh an tum mai dawn pawh a ni mahna le?? Politics development danglam leh mak tak tak inher rem chho mek hi, a hlimthla a lang chiang chho uar uar tan tawh a. Tun dinhmunah MP inthlan awm ta se, Party malah Congress Party hian MP a nei tam leh ber ang a, Party mala a sorkar phak loh pawhin, UPA sorkar hi chu awlsamte-in a ding leh thei dawn niberin a lang.
Posted on: Tue, 11 Jun 2013 07:19:18 +0000
Trending Topics
Recently Viewed Topics
© 2015