Vawiin July 26, 2013 tana Pathian thu—Johana 12:1-8 1Tin, kalhlên kûtna tûr ni ruk a la awmin, Isuan mitthi zîng ata a kaihthawh Lazara awmna Bethani khua kha a lo thleng a. 2Tin, chutah chuan ama tân zân ruai an ṭheh a; Marthiin rawng a bâwl a, Lazara erawh chu a chawhlui kîlpuitu pakhat a ni. 3Tin, Marin bûk zâtve spiknard hriak rimtui to tak a rawn keng a, Isua kete chu a chulh a, a samin a kete chu a hru a; tichuan, chu hriak rim chuan in chu a khat ta rum rum a. 4Nimahsela, Iskariot Juda, a zirtîr pakhat, a mantîrtu tûr chuan, 5“He hriak rimtui hi engati nge duli zathuma hralhin, mi retheite hnêna an pêk zâwk loh?” a ti a. 6(Mi retheite a ngaihsak vânga chu thu chu sawi a ni lo; rûkru a ni a, tangka ip a kawl a, a chhûnga dah chu a lâk ṭhin vâng zâwk a ni.) 7Tin, Isuan, “Mi phûm ni atân khêk rawh se. 8Mi retheite chu kumkhuain in hnêna awm an ni alâwm; kei erawh chu kumkhuaa in hnêna awm tûr ka ni lo,” a ti a. Ngaihtuahzawm atan Marin Isua a hmangaihna chu thu maia sawi lovin thiltihin a entir a. Spiknard hriak rimtui man to em em chu Isua keah a leihbua a, a chulh a, a samin a kete chu a hru a, tichuan chu hriak rim chuan in chu a khat ta rum rum a. Marin Isua a fakna leh a chawimawina rim chu in chhunga awm zawng zawngte hriat theih khawpin a lo awm ta. Pathian kan fak leh chawimawina hi mite hmuh theih leh hriat theihin a awm em? Kan inkhawm hmelhmangah miten Pathian an hmu em? Tawngtaina Lalpa thu mai ni lovin thiltihin nang mi faktir la, chu chu mi dangte tan pawh thawm hlimawm leh rimawi lo ni rawh se. Amen.
Posted on: Fri, 26 Jul 2013 15:35:58 +0000
Trending Topics
Recently Viewed Topics
© 2015