Midang Bomnak Kut Tui kum LZP Medicare Outreach (A T.um 4-nak) cu Sentaw ah feh ding an ti vete’n ka feh ding maw ding lo ka ruataw nasa. A t.um thum te’n ka rak tel ve zoih, ka korcung thar, ka khawmnak kor neihsun, ka radio(Saya J. Khum in 2002 ih i t.hen mi), ka thilri poimawh funnak saraang ka ti hlo zo fawnih, ka feh duh nawn pei maw, tiah ka donaw nasa. LZP (Lairawn Zirsang Pawlkom) ahhin 1999 kum Hmunlai ih Senpi Pumkhawm t.um ihsin ka rak telve thok fangih, tuini tiang ka tlintawkin ka tel hnelhno. Tel vivo thei khal ka beisei. Mai’ bulpak hlawknak, sumpai lakluhnak si lomi ih pacangpa pa vak luailo tiah i reltu um khal hai seula ka tha a se lo. Midang hnen ihsi hlep le ngah tumih vah hrekhro hnakcun ka hril hrih sawn thotho. ‘Ka miphun hnenin ziang hlawknak ka ngah ding’ ti hnakin ‘Ka miphun hrangah ziang ka tuah thei ding’ timi lungput nei rual lakih ka rak telve ngah hi Pathian ka thangt.hat. Letpanchaung ihsin keimahte’n ka pokih, Salai Lawm Sang(SalaiMai) thawn Zonuam khaw kiangah kan tongaw. Zonuam lam kan va sawm nan, remcang an rak um loih kan pahnihte’n kan feh ngiaungo. Tahan ihsin a nau Phoebe (Bite)-in in thlun. Hmunt.ha kan thlenah Salai Bawite (Haikhawl LZP President) le Salai Ngun Cung Bawi kan tongih kan fehkhawm. Sekan ah Salai Ting Lian Mang ih hnat.uan lai kan hei sawm phah. Zinglam 8:30 ah Sentaw khua kan va thleng cu, hotupawlin hma an rak la nasa zo. Sentaw LZP member-pawl an fel tukih, hnat.uan ding khal kan nei ve lo. Tohkham pahnih vial ka pu ve man. Lakphak le sang in rak do. Dr. T.uan Cin Thang le Wesley Nurse mi 4, Lab. Technician Salai Bual Lian Sawn (Grace Clinic) tipawlin mina an rak zoh rero zo. Thawsa lakah sibawipawl cu thlan for thlohthlo rori’n an buai vutvo. Midang Bomnak Kut Lairawn Zirsang Pawlkom (LZP, Kalay) hminih a t.um 4-nak Medicare Outreach Program ah ka rak tel thei ve cu dam man nei ka ti-aw zet. Kalay Peng, Thasi Block, Sentaw khua ah August 3-4 tiang, ni hnih sung, kan va feh. Mina tuamhlawm le khawsung t.hansohnak tawlrelin a si bik. LZP branch 7(Letpan, Haikhawl, Hmunlai, Zonuam, Lailun, Tahan, Sekan) ihsin member mi 15 le, Wesley Hospital (Tahan), Wesley Clinic (Letpanchaung), Grace Clinic tipawl ihsin sibawi 2, nurse 8, lab. Technician 1, cazin kaitu le sizung hnat.uan mi 4 tipawl kan pokih, August ni 3 zing 8:00 ihsin Sentaw khawbawi inn ah mina zoh thok a si. Sentaw khawbawi innah mandat zarin mina zohnak in rak timtuahsak. Sentaw LZP Branch memberpawl t.an an rak la zet. Tuangtim le cangvaih ah t.uanvo an la thluh. CC Kawhhran pastor inn ah in thlenterih, rawl einak inn khal a hrante’n in timtuahsak. Kan thuken “T.angrual T.uantlang Tha le Zaang” ti rorin kan t.angkhawm ruangah kan hlawhtling tiah ka hmu. Sibawipawlin mina an rak zoh laiah, Salai Mang No Zikih hoin Sentaw hramthok tlawngah kan va feh. Tlawngta mi 65 hnenah nganlo cabu, cafung le ballpen kan zem. Cabu pali le cafungpawl kan zem hnuah a hlei laiih class khat ihsin mi pathum ciar, harsa luar deuhdeuh, tlawngsayapawlin in hrilsuah sakih zungkhaan ah kan rak zem bet. Tlawngtapawl mithmai zoh tikah thin a nuam zet. “Kannih LZP in kan lo pe a si lo, khawsungih nu le pa in an lo pe a si. Kannih cu a run kengtu men kan si. Nannih tla ca zuam uhla, midang bawm theitu nan si leh ding hokhaw,” tiah tha kan pe ta. Tlawngta 65 cu class 5 ah an to ih, cozah tlawngsayama pahnih le sayagyi vial an nei. Cozah sian lo cingih khawsungin an rawih mi tlawngsaya pakhat cu an nei. Mi pakhatin class hnih tla zirh a t.ul. Kalay Peng fimzirnak lam hotupawlin an ngaihsak tawk lo deuhin a lang. Sagaing ramt.hen sung ciocio ah tlawng hrekkhat ahcun saya hleifuanih an um laiah, hivekih daihaw lo khua hi Outreach kan fehnak ah kan hmu phahphah. Falam Peng, Pamuanchaung kan feh lai khalah hiti thotho. Yepyachauk khua tla cu cozahin hramthok tlawng khal a pe hrih lo. Sentaw tlawnginn hi Japan bomnakih an sakmi a si. Saya inn pahnih cu khawsungin an sak. Cozahin general worker pakhat, a thu cun a pe zo nan, a minung a thleng hrih lo. Tuikum fangin tlawngsayagyi khal an nei lai. Cozah hramthok tlawng an ngahnak kum khat vial a rei. August ni 3 ni siimlam 4:30 tiang mina zoh a siih, minapawl umharphentu ah SalaiMai kutsuak thar The Loser film cu Salai Lawm Sang in tualah a rak suahsak hai. Niin a daih nawn lo ruangah hmin pe cia hrekkhat cu a thaizingih zoh peh dingin kan tiam ta. A zan cu CC biakinnah khawmnak kan hmanpi. Caan hmuahhmuah in kian thluh. Khawsungah AG, JCC le CC kawhhran pathum an um. Biakinn kharin hmunkhatah kan khawm. LZP President, Salai Ngun Than Uk in chairman, Secretary Salai Lal Run Suak cu thuthan lamah, Salai Siamte (Hmunlai LZP President)- solo, Mai Phoebe(Letpan) le Mai Mawite (Hmunlai) in ahlu an khon. Salai Bawi Thang (Haikhawl President) in “A Fehtlang Ding mi Pathian Thu le Fimzirnak” ti thupi hmangin minute 20 sung thu a sim. “Fimzirnak hi Pathian huatzawng a si lo. Nauhak cazir t.hluh khopih crusade le camping ih fehter kan uar tuk. Cazir cu hnat.uan dang vek a si lo, lehhnu ih dawi ciamco theih thil a si lo ruangah a caante ahcun thildang ti hniaihniai loih zir ngurngo ding a si. Nu le pa in innlamah thlacamnak le Bible siarih um-hnawh kan huam cun zumnak ah an cak thotho. Ca an thiamih midang bawm theitu an si tikah Pathian hna hlawksawnin an t.uan thei ding...” tiah fawrhfialnak a nei. Cu t.hehin, keiin “Khawtlang Nuam” ti thupi thawn, minute 30 t.ha ka rel ve. Central LZP Journalist Secretary ka si vekin, khawsung nupa, tlawngsaya, khawbawi tipawl hnen ihsin an khawsung dinhmun ka rak hliakhlai cia. “... fate tlukih thil sunglawi a um lo, Korea film hnakin fate kan ngaihsak sawn pei uh. Pathianin in pekmi laksawng a run zohih, in suhhlam sal tikah zuhmun, sahmun, thawnginn ah a run hmu pang dah kei. Hruaitu ropi tivek si dingih in pekmi an si. Sentaw khawsuak Sagaing ramt.hen vuanzichhuk khal kan nei thei si. Tualleng tlawng le zing-siim cazirhnak tla neih tum uh. Tlunlam upa hna thleng dingin nan khawsung t.ulhaimi thlen tum uh....” tiah aam takin ka rel ve. August 4 zing khal Salai Mang No Zik thotho in a CRV mawt.aw tharte thawn sibawi hmuah le thlah t.uanvo a la thluh. Letpanchaung Wesley Clinic ihta nurse 4 le sizung hnat.uanpawl a va thiar. Dr. T.uan Cin Thang (Thangpi) le Dr. Isaac cu todelhaw in bike thawn an ra. Sibawi le Nurse pawl pumpeknak le nu le pai’ thawhkhawmmi bomnak ruangih Outreach Program tuah thei fang kan si. Tui t.um tlawmngai suahtu sibawipawl cu- Dr. T.uan Cin Thang (Wesley Hospital - Pyinkhonegyi), Dr. Isaac, Mai Ro Tluang (Clerk, W/H – Sekan), Mai Ngun Zung Zam (Nurse Aid, W/H – Tahan), Mai Eng Cin Sung (Nurse Aid, W/H – Sadaw), Mai Thian Nei Kim (Nurse Aid, W/H – Thayakone), Saya Bual Lian Sawn (Lab. Technician, Grace Clinic – Taungzalat), Mai Zo Len Par (Nurse Aid, Grace Clinic – Hmunlai), Lia Nl. Chanchinmawii Letpanchaung Pu Zaihmingthanga Letpanchaung tipawl an si. August 4 zing khawmah Dr. T.uan Cin Thang (Wesley Hospital) in harhdamnak thu tawi a sim. Cu t.hehin, khawsung mipi in harhdamnak le natnak thu an duhduh an sut haiih kan hlawktlang nasa. Sunhnu 12:30 ihsin khawbawi inn thotho ahcun mina zoh pehcih a si. Sentaw khua le a kiangkap Myaungsone, Sadaw tipawl ihsin mina 300 t.ha an ra suak. Sibawipawl le nurse pawl cun, mipi ciimpam le thawsa hluahhlo lakah thinsaute’n an zoh t.heh. Pacang pakhat tla cu Dr. Thangpi-in a pumih tidai, ka hmuh rori ah, litre 2 a siaksak. “Nat tam laifang kan batih a t.hahnem zet tiah ka hmu. Sizung pan thei lo, pan hna thiam lo, pan remcang lo tipawl khal manlo ih zoh le an hmun roriih va pan takah cun an ra suak cingcing. Bese tak tla an rak umih, pacang pakhat tla cu a pumih titling, ka hmuh rori ah, litre 2 lai an siaksuak,” tiah Outreach fehtu pakhat cun a rel. 2014 kum LZP Medicare Outreach ih siivai hrang cemliam hi Ks. 500000 (ting nga) hrawng a siih, Kalay khawsung le Letpanchaung khawsung nu le pa in tlawmngaiih an thawhkhawm mi a si. Sibawi le nurse pawl hin kutman le nihlawh fangkhat hman la loin an pum an pe-aw tiah theih a si. “Nu le pa pawlin neih le siah thawn t.an an la. Mi neinung hlir tla an si ve ce lo. Neih ruangih pek si loin midang lainatnak thinlung thawi’ pe an si. Sibawi le nurse pawlin an thiamnak an rak thawh ve. Kannih LZP cu lilawn vek fang kan si, cubang tlawmngai suahtupawl le mipi pehtlaihtu lilawn men kan si,” tiah Central LZP Secretary Salai Lal Run Suak in a rel. A fehtu Salai Jesse khalin, “Laimi hi Mirang ram bomnak hnai le kheuhhreuh kan thiam zetih, midang bawmtu si kan tum nawn lo. A ngaingai ahcun Mirang nutar/patar tete ih lakphak man khawlkhawmmi kan rak ei rero. Tuit.um khalah tlawnginn le biakinn ah nasa zetih kan relmi cu ‘Midang bawm theitu si, midang bomnak kut’ ti hi a si. Sentaw khua hi an zonzai tuk tiih feh kan si loih, kan rak feh zonak khalah midang bom hna thiam ve thlang ding ti hi kan tuahhmuh tummi a si,” tiah a rel ve. Sentaw khua hi innkhi 83 an siih, hramthok tlawngta mi 65 an um. Kawhhran pathum vial an umih, သုတၱဘဏ္ timi calai buuk 1 an nei. Khawsungah zatlang pawlkom 2 an dingih, Sentaw Mino Pawlkom (STMP) le Lairawn Zirsang Pawlkom (LZP) an si. Ramdangih hnat.uan mi 50 kiangkap an um. Khawsungah Tualleng Tlawng pakhat hman an nei lo. Leilet ih pumcawm an tambik ih Mizoram ih hlawh-awk, calreng cin tivekin sum an hawl tlangpi. 2013 kumah Sentaw khua ih nat tambik cu Malaria a siih, Typhoid le Santen, Sungdok tipawl khal an tuarih, tui kum sungah Tukkui nat ngah nauhak mi pahnih an um tiah theih a si. Hibang minapawl hi a tlangpi thuin sizung pan thei lo/pan remcang lo an si hai. LZP member sungin mi 17 an tel thei. 1. Salai Lal Run Suak Central Secretary Lailun Branch 2. Salai Mang No Zik Central Vice President Lailun Branch 3. Salai Ngun Than Uk Central President Lailun Branch 4. Mai Nei Nei Central Treasurer Tahan Branch 5. Salai Jesse Penn-Lewis Central Journ. Secretary Letpan Branch 6. Salai Khaw Din Siam Branch President Hmunlai Branch 7. Salai Van Sui Hmung Branch Vice President Hmunlai Branch 8. Mai Van Rin Mawi Branch Treasurer Hmunlai Branch 9. Salai Lal Lawm Sang Member Letpan Branch 10. Mai Phoebe Member Letpan Branch 11. Salai Ngun Cung Bawi Member Letpan Branch 12. Salai Bawi Thang Branch President Haikhawl Branch 13. Salai Ting Lian Mang Member Sekan Branch 14. Salai Mang Lian Thang Central EC Member Zonuam Branch 15. Salai T.ha Kap Lian Member Letpan Branch Tuit.um Fehtu Sibawi, Nurse le Sizung Hnt.uantupawl 1. Dr. T.uan Cin Thang Doctor,Wesley Hospital Pyinkhonegyi (Ni 2) 2. Dr. Isaac Lian Thang Medical Officer, Letpan W/C Tahan 3. Mai Ro Tluang Clerk, Wesley Hospital Sekan 4. Mai Ngun Zung Zam Nurse Aid, W/H Tahan 5. Mai Eng Cin Sung Nurse Aid, W/H Sadaw (Ni 2) 6. Mai Thian Nei Kim Nurse Aid, W/H Thayakone 7. Saya Bual Lian Sawn Lab. Technician, Grace Clinic Taungzalat 8. Mai Zo Len Par Nurse Aid, Grace Clinic Hmunlai 9. Lia Ciin San Man Nurse, Letpan W/C Tahan 10. Nl. Chanchinmawii Compounder, Letpan W/C Letpanchaung 11. Mai Sui Khaw Mawi Nurse Aid, Letpan W/C N. Thayakone 12. Nl. Tlangthangliani Casher, Letpan W/C Letpanchaung 13. Pu Lalmuanpuia Clerk, Letpan W/C Pyin Daw Oo 14. Nl. Kawlchuanthangi Ward Cleaner, Letpan W/C Pyin Daw Oo 15. Pu Zaihmingthanga Darwon, Letpan W/C Letpanchaung ကေလးနယ္ ခ်င္းစာသင္သားမ်ားအသင္း ရဲ႕ စတုတၳႀကိမ္ေျမာက္ Medicare Outreach ဆင္ေတာရြာသို႔သြား ကေလးနယ္ ခ်င္းစာသင္သားမ်ားအသင္း(LZP) ရဲ႕ စတုတၳႀကိမ္ေျမာက္ Medicare Outreach အစီအစဥ္အျဖစ္ ၂၀၁၃ ၾသဂုတ္လ ၃-၄ အထိ ကေလးၿမိဳ႕နယ္၊ စည္သာအုပ္စု၊ဆင္ေတာရြာသို႔သြားေရာက္ေၾကာင္းသိရသည္။ ကေလးနယ္ ခ်င္းစာသင္သားမ်ားအသင္း(Lairawn Zirsang Pawlkom, LZP) branch ၇ ခု မွ အသင္းသား လူငယ္ ၁၅ ဦး၊ ၀ယ္စေလေဆးရုံ(တာဟန္း)၊ ၀ယ္စေလေဆးခန္း(လက္ပံေခ်ာင္း)၊ Grace Clinic တို႔မွ ဆရာ၀န္ Dr. Tuan Cin Thang, Dr. Isaac အပါအ၀င္ သူနာျပဳ ၈ဦး၊ Lab. Technician ၁ ဦး၊ ေဆးရံု၀န္ထမ္း ၅ဦး တို႔ ပါ၀င္သည့္ ေစတနာ၀န္ထမ္းအဖြဲ႕သည္ ဆင္ေတာေက်းရြာ အုပ္ခ်ဳပ္ေရးမွဴးေနအိမ္တြင္ အခမဲ႔ ေဆးကုသမႈ ႏွင္႔ ရပ္ရြာဖြံ႕ၿဖိဳးေရး ေဟာေျပာပြဲမ်ား သြားေရာက္ျပဳလုပ္ေၾကာင္း သိရသည္။ ဆင္ေတာေက်းရြာ LZP အသင္းသားမ်ား၏ ပံ႔ပိုးမႈျဖင္႔ ေက်းရြာ အုပ္ခ်ဳပ္ေရးမွဴးေနအိမ္တြင္ မဏၭပ္ေဆာက္လုပ္ ကာ ၾသဂုတ္လ ၃ ရက္ေန႔ နံနက္ ၈း၀၀ နာရီ မွ ညေန ၄း၃၀ အထိ၊ ၾသဂုတ္လ ၄ ရက္ေန႔လည္ ၁၂း၀၀ နာရီ မွ ညေန ၅း၀၀ အထိ ႏွစ္အတြင္း လူနာ အေယာက္ေပါင္း ၃၀၀ ေက်ာ္ ၾကည္႔ရႈကုသေၾကာင္း သိရပါသည္။ “ေရာဂါေပါမ်ားတဲ႔ရာသီကုိ ခ်ိန္ေရြးၿပီး သြားတာပါ။ တကယ္ထိေရာက္တယ္လို႔ ထင္တယ္။ ဆင္ေတာ ႏွင္႔ အနီးနား ရြာ ေျမာင္းဆံု၊ ရွားေတာရြာက လူနာ အေယာက္ေပါင္း ၃၀၀ ေက်ာ္ ေရာက္လာေတာ႔ ေတာ္ေတာ္ ပင္ပန္းရတာေပါ႔။ ဆရာ၀န္ေတြဆိုရင္ အေတာ္ ေမာမွာပဲ၊ ဒါေပမယ္႔ စိတ္ရွည္လက္ရွည္ပဲ လူနာတစ္ေယာက္စီကုိ မ်က္ႏွာမပ်က္ ၾကည့္ရႈသြားတယ္” ဟု LZP အတြင္းေရးမွဴး ဆလိုင္း လာလ္ရြန္ဆြက္ က ေျပာျပသည္။ “ဒီႏွစ္ဆိုရင္ LZP ရဲ႕ စတုတၳႀကိမ္ေျမာက္ Medicare Outreach အစီအစဥ္ပါ။ ၿမိဳ႕ေပၚေဆးခန္း၊ေဆးရုံမ်ားသို႔ သြားေရာက္မျပႏုိင္တဲ႔ ေက်းလက္ေဒသမ်ားသို႔ အေရာက္ ၾကည့္ရႈကုသရျခင္း ျဖစ္ၿပီး၊ ၿမိဳ႕တြင္းႏွင္႔ လက္ပံေခ်ာင္း ရွိ အလွဴရွင္မ်ား၊ ေစတနာရွင္ ဆရာ၀န္ ႏွင္႔ သူနာျပဳမ်ား၏ ေပးဆပ္မႈေၾကာင္႔သာ ဤအစီအစဥ္ ျဖစ္ေျမာက္ရတာပါ။” ဟု ဆလိုင္း လာလ္ရြန္ဆြက္က ဆက္လက္ေျပာျပသည္။ ဒါ႔အျပင္ LZP က ဆင္ေတာေက်းရြာ အေျခခံ မူလတန္းေက်ာင္းသား/သူမ်ားအား ဗလာစာအုပ္ ႏွင္႔ အျခားစာေရးကိရိယာမ်ားလည္း လွဴဒါန္းခဲ႔သည္ဟု သိရသည္။ ကေလးၿမိဳ႕ရဲ႕အေနာက္ေတာင္ဘက္မွာတည္ရွိတဲ႔ ဆင္ေတာေက်းရြာသည္ အိမ္ေျခ ၈၃ ရွိၿပီး၊ လက္ရွိတြင္ ဆင္ေတာေက်းရြာ အေျခခံ မူလတန္းေက်ာင္း၌ မူလတန္းေက်ာင္းသားဦးေရ ၆၅ ရွိၿပီး၊ အစိုးရခန္႔ ေက်ာင္းဆရာမ ၂ ဦး ႏွင္႔ ေက်ာင္းအုပ္ဆရာႀကီး ၁ ဦး တုိ႔ကသာ ကေလးဗဟိုျပဳစနစ္ျဖင္႔ အဆင္ေျပေအာင္ စာသင္ျပေပးေနသည္ဟု သိရသည္။ ဆင္ေတာေက်းရြာအတြင္း အျဖစ္မ်ားဆံုးေရာဂါမွာ ငွက္ဖ်ား၊ တိုက္ဖိ်ဳက္၊၀မ္းေလွ်ာေရာဂါ ႏွင္႔ တုတ္ေကြးေရာဂါ တုိ႔ျဖစ္ၿပီး၊ ေရာဂါရွိသူအမ်ားစုမွာ ၿမိဳ႕ေပၚေဆးခန္း၊ေဆးရုံမ်ားသို႔ ျပသရန္ မတတ္ႏုိင္သူမ်ားျဖစ္ၾကသည္။
Posted on: Wed, 28 Aug 2013 11:49:57 +0000
Trending Topics
Recently Viewed Topics
© 2015