Region 6, may 2 Comelec regional director Written by Bombo Iloilo Published in Ilongo Thursday, 10 October 2013 13:32 ILOILO CITY - Duha ka regional director ang nagapungko subong sa Regional Office 6 sang Commission on Elections (Comelec). Ginkumpirmar sa Bombo Radyo Iloilo ni Atty. Dennis Ausan nga duha sila ni Atty. Remlane M. Tambuang halin sa Comelec Region 11 ang nagapungko subong sa Western Visayas. Mismo si Comelec Chairman Sixto Brillantes ang nag-assign kay Tambuang bilang regional election director sa Western Visayas para sa barangay election. Suno kay Ausan, isa ka unique nga set-up ang pamunuan sang Comelec Region 6 para sa nagahilapit nga piniliay sa diin magapabilin siya sa puwesto apang si Tambuanga ang magapirma sang mga dokumento kag magapagwa sang pinal nga desisyon. Magaserbe naman nga consultant ni Tambuang si Ausan santo man sa mando sang Comelec chairman bangod indi pa pamilyar sa rehiyon ang una. Nahibaluan nga ang asawa ni Tambuang nga si Adalia Tambuang ang incumbent mayor sang Banaybanay, Davao Oriental kag ini ang rason nga ginsaylo sa iban nga assignment ang Comelec officer. Gin-athag ni Ausan nga tubtob Nobyembre 12 lang magapangalagad sa Comelec Region 6 si Tambuang kag magabalik man sa Region 11 pagkatapos sang election period. Sa subong, ang ang assistant regional director sang Comelec Region 6 nga si Atty. Tomas S. Valera ang nagapungko bilang acting regional director sang Comelec Region 11.
Posted on: Thu, 10 Oct 2013 07:08:09 +0000
Trending Topics
Recently Viewed Topics
© 2015