UN KAMINDA SIN SALIDA Den un sentido presidente di UPB, Sr. Yonchi Dortalina, tin rason ora e ta papia di un ‘kaminda sin salida’. En bèrdat tin un muraya na final di e kaminda ei. E muraya ei yama INTEGRIDAT. Pero ta UPB ta bai dal den dje, nò Gezaghebber. UPB mester bin bei, pasobra e muraya no ta move. Tanten ku UPB ta sigui kana den direkshon robes, PHU lo sostené Gezaghebber. Poder a subi na UPB su kabes. Nan a pèrdè tur sentido di humildat. No ta Gezaghebber tin ku baha, sino Burney Elhage. Kisas nan ta pensa ku pueblo lo kansa di protestá. Kisas nan tin rason. Sin embargo, e situashon aktual no ta normal. Lo no strañá nos ètòl, si lo sali ku ta chantahe ordinario tin tras di henter e asuntu aki. En todo kaso, tur puitu no a sali fo’i bou di makutu ainda. Na e víktimanan di chantahe, nos kier bisa lo siguiente. Laga e bèrdat sali numa. Mihó bo sinti bèrgwensa un ratu, en bes di keda den poder di esun ku ta chantaheá bo pa semper. Na e Miembronan di Konseho Insular di UPB nos ta sugerí lo siguiente. Nos ta kere ku algun di boso ta komprondé ku boso partido ta kanando den direkshon robes. Awor, bo por bula kurá, naturalmente. Pero nos NO ta rekomendá esei. Esei NO ta e manera honorabel. No kibra lealtat ku bo partido. No traishoná. Simplemente keda sin vota. No asistí na e Reunion. Si un di boso ta hasi esei, bo ta skapa bo partido i bo ta skapa Gezaghebber. Ta p’esei PHU ta hasi yamada riba un i tur pa bin na e demonstrashon awe 11 di yüli 2013 pa 6.30’or di atardi na Kantor di Ontvanger bieu (serka Flamingo Beach Hotel). Ayanan Sala di Reunion di Konseho Insular ta situá temporalmente. Ayanan nos ta demonstrá. Paga tinu! Nos ta demostrá sin violensia. Rèspèt i trankilo. Na nòmber di PHU, Michiel Bijkerk, sekretario
Posted on: Thu, 11 Jul 2013 20:58:18 +0000
Trending Topics
Recently Viewed Topics
© 2015