Voleson, savôr di Ete di mieç tun borc ch’al cjale al doman Domenie e torne une fieste de marilenghe che e mancjave di 34 agns. Tal numar unic tantis ricercjis che a vegnin fûr dai archivis e des memoriis società filologica congressi friulano marilenghe Email + - di Pier Carlo Begotti UDIN. Dal sigûr, plui di cualchidun di chei che domenie si cjataran a Voleson pal congrès de Filologjiche, si visaran di chel altri congrès, chel dai 16 di setembar dal 1979. Se a vegnin di fûr, a podaran viodi che la muse dal paîs e je une vore gambiade: intant, par bon acet o vin lis tabelis par talian e furlan, par fâ capî a ducj chei che a rivin la rude identitât de int. Il cjistiel cumò al è stât restaurât e cuinçât e dentri a son vignûts a lûs frescs di bielece rare. Ma al è dut il centri storic che al è stât rinovât, cun chê sô muse medievâl che e devente une volte ad an un senari straordenari per une rievocazion storiche dai timps di secui e secui indaûr cun pôcs contests di cheste fate. Une volte, un professôr di une universitât taliane, rivât a Voleson suntun dì di marcjât, si à cussì tant maraveât che al à vût dit: «Mi somee di jessi rivât intun di chei biei paisuts francês dulà che la Ete di Mieç no je mai muarte!». E lis glesiis dal teritori, e l’orghin dal ’500, e il mulinut, e lis gravis… al è dut un mont di scuvierzi ancje par chei che a son bielzà passâts par chestis bandis. Lis manifestazions che a vegnin prime de domenie dal congrès a coventin no dome par scjaldâ l’ambient, ma ancje par fâlu cognossi. E come simpri, par fâ chest, cuant che la Filologjiche e va suntun puest pal so congrès, e lasse un segn de sô presince: il numar unic, che al da une man a scuvierzi il lûc, la sô storie, la sô muse, il sens dal so vivi. E lu fâs cuntun bon lavôr di scuadre, che al cjape dentri studiôs, professôrs, academics e ricercjadôrs locâi, metint adun esperiencis, competencis, fuarcis che a son daûr a vignî fûr. Cence fâ confronts cul numar unic dal 1979, o podìn dî che a son saltadis fûr dai archivis e des memoriis orâls cetantis robis gnovis, che si cjatin intal libri organizadis cussì (par cure di Paolo Pastres e di cui che al scrîf): Teritori e archeologjie, cun scrits di Maurizio Buora, Francesco Cassini, Fernanda Puccioni e Begotti; Storie e societât, cun intervents di Luigi Zanin, Luca Vendrame, Eugenio Marin, Federico di Valvasone, Andrea Marcon, Andrea Del Col, Alessandro Fadelli, Paolo Foramitti, Franco Colussi, Pier Giorgio Sclippa, Markus Murmair; Lenghe e leterature, cun saçs di Alberto Pavan, Rudj Gorian, Angela Felice, Stefania Miotto, Federico Vicario; Art e musiche, cun Paolo Pastres, Maria Beatrice Bertone, Paolo Casadio, Elisabetta Francescutti, Stefano Aloisi, Loris Stella, Marco Rossi; Int e comunitât, cun Emanuele Minca, Debora e Bruno Avoledo, Adriana Cesselli, Vannes Chiandotto, Annamaria Bellot, Danilo Macor, Giuseppe Mariuz, Claudio Petris, Dani Pagnucco, Franco Leschiutta, Alessandra Montico. In dut, a son 39 autôrs e di chescj plui di metât a son di Voleson e dai comuns vicins. E je stade une sielte dai coordenadôrs, chê di fâ lûc no dome ai ricercjadôrs dal teritori, ma intun ai fats, aes personis, aes impresis, aes socis dai timps che o vivìn o di chei che o vin apene lassât, par fâi reson a une comunitât vive e plene di iniziativis. Une comunitât, par altri, che e je indenant di un moment impuartant e delicât: decidi, intun cun chês di Darzin e di San Martin, di unîsi par fâ sù un gnûf Comun. No podìn savê cemût che laran lis robis, dut câs e dal sigûr, unîts o disseparâts, i trê paîs a rapresentin ancjemò - dentri de provincie di Pordenon e di dut il Friûl di Soreli a mont - un biel pont di riferiment pe furlanetât. 24 settembre 2013
Posted on: Wed, 25 Sep 2013 05:04:00 +0000
Trending Topics
Recently Viewed Topics
© 2015