ZU A LA ZALEN LO: Mizoram Legislative Assembly chuan nimin piah mai khan Zu Khap Burna Dan hlihna tur leh MLTP Act thlakna tur The Mizoram Liqour (Prohibition & Control) Bill, 2014 chu a pass ta rup mai a. He Bill an pass rual rual hian MLTP Act awm tawh lo leh Zu a zalen nghal ta anga ngai tamtak an awm. Mahse MLTP Act hi hlih a la ni lova, Zu a la zalen hek lo tih kan hriat a țha. Assembly-in Dan thar tur Bill a pass hian Dan anga hman nghal theih a ni ngawt lo a. Governor pawmpuina a ngai hmasa phawt a ni. Governor-in a pawmpuina Assent a pek ve leh Dan (Act) a ni ta chauh a. Chu Act hmang chuan chu Dan-in a ken tel ngai, Bill-a inziak lang lo tamtak, Rules kan tih te hi duan leh phawt tur a ni. Rules chu duanfel a, peihfel a nih hnu-ah Assembly Session-ah bawk pharh leh tur a ni a. Assembly-in Rules a pawm hnu-ah Sorkar Gazette-ah chhuah tur a ni. Gazette-a chhuah a nih ațang chiah hian Dan thar chu hman țan nghal tur a ni. Chuvangin MLPC Bill pawh Assembly chuan a pass tawh a. Governor-in a pawmpui hnu-ah Rules an han duang leh ang a. Chumi chu Assembly Session-ah vek an pharh leh ang a, chumi hnu-a Gazette-ah chhuah a nih hunah chauh he Dan thar hi hman a ni dawn a. Chumi hma zawng chu MLTP Act kha a la nung reng a, Totally-in Zu hi Khapbur a la ni rih dawn tihna a ni. MLPC Bill pass a nih tak avanga Zalen nghal ta huaia inngaih tur a la ni rih lo e!!
Posted on: Sat, 12 Jul 2014 01:50:01 +0000